បណ្ដា​សិល្បករ​កូរ៉េ ​របស់​ក្រុមហ៊ុន SM Entertainment មាន​ទាំង​តារា​ចម្រៀង​ ក្រុម​តារា​ចម្រៀង និង តារា​ភាពយន្ត​សរុប​៤៤​រូប​​បាន​ឡើង​ឆាក​ប្រគំតន្ត្រី​មួយ​ដែល​រៀបចំ​ឡើង​នៅ​ ទីក្រុង Los Angles រដ្ឋ​កាលីហ្វូញ៉ា សហរដ្ឋ​កាល​ពី​ថ្ងៃ​សៅរ៍​សប្ដាហ៍​មុន​នេះ ដោយ​ទាក់ទាញ​បាន​នូវ​ទស្សនិកជន​ជា​អ្នក​គាំទ្រ​​ប្រមាណ​១៥ ០០០​នាក់។

សិល្បករ​ទាំង​៤៤​នាក់​នោះ រួម​បញ្ចូល​ទាំង​កំពូក​តារា​ចម្រៀង​របស់​កូរ៉េ​ដូច​ជា ក្រុម Super Junior, ក្រុម SHINee, និង Girl’s Generation ជា​ដើម។ ការ​ប្រគំតន្ត្រី​នេះ ចាប់​ផ្ដើម​ដំបូង​ជាមួយ​បទ “Shine” របស់ J-min ដែល​ជា​សមាជិក​នៅ​ ក្រុម The Grace និង កំពូល​តារា​ចម្រៀង​ផ្សេងទៀត​ជា​ច្រើន​រូប​បាន​បន្ត​ច្រៀង។ នៅ​ក្នុង​​នោះ​ដែរក៏​មាន​វត្តមាន​ តារា​ចម្រៀង​របស់​អាមេរិក Ke$ha ដែល​បាន​បង្ហាញ​បទ​ ចម្រៀង “Tik Tok” របស់​ខ្លួន​ផង​ដែរ។ ការ​ប្រគំតន្ត្រី​​មាន​រយៈ​​ពេល​៤​ម៉ោង​និង​បាន​បញ្ចប់​ទៅ​​​​​​ដោយ​ការ​ ច្រៀង​រួម​របស់​​សិល្បករ​ទាំង​អស់​គ្នា​តាម​រយៈ​បទ “Hope” របស់​ក្រុម H.O.T ផង​ដែរ។

សិល្បករ​របស់​ក្រុមហ៊ុន​នេះ​​នឹង​ធ្វើ​ដំណើរ​​ទៅ​កាន់​ទីក្រុង​ ស៊ាងហៃ​ ប្រទេស​ចិន​ទៀត​នៅ​ថ្ងៃ​ទី​១១​ខែ​​កញ្ញា​នេះ នៅ​ក្នុង​កីឡាដ្ឋាន​បាល់ទាត់ Hongkou ព្រម​ទាំង​បន្ត​ទៅ​ ទីក្រុង​តូក្យូ​ ប្រទេស​ជប៉ុន​នៅ​ខែ​មករា​ឆ្នាំ​ក្រោយ។

បកប្រែ៖ ចេង វណ្ណា