អតីត​កីឡាករ​​របស់​ក្រុម​​ ​ Rapracha FC​ ចំនួន​​២១​ នាក់​​​​​កាល​ទសវត្សរ៍​ ​៦០ និង​ ៧០​ នឹង​​ទាត់​មិត្តភាព​ជា​មួយ​ក្រុម​វ័យចាស់ ​​ព្រះខ័នរាជ​​ វេលា​ម៉ោង​ ២ រសៀល​នេះ​នៅ​ពហុកីឡដ្ឋានជាតិ។ ​នេះ​បើ​តាម​​ការ​ឲ្យ​ដឹង​របស់​លោក​ ប៉ែន ផាត គ្រូ​បង្វឹក​កូន​ខ្មែរ​អឺរ៉ុប។

លោក​ ប៉ែន ផាត បន្ត​​ថា​ នេះ​ជា​ការ​កសាង​មិត្តភាព​រវាង​​អ្នក​​កីឡា​នៅ​ថៃ​ និង​ ខ្មែរ។ ​កីឡាករ​​ជើង​ចាស់​ដែល​មក​កម្ពុជា​នេះ​ ​គឺ​សុទ្ធ​តែ​កីឡាករ​ដែល​ធ្លាប់​លេង​ជា​មួយ​លោក​​នៅ​ថៃ ហើយ​​មួយ​ចំនួន​ទៀត​ជា​កូន​សិស្ស​របស់​លោក​ផ្ទាល់​តែ​ម្ដង។ ​​ការ​មក​នេះ​គឺ​មិន​មាន​ធ្វើ​អ្វី​ក្រៅ​ពី​លេង​បាល់​រួម​គ្នា​នោះ​ទេ ហើយ​ ​​​អតីត​កីឡាករ​នៅ​ក្លិប​ថៃ​ទាំង​អស់​នឹង​ត្រឡប់​ទៅ​​វិញ​ថ្ងៃ​ទី​ ១២​ កញ្ញា​​ស្អែក។


អភិបាល​ខេត្ត Samut Songkhram (ខោ​ខ្មៅ) ទទួល​ស្វាគមន៍លោក ​ប៉ែន ផាត កាល​ដើម​ខែ​នេះ

ឯកឧត្ដម​ លី គឺមឈុន ​ប្រធាន​ក្លិប​ ព្រះខ័នរាជ​ ជា​អ្នក​ទទួល​​រាក់ទាក់​ និង​ ជំរុញ​​ឲ្យ​មាន​ការ​ប្រកួត​មិត្តភាព​ដ៏​កម្រ នេះ​កើត​​ឡើង​ ខណៈ​​វត្ត​មាន​របស់​លោក​ ប៉ែន ផាត​ អតីត​កីឡាករ​​ល្បីល្បាញ​របស់​​កម្ពុជា​​នា​ទសវត្សរ៍​ ​៦០ និង​ ៧០​ នេះ ក៏ជា​ចំណែក​ដ៏​ចម្បង ដែល​ធ្វើ​ឲ្យ​ការប្រកួត​នេះ ផុស​ខ្លួន​ចេញ​មក​ដែរ។

បន្ទាប់​ពី​គូ​នេះ​ទៅ​ ​ក្រុម​ព្រះខ័នរាជ នឹង​ទាត់​មិត្តភាព​​​ទល់​នឹង​ក្រុម កូន​ខ្មែរ​នៅ​អឺរ៉ុប ចាប់​ពី​ម៉ោង​ ៤​ រសៀល​តទៅ។ ​កុំ​ភ្លេច​ចូល​រួម​លើក​ទឹកចិត្ត​​ ​​កូន​ខ្មែរ​អឺរ៉ុប និង​ ព្រះខ័នរាជ៕

អត្ថបទ៖ ឆន ទិត្យ
រូបថត៖ ផ្ដល់​ឲ្យ