Sabay News Online

Ngo Luc គូសគំនូរលើដងខ្លួនតារាម៉ូដែល

huychanthary — Fri, 03 Feb 2012 15:44:20 +0000

Ngo Luc ជាវិចិត្រករគូសរូបដំបូងគេដែលបញ្ចូលរបៀបថ្មីក្នុងការគូសគំនូរលើរាងកាយមនុស្សនៅក្នុងប្រទេសវៀតណាម។ ថ្មីៗនេះ លោកបានបង្ហាញសិល្បៈគំនូរចុងក្រោយរបស់លោកនៅលើដងខ្លួនតារាម៉ូដែល Loan Tran។

ក្រោមសរសៃជក់របស់ Ngo Luc ខ្នងរបស់តារាម៉ូដែល Loan Tran បានក្លាយជាផ្កាដ៏ស្រស់ស្អាតនារដូវផ្ការីក ហើយក្នុងរូបភាពបន្តបន្ទាប់ខាងក្រោមគឺជាស្នាដៃរបស់ Ngo Luc ថតរូបដោយ Minh Tuan ម៉ូដែលដោយ Loan Tran និង ផាត់មុខដោយ Tony Tuong៕

បកប្រែ៖ ថារី
ប្រភព & រូបភាព៖ vietnamnet

ដោះដូរកីឡាករអ៊ឺរ៉ុបបិទទ្វារ កម្ពុជាដូចគ្នាដែរ

pen.sophanna — Fri, 03 Feb 2012 15:29:51 +0000

ទីផ្សារដោះដូរកីឡាករតំបន់អ៊ឺរ៉ុបរដូវកាល២០១២ត្រូវបានផ្អាកសកម្មភាព ឬ បិទទ្វារ កាលពីថ្ងៃអង្គារទី៣១ មករា ២០១២ដើមសប្ដាហ៍នេះ។ បើក្រឡេកមកទីផ្សារដោះដូរកីឡាករនៅកម្ពុជាវិញត្រូវបានបញ្ចប់ដែរមុនពានរង្វាន់សម្ដេច ហ៊ុន សែន ឆ្នាំ២០១២ ចាប់ផ្ដើម។ និយាយឲ្យខ្លីទៅគ្រប់ក្រុមទាំងអស់បានបញ្ជូនឈ្មោះកីឡាករ២៣នាក់របស់ខ្លួនទៅសហព័ន្ធកីឡាបាល់ទាត់កម្ពុជារួចរាល់ហើយ។ Sabay សូមបង្ហាញជូនកីឡាករចំនួន២៩រូប ដែលបានផ្ទេរពីក្លិបមួយទៅកាន់ក្លិបមួយមុនពានសម្ដេចចាប់ផ្ដើមនេះ ខណៈដែល អតីតអ្នកចាំទីដៃទី១ ភ្នំពេញក្រោន ប៉េង ប៊ុនឆាយ មិនទាន់សម្រេចចិត្តនៅឡើយ។ នៅមានកីឡារមួយចំនួនទៀត តែនឹងត្រូវបង្ហាញមុនពានរង្វាន់មិត្តហ្វូនខេមបូឌានលីក។

បញ្ជីរាយនាមកីឡាករដែលផ្លាស់ប្ដូរក្លិបមុនពានសម្ដេច
លេខរៀង	ឈ្មោះកីឡាករ	ក្លិបដែលចាកចេញពី	ក្លិបដែលទៅចូលរួម
1	នេត វាសនា	អគ្គស្នងការនគរបាលជាតិ	ការពារជាតិ
2	នៅ សុសិលា	ការពារជាតិ	អគ្គស្នងការនគរបាលជាតិ
3	ស៊ុន សុវណ្ណរិទ្ធី	ភ្នំពេញក្រោន	ណាហ្គាខប
4	សាន ណារិទ្ធ	ភ្នំពេញក្រោន	ណាហ្គាខប
5	ស៊ុន សុបញ្ញា	ភ្នំពេញក្រោន	ណាហ្គាខប
6	កែវ សុខង៉ន	Samut Sakhon FC(ថៃ )	បឹងកេត
7	កែវ សុខផេង	ខេត្តក្រចេះ	បឹងកេត
8	ស៊ិន ដាលីន	Sa Kaeo United (ថៃ )	បឹងកេត
9	សួង វិរៈ	ភ្នំពេញក្រោន	អគ្គស្នងការនគរបាលជាតិ
10	ហុង រដ្ឋនា	ភ្នំពេញក្រោន	បឹងកេត
11	អ៊ុង តារា	ឆ្មាខ្មៅ (ស្វាយរៀង )	ការពារជាតិ
12	ថុន សាវុធ	ខេត្តកណ្ដាល	បៀបប្រាយយូណាយធីត
13	ស៊ូ សម្បត្តិ	ខេត្តមណ្ឌលគីរី	បៀលប្រាយយូណាធីត
14	គាត យូ	ខេត្តកំពត	បៀបប្រាយយូណាយធីត
15	នួន ផានិត	ខេត្តកណ្ដាល	បៀលប្រាយយូណាយធីត
16	នុត ស៊ីនួន	ណាហ្គាខប	ឆ្លាមសមុទ្រ
17	សំ ចំរើន	ឆ្លាមសមុទ្រ	ភ្នំពេញក្រោន
18	យុគ អារី	ព្រែកប្រាកីឡា	ភ្នំពេញក្រោន
19	អាំ ឧត្ដម	វេស្ទើន	ភ្នំពេញក្រោន
20	វី លីកា	ព្រែកប្រាកីឡា	ភ្នំពេញក្រោន
21	ថោង ដា	ការពារជាតិ	ភ្នំពេញក្រោន
22	ងយ ស្រិន	ខេត្តកោះកុង	ភ្នំពេញក្រោន
23	ម៉ែន សីហា	វេស្ទើន	ភ្នំពេញក្រោន
24	ម៉ាលីគី រ៉ាហា	ព្រែកប្រាកីឡា	ភ្នំពេញក្រោន
25	អ៊ុក សុធី	Flying Bikes	ភ្នំពេញក្រោន
26	ឈុន សុវណ្ណារ៉ា	Phnom Penh Empire	ភ្នំពេញក្រោន
27	សុះ ស៊ូហាណា	ព្រែកប្រាកីឡា	ភ្នំពេញក្រោន
28	លី គឹមហ័រ	គ្មាន	ភ្នំពេញក្រោន
29	ឡេង មករា	គីរីវង់សុខសែនជ័យ	ភ្នំពេញក្រោន
30	ប៉េង ប៊ុនឆាយ	ភ្នំពេញ	មិនទាន់ប្រាកដ

អត្ថបទ៖ ប៉ែន សុផាន់ណា

វះកាត់ដូរសរីរាង្គ ៦ មុខ អត់បញ្ហា!

yornsophearith — Fri, 03 Feb 2012 15:14:37 +0000

ក្មេងស្រីវ័យ ៩ ឆ្នាំម្នាក់នៅរដ្ឋ Maine សហរដ្ឋអាមេរិក បានត្រឡប់មកផ្ទះវិញដោយមានសុខភាពធម្មតា បន្ទាប់ពីត្រូវធ្វើការវះកាត់ប្តូរសរីរាង្គ ៦ មុខ ដើម្បីយកដុំសាច់ដុះដែលកំពុងរីករាលពេញក្នុងពោះនាងចេញ។

ក្រុមវេជ្ជបណ្ឌិតនៅមន្ទីរពេទ្យកុមារ Boston បានវះកាត់ក្មេងស្រី Alannah Shevenell’s ប្តូរក្រពះ ថ្លើម ផាល ពោះវៀនតូច លំពែង និងបំពង់អាហារមួយភាគ កាលពីខែតុលា កន្លងទៅនេះ។ នេះជាការវះកាត់បំពង់អាហារ និងសរីរាង្គច្រើនបំផុតលើកដំបូងបង្អស់មិនធ្លាប់មានពីមុនមក ក្នុងរាងកាយតែមួយនៅក្នុងតំបន់ New England។

ការវះកាត់ យកដុំសាច់ដុះដ៏ធំកម្រដែលអាចបង្កជម្ងឺមហារីកនេះ ត្រូវធ្វើឡើងជាចាំបាច់ ដោយសារដុំសាច់នេះកំពុងវាយលុកសរីរាង្គ និងកំពុងយាយីបេះដូងរបស់ក្មេងស្រីនេះ៕

បកប្រែ៖ សុផាត
ប្រភព និងរូបភាព៖ Yahoo

ចិន ការពារអ៊ីរ៉ង់

yornsophearith — Fri, 03 Feb 2012 15:12:35 +0000

យោងតាម Reuters ចេញផ្សាយកាលពីម្សិលមិញបានឲ្យដឹងថា សារព័ត៌មានធំមួយនៅចិនបានបន្តគោលជំហរយ៉ាងម៉ឺងម៉ាត់របស់ក្រុង ប៉េកាំងក្នុងការប្រឆាំងនឹងវិធានការរបស់លោកខាងលិចក្នុងការដាក់ទណ្ឌកម្មលើប្រទេសអ៊ីរ៉ង់ ហើយបានព្រមាននៅថ្ងៃសុក្រនេះថា ភាពតានតឹងជុំវិញបញ្ហាកម្មវិធីនុយក្លេអ៊ែររបស់ក្រុងតេហេរ៉ង់ កំពុងប៉ះពាល់ដល់ទីផ្សារថាមពល និងអាចប៉ះពាល់ដល់ការងើបឡើងវិញនៃសេដ្ឋកិច្ចពិភពលោក។

សារព័ត៌មាន People’s Daily ដែលជាសារព័ត៌មានបញ្ចេញមតិរបស់គណបក្សកាន់អំណាចកម្មុយនីស្ត បានធ្វើការរិះគន់លើទណ្ឌកម្មបែបនេះ មួយថ្ងៃបន្ទាប់ពីអធិការបតីអាល្លឺម៉ង់ លោកស្រី Angela Merkel បានទទូចដល់ក្រុងប៉េកាំងឲ្យប្រើប្រាស់ឥទ្ធិពលខ្លួន ដើម្បីបញ្ចុះបញ្ចូលដល់អ៊ីរ៉ង់ឲ្យបោះបង់កម្មវិធីអាវុធនុយក្លេអ៊ែរចោល។

កាលពីថ្ងៃព្រហស្បតិ៍ម្សិលមិញនេះ ក្នុងឱកាសនៃសន្និសីទព័ត៌មានរួមគ្នាមួយ លោកនាយករដ្ឋមន្ត្រីចិន Wen Jiabao ហាក់ដូចជាបដិសេធចំពោះរាល់ទណ្ឌកម្មបន្ថែមណាមួយមកលើអ៊ីរ៉ង់។ លោកថ្លែងថា ក្រុងប៉េកាំងប្រឆាំងចំពោះប្រទេសលោកខាងលិចដែលយកទំនាក់ទំនងពាណិជ្ជកម្មធម្មតាដែលខ្លួនមានជាមួយអ៊ីរ៉ង់ មកធ្វើជាបញ្ហានយោបាយ។

ចិន ដែលជាប្រទេសអ្នកប្រើប្រាស់ប្រេងធំលំដាប់ទី ២ក្នុងពិភពលោក និងជាអ្នកទិញយកប្រេងអ៊ីរ៉ង់ធំជាងគេបង្អស់ តែងតែប្រឆាំងនឹងទណ្ឌកម្មមកលើវិស័យថាមពលអ៊ីរ៉ង់ជានិច្ច ហើយព្យាយាមបន្ធូរបន្ថយភាពតានតឹងដែលអាច គំរាមកំហែងដល់ការផ្គត់ផ្គង់ប្រេងមកដល់ខ្លួន។ ភាពតានតឹងជុំវិញបញ្ហាថាមពលនេះ គឺជាក្តីកង្វល់យ៉ាងខ្លាំងសម្រាប់ចិន។ ជាក់ស្តែង អណ្តាតភ្លើងនៃភាពតានតឹងរវាងអ៊ីរ៉ង់ និងលោកខាងលិច បានបណ្តាលឲ្យតម្លៃប្រេងឆៅ Brent ឡើងប្រមាណជា ៩ ភាគរយ ចាប់តាំងពីពាក់កណ្តាលខែធ្នូមក។

សហរដ្ឋអាមេរិកបានដាក់ទណ្ឌកម្មមកលើអ៊ីរ៉ង់ធ្ងន់ធ្ងរបំផុត ក្នុងពេលដែលប្រធានាធិបតីអាមេរិក បារ៉ាក់ អូបាម៉ា បានចុះហត្ថលេខាលើច្បាប់ទណ្ឌកម្មលើប្រតិបត្តិការហិរញ្ញវត្ថុដែលទាក់ទងនឹងធនាគារកណ្តាលរបស់អ៊ីរ៉ង់ កាលពីថ្ងៃទី ៣១ ខែធ្នូ កន្លងទៅនេះ។ រីឯ សហភាពអឺរ៉ុបក៏បានដាក់ទណ្ឌកម្មលើការនាំចូល ការទិញ ឬចរាចរណ៍ប្រេងអ៊ីរ៉ង់កាលពីខែមករាកន្លងទៅនេះផងដែរ។

ទោះបីជាយ៉ាងណាក៏ដោយ ចិនបានគាំទ្រសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលអំពាវនាវដល់អ៊ីរ៉ង់ឲ្យបញ្ឈប់សកម្មភាពចម្រាញ់អ៊ុយរ៉ានីញ៉ូម ទន្ទឹមពេលកំពុងធ្វើការដើម្បីធានាថា ទំនាក់ទំនងថាមពលខ្លួនមិនរងការគំរាមកំហែង។ កាលពីខែមករា លោក Wen បានព្រមានដោយត្រង់ៗចំពោះក្រុងតេហេរ៉ង់ចំពោះសកម្មភាពណាមួយ ដើម្បីទទួលបានអាវុធនុយក្លេអ៊ែរ៕

បកប្រែ៖ សុផាត
ប្រភព៖ Reuters
រូបភាព៖ Asiaone.com

យ៉ាស…សៀរ៉ាចេះកាត់ដេរទៀត!

chin.sopheak — Fri, 03 Feb 2012 09:16:52 +0000

Ponaka Kalib Style សប្ដាហ៍នេះសូមនាំមកជូននូវសកម្មភាពរបស់តារារូបសង្ហា លោក សាយ សៀរ៉ា កាត់សំលៀកបំពាក់ទាន់សម័យ និងបុរាណ។ ជួយប្រាប់ Sabay ផងមើល៍…! បុរសសង្ហារូបនេះពិតជាអាចកាត់សំលៀកបំពាក់សំមែនឬ? មួយវិញទៀតប្រិយមិត្តសាករៀបរូបភាពនេះតាមលំដាប់លេខទៅមើល៍ ថាតើ សៀរ៉ា គួរផ្តើមពីណាមុន?

១

២

៣

៤

៥

៦

៧

៨

៩

១០

១១

១២

១៣

១៦កុម្ភៈ តារាៗណាត់ជួបគ្នានៅកោះពេជ្រ

Touch Sokhak — Fri, 03 Feb 2012 08:50:14 +0000

កម្មវិធី “អាណាចក្រតារា” នាថ្ងៃទី១៦ កុម្ភៈនេះ សិល្បករសិល្បការិនីរាប់រយនាក់នឹងបង្ហាញវត្តមានរបស់ក្នុងព្រឹត្តិការណ៍ប្រគល់ពានរង្វាន់ ដល់សិល្បករសិល្បការិនីប្រជាប្រិយបំផុត និងប្រកបដោយទេពកោសល្យប្រចាំឆ្នាំ២០១១។ តារាគ្រប់ដួងដែលកម្មវិធី “អាណាចក្រតារា” បានផ្ដល់ដំណឹងសុទ្ធតែបញ្ជាក់យ៉ាងមុតមាំថា នឹងចូលរួមក្នុងព្រឹត្តិការណ៍នេះមិនឲ្យរំលងនោះទេ បើទោះជានៅពុំទាន់ដឹងនៅឡើងថា ទទួលបានពានឬមិនក្ដី។

តារាចម្រៀងស្រស់សង្ហា ហើយមានការគាំទ្រពីសំណាក់យុវវ័យយ៉ាងច្រើនប្រចាំផលិតកម្មសាន់ដេ លោក កែវ វាសនា បានលើកឡើងថា “កម្មវិធីអាណាចក្រតារាធ្វើឲ្យមហាជនយល់ពីតម្លៃនៃសិល្បៈ”។ លោក កែវ វាសនា ដែលនឹងបង្ហាញមុខក្នុងកម្មវិធីនេះនាថ្ងៃទី១៦ ខាងមុខ បន្តថា កាលដែលចូលរួមប្រកួតប្រជែងក្នុងកម្មវិធីនេះ គឺចង់ដឹងពីសមត្ថភាពរបស់ខ្លួន ថាមានការគាំទ្រដល់កម្រិតណាដោយមិនគិតពីការចាញ់ឈ្នះនោះទេ។ ករណីដែលមិនបានលើកពានរង្វាន់មានន័យថានៅខ្វះចន្លោះត្រង់កន្លែងណាមួយហើយ។

ចំណែកតារាសម្ដែង និងជាតារាបង្ហាញម៉ូដ ទឹម រដ្ឋា បានយល់ឃើញថា «”អាណាចក្រតារា” ជាកម្មវិធីដំបូងរបស់កម្ពុជា ដែលមានបង្កើតពានរង្វាន់លើកទឹកចិត្តដល់សិល្បករ»។ តារាដ៏ស្រសសោភាខាងលើបានថ្លែងអំណរគុណ ចំពោះម្ចាស់កម្មវិធីដែលបានបង្កើតឡើង។ មិនតែប៉ុណ្ណោះតារាសម្ដែងនៅតែសប្បាយចិត្ត ទោះបីជាទទួលបានពានរឺ មិនបាន ក៏ដោយនៅពេលចូលរួម។ នាងប្ដេជ្ញាថា នៅតែខំប្រឹងបញ្ចេញស្នាដៃក្នុងបំណងទាក់ទាញការគាំទ្រ។

ងាកមកមើលតារាសម្ដែងរាងស្រស់សង្ហា ឈុន វិរៈកុសល្យ ក៏មិនខុសពីសិល្បករ សិល្បការិនីខាងលើដែរ ដោយបានបង្ហាញចំណាប់អារម្មណថា “អាណាចក្រតារាជាកម្មវិធីដ៏ល្អមួយចំពោះសិល្បករខ្មែរ”។ ការយល់ឃើញបែបនេះក៏ព្រោះតែ នេះជាកម្មវិធីលើកទីមួយនៅកម្ពុជាដែលបានប្រគល់ពានរង្វាន់ដល់តារា មិនចាញ់បណ្ដាលប្រទេសដែលមានសិល្បៈរីកចំរើននោះទេ។ ទោះបីជាមានដំណើរទៅក្រៅប្រទេសនៅថ្ងៃនេះ តែតារាដែលមានប្រជាប្រិយមួយនេះ នឹងត្រឡប់មកឲ្យទាន់ពេលវេលា ព្រោះចង់ចូលរួមកម្មវិធីពិសេសបំផុត។ ម៉្យាងទៀតកម្មវិធីនេះ បានផ្ដល់ប្រយោជន៍ឲ្យសិល្បករបានជួបជុំគ្នា ហើយបានស្គាល់បណ្ដាលផលិតកម្មផ្សេងៗទៀតផង។

នៅតែឮពាក្យដដែលចេញពីមាត់ពិធីការិនីដែលកំពុងតែល្បី ប្រចាំទូរទស្សន៍ស៊ីធីអិនគឺ កញ្ញា តេង លក្ខណា។ លក្ខិណា បានបង្ហាញចំណាប់អារម្មណថា «”អាណាចក្រតារាជួយឲ្យតារាមានឱកាស!”»។ កញ្ញាសប្បាយចិត្តណាស់ដែលកម្មវិធី “អាណាចក្រតារា” អញ្ជើញឲ្យចូលរួមនៅថ្ងៃប្រកាសលទ្ធផល ព្រោះមានឱកាស បានដឹងពីសមត្ថភាព និង បានជួបជាមួយសិល្បករផ្សេងៗ។

បណ្ដាអ្នកគាំទ្រសិល្បៈទាំងអស់ជាទីមេត្រី! រហូតមកដល់ពេលនេះ គេនៅពុំទាន់បានដឹងទេថា តារាណា អ្នកនិពន្ធណា កម្មវិធីទូរទស្សន៍ណា ខ្សែភាពយន្តណា ទទួលបានពានរង្វាន់នោះ ដរាបណាថ្ងៃទី១៦មិនទាន់មកដល់។ បណ្ដាមិត្តយុវវ័យ ក៏មានឱកាសចូលរួមអបអរសាទរតារាសំណព្វចិត្តរបស់បានដែរនៅថ្ងៃនោះ។ កុំភ្លេច! នៅសាលសន្និសីទកោះពេជ្រ ផ្សាយផ្ទាល់តាមទូរទស្សន៍បាយ័នព័ត៌មានរហូតដល់ម៉ោង១០យប់ និងផ្សាយតាមទូរទស្សន៍Sabayលើប្រព័ន្ធអ៊ីនធឺណិត៕

អត្ថបទ៖ ម៉ឺន រស្មី
រចនារូប៖ ជៀប សំណាង

អាកាសធាតុត្រជាក់ សម្លាប់មនុស្សជាង១៦០នាក់នៅអឺរ៉ុប

yornsophearith — Fri, 03 Feb 2012 08:34:42 +0000

យោងតាមសារព័ត៌មាន AFP ចេញផ្សាយថ្ងៃនេះ បានរាយការណ៍ថា រហូតមកដល់ពេលនេះ មនុស្សប្រមាណ ១៦៤នាក់បានស្លាប់ ដោយសារតែអាកាសធាតុត្រជាក់ខ្លាំង ជាពិសេសនៅ ក្នុងតំបន់អឺរ៉ុបខាងកើត ចាប់ពីប្រទេស អ៊ុយក្រែន រហូតដល់ប្រទេសអ៊ីតាលី ។

នៅប្រទេសអ៊ុយក្រែន ប្រជាជនរាប់ពាន់នាក់ត្រូវបានជម្លៀស ឲ្យស្នាក់នៅ ក្នុងជំរុំជនភៀសខ្លួនបណ្ដោះអាសន្ន។ បើយោងតាមភ្នាក់ងារសង្គ្រោះបន្ទាន់ នៅក្នុងប្រទេសនេះ បានរាយការណ៍ថា មានមនុស្សស្លាប់ប្រមាណ ៦៣នាក់ ដែលភាគច្រើន កកស្លាប់នៅលើផ្លូវ ហើយមួយចំនួនទៀតស្លាប់នៅមន្ទីរពេទ្យ ក្រោយពេល សារពាង្គកាយអ្នកទាំងនោះមិនអាចធននឹងអាកាសធាតុត្រជាក់បាន។

