ថ្មីៗ​នេះ​ក្រុមហ៊ុន NEC នៅ​ជប៉ុន​បាន​ប្រកាស ultrabook ស៊េរី​ថ្មី​មួយ​ប្រភេទ​មាន​ទម្ងន់​ស្រាល ៨៧៥ក្រាម និង​មាន​រាង​ស្ដើង​ត្រឹមតែ ១៤,៩ម.ម ដែល​ខ្លួន​អះអាង​ថា​លក្ខណៈ​សម្បត្តិ​ទាំង​ពីរ​យ៉ាង​នេះ​បាន​បំបែក​ឯកត្តកម្ម​ជា​ Ultrabook ស្រាល​ជាង​គេ​លើ​លោក​មាន​ឈ្មោះ​ថា LaVie Z។

ដើម្បី​ផលិត​បាន ultrabook ដ៏​ស្ដើង​នេះ ក្រុមហ៊ុន​បាន​ប្រើ​សារធាតុ​លីស្យូម និង ម៉ាញ៉េស្យូម​ផ្សំ​គ្នា​ដើម្បី​បង្កើត។ លក្ខណៈ​សម្បត្តិ​របស់ LaVie Z រួម​មាន៖ មាន​អេក្រង់​ទំហំ ១៣អ៊ីញ, CPU និង SSD មាន​ពីរ​ជម្រើស គឺ Core i7-3517U Intel Ivy Bridge ហើយ​មាន SSD អាច​ផ្ទុក​ទិន្នន័យ​ទំហំ 256GB និង Core i5-3317U Intel Ivy Bridge ជា​មួយ SSD ទំហំ 120GB។ ជម្រើស​ទាំង​ពីរ​ខាង​លើ​ប្រើ RAM ទំហំ 4GB ដូច​គ្នា ហើយ​បំពាក់​បច្ចេកវិទ្យា Wi-Fi និង Bluetooth ដូច​គ្នា​ផង​ដែរ។ មាន​រន្ធ USB 3.0, រន្ធ SDXC, រន្ធ HDMI, ថ្ម​ប្រើ​កាន់​បាន ៨ម៉ោង។

ultrabook ដ៏​ស្រាល​នេះ មិន​ទាន់​ចេញ​លក់​នៅ​ឡើយ​ទេ ក៏​ប៉ុន្តែ​បើ​តាម​លក្ខណៈ​សម្បត្តិ​ខាង​លើ​អាច​នឹង​លក់​ក្នុង​តម្លៃ ១ ៦០០ដុល្លារ​សម្រាប់ CPU Intel Core i5-3317U ហើយ​សម្រាប់ Intel Core i7-3517U មាន​តម្លៃ​លើស​នេះ ប្រហែល​ឡើង​ដល់ ១ ៩៨០ដុល្លារ​អាមេរិក ដែល​នឹង​ចេញ​លក់​ដំបូង​នៅ​ប្រទេស​ជប៉ុន​មុន​គេ។

យ៉ាង​ម៉េច​ដែរ ultrabook ស្រាល​អញ្ចឹង? តើ​ប្រិយមិត្ត​មាន​ចំណាប់​អារម្មណ៍​យ៉ាង​ណា​ដែរ​ចំពោះ LaVie Z ខាង​លើ​នេះ?

ប្រែ​សម្រួល៖ ឈុន ហួរ
ប្រភព​និង​រូបភាព៖ ​www.geeky-gadgets.com​,  newstechdaily.com