មហោស្រពសិល្បៈចំរៀងខ្មែរខែកក្កដា Trackback
ពលរដ្ឋខ្មែរទាំងក្នុងនឹងក្រៅប្រទេសដែលមាននិស្ស័យស្នេហាវិស័យសិល្បៈចំរៀងទំាងបុរាណនិងសម័យមានឱកាសក្នុងការកសាងស្នាដៃលើវិថីសិល្បៈតាមរយៈមហោស្រពប្រលងចំរៀងធំមួយនៅខែកក្កដាខាងមុខនេះ។
ទូច ស៊ុននិច និង អ៊ុន សុផល
មន្ត្រីជាន់ខ្ពស់នៃក្រសួងវប្បធម៌និងវិចិត្រសិល្បៈអោយដឹងថាមហោស្រពសិល្បៈចំរៀងសាកលខ្មែរជាលើកដំបូងមួយនឹងត្រូវរៀបចំឡើងក្នុងខែកក្កដានៅឯមជ្ឈមណ្ឌលកោះពេជ្រក្នុងគោលដៅបំផុស និងបង្កើនឱ្យមានការប្រកួតប្រជែងផ្នែកសិល្បៈចំរៀងបុរាណនិងសម័យតាមទិសស្លោក “កម្ពុជាព្រះរាជាណាចក្រនៃវប្បធម៌”។
លោកឃឹម សារិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ និងជាអនុប្រធានគណៈកម្មការអន្ដរក្រសួងមានសុទិដ្ឋិថាមហោស្រពនេះអាចចូលរួមទប់ស្កាត់បាននូវការហូរចូលនៃវប្បធម៌អវិជ្ជមានពីបរទេស។
បើទោះបីជាក្រសួងវប្បធម៌ និងវិចិត្រ សិល្បៈនឹងសហការជាមួយទីស្ដីការគណៈរដ្ឋមន្ដ្រី ក្រសួងពាក់ព័ន្ធក៏ដូចជាអគ្គនាយកដ្ឋានវិទ្យុ និងទូរទស្សន៍បាយ័នព្រមទាំងធនាគារកាណាឌីយ៉ាសំរាប់រៀបចំមហោស្រពនេះប៉ុន្តែបេក្ខជនបេក្ខនារីនឹងត្រូវជ្រើសចំរាញ់តាមរយៈមន្ទីរវប្បធម៌និងវិចិត្រសិល្បៈខេត្តក្រុងនិមួយៗជាស្រេចមុនពេលដែលអ្នកមានចំណាត់ថ្នាក់ល្អបំផុតមានឱកាសមកចូលរួមប្រកួតនៅភ្នំពេញ។ដូច្នេះអ្នកដែលមានចំណាប់អារម្មណ៏អាចដាក់ពាក្យសុំចូលប្រឡងនៅតាមមន្ទីរវប្បធម៌ និងវិចិត្រសិល្បៈរាជធានី-ខេត្ដ ដែលខ្លួនរស់នៅឯអ្នករស់នៅក្រៅប្រទេសអាចទំនាក់ទំនងតាមស្ថានទូតខ្មែរប្រចាំប្រទេសនិមួយៗរឺតាមគហទំព័រwww.mcfa.gov.kh ៕
កាលពីប្រមាណជា២០ឆ្នាំមុនអគ្គនាយកដ្ឋានទូរទស្សន៏ជាតិកម្ពុជាតែងតែបានរៀបចំមហោស្រពចំរៀងដែលប្រមូលមកនូវអ្នកចំរៀងល្បីៗសំរាប់ពិភពសិល្បៈខ្មែររហូតដល់ពេលបច្ចុប្បន្នមានជាអាថ៌នាងអ៊ុនសុផលនាងម៉េងកែវពេជ្ជតានាងទូចស៊ុននិច។ល។
ដោយប៊ិនប៊ុណ្ណា
កែសំរួល:ម៉ីសនសុធារី