នៅក្នុងតំបន់អឺរ៉ុបភាគខាងកើតនេះ ភូមិជាច្រើនត្រូវបានកាត់ផ្ដាច់ ផ្លូវជាច្រើនកកស្ទះ មិនអាចធ្វើដំណើរកើត ចំណែកផ្លូវរថភ្លើងវិញក៏ជួបបញ្ហាកកស្ទះដែរ។

ប្រទេសប៉ូឡូញ ចំនួនអ្នកស្លាប់បានកើនឡើងដល់ ២៩នាក់ ហើយអាកាសធាតុនៅក្នុងប្រទេសនេះបានធ្លាក់ចុះដល់ ដក ៣២ អង្សាសេ ។

ការិយាល័យឧតុនិយមប្រចាំនៅ ក្រុងឡុងដ៍ បានព្រមានថា អាកាសធាតុត្រជាក់នេះ នឹងបន្តកើតឡើងនៅតំបន់ជាច្រើនទៀត ហើយនៅថ្ងៃសុក្រនេះ គេរំពឹងទុកថា នៅទីក្រុង Kiev ប្រទេសអ៊ុយក្រែន សីតុណ្ហភាពនឹងបន្តធ្លាក់ចុះទៀត ខណៈដែលបច្ចុប្បន្ន សីតុណ្ហភាពនៅក្នុងទីក្រុងនេះ នៅដក២៧អង្សាសេ។

ការិយាល័យនេះ ក៏បានឲ្យដឹងទៀតថា ទីក្រុងប៊ែឡាំង ប្រទេសអាល្លឺម៉ង់ នឹងមានធ្លាក់ព្រិលនៅថ្ងៃសុក្រនេះដែរ ហើយអាកាសធាតុនឹងធ្លាក់ចុះដល់ដក ១០អង្សាសេ ។ ចំណែកនៅចក្រភពអង់គ្លេសវិញ នឹងមានព្រិល ធ្លាក់ពាសពេញប្រទេស។

ទៅមើលប្រទេស Latvia វិញ គ្រាន់តែនៅជុំវិញរដ្ឋធានី Sofia មានមនុស្សប្រមាណ១០នាក់បានស្លាប់ ហើយប្រជាជនមួយចំនួនបានអះអាងថា លុយរបស់គេមិនអាចដកចេញពីម៉ាស៊ីន ATM បានទេ ដោយសារតែម៉ាស៊ីនមិនដំណើរការ។

នៅប្រទេស រ៉ូម៉ានី វិញ ចំនួនអ្នកស្លាប់ បានកើនឡើងដល់២២នាក់ ។ ចំណែកសាលារៀនជាច្រើនកន្លែង ត្រូវបានបិទជាបណ្តោះអាសន្ន។ ចំណែកនៅ ប៊ុលហ្គារី មានអ្នកស្លាប់ប្រមាណ ១០នាក់។ នៅប្រទេសផ្សេងទៀតមាន នៅអូទ្រីស មាន ២នាក់ Serbia ៧នាក់ , សាធារណរដ្ឋ ឆែក ៥នាក់ ស្លូវ៉ាគី ២នាក់ និង ២នាក់ ទៀតនៅ ក្រិក។

នៅប្រទេស អូទ្រីស និង Serbia មាន មនុស្សប្រមាណ ១១៥ ០០០នាក់ ផ្សេងទៀតបានជាប់ក្នុងគេហដ្ឋានរបស់ខ្លួនមិនអាចធ្វើដំណើរទៅណាបាន។

នៅប្រទេសបារាំង វិញ ៤២តំបន់ក្នុងចំណោម ១០១តំបន់ ត្រូវបានព្រមានថា នឹងមានធ្លាក់ព្រិលក្រាស់ ហើយសម្រាប់នៅក្រុងបារីសវិញ អគារយោធាប្រមាណ៦០០ កន្លែងត្រូវបានត្រៀមទុកសម្រាប់សង្គ្រោះប្រជាជនពីអាកាសធាតុត្រជាក់នេះ។

នៅអ៊ីតាលី ប្រជាជនរាប់រយនាក់បានជាប់នៅលើរថភ្លើង មិនអាចធ្វើដំណើរបាន ហើយព្រិលនៅតែបន្តធ្លាក់ ជាបន្តបន្ទាប់។

សហព័ន្ធ កាកបាទក្រហម និងអឌ្ឍច័ន្ទក្រហម អន្តរជាតិ សហភាពអឺរ៉ុប កំពុងដុតដៃដុតជើង ដោះស្រាយបញ្ហានេះ ក្នុងនោះអង្គការនេះបានផ្ដល់អាហារក្ដៅៗ ភួយ និងសម្ភារៈផ្សេងៗទៀត ដែលសរុបជាទឹកប្រាក់អស់ប្រមាណជាង១សែនដុល្លារអាមេរិកហើយ។

អាកាសធាតុត្រជាក់នេះ បានវាយប្រហារនៅអឺរ៉ុប ប្រមាណជា១ សប្ដាហ៍មកហើយ៕

ប្រែសម្រួល៖ យ៉ន សុភារិទ្ធ
ប្រភព៖ AFP
រូបភាព៖ BBC និង AP

The Grey មានអ្វីអស្ចារ្យ?

chin.sopheak — Fri, 03 Feb 2012 08:12:20 +0000

ខ្សែភាពយន្តដែលកំពុងឈរលើកំពូលតារាងចំណាត់ថ្នាក់ភាពយន្ត Box Office ដឹកនាំដោយលោក Joe Carnahan និងសម្ដែងដោយតារាល្បីលោក Liam Neeson ។ THE GREY នឹងមកបង្ហាញវត្តមាននៅព្រះរាជាណាចក្រកម្ពុជាក្នុងពេលដ៏ខ្លីខាងមុខ។

ជឿជាក់ថា ប្រិយមិត្តប្រាកដជាអន្ទះសា ចង់តាមដានជាក់ជាមិនខាន ដូច្នេះ Sabay សូមលើកយកនូវខ្សែរឿងសង្ខេបមកបង្ហាញជូនខាងក្រោម។

តោះ…! ទស្សនារូបភាពខ្លីៗ នៃរឿងនេះ ទាំងអស់គ្នាសិនចាំអានអត្ថបទបន្ដក្រោយ…!

ក្នុងតំបន់ អាឡាស្កាដ៏ត្រជាក់ក្រុមអ្នកធ្វើការនៅក្នុងរោងចក្រចម្រាញ់ប្រេងមួយ បានអនុញ្ញាតឲ្យឈប់សម្រាកចំនួនពីរសប្ដាហ៍។ ក្នុងរយៈពេលនេះ កម្មករមួយក្រុមបានធ្វើដំណើរតាមយន្តហោះត្រឡប់ទៅកាន់លំនៅឋានរបស់ពួកគេវិញ។ ជាអកុសល នៅពេលធ្វើដំណើរ យន្តហោះរបស់ពួកគេបានជួបប្រទះនឹងព្យុះព្រិលដ៏អាក្រក់ និងបានធ្លាក់ក្នុងព្រៃដ៏ជ្រៅ។

អ្នកធ្វើដំណើរជាច្រើនបានស្លាប់បាត់បង់ជីវិត លើកលែងតែកម្មករ ៨នាក់ប៉ុណ្ណោះដែលនៅរស់រានមានជីវិត និងប្រឹងប្រែងធ្វើដំណើរឆ្ពោះទៅរកកន្លែងដែលមានសុវត្ថិភាពក្រោមការដឹកនាំរបស់ John Ottway (សម្ដែងដោយ Liam Neeson) ។ នៅពេលដែលពួកគេ ដើររកអុស មកកម្ដៅ រាងកាយពីអាកាសធាតុត្រជាក់ ពួកគេបានជួបនូវចចកជាច្រើនក្បាល និងដឹងច្បាស់ថា ពួកគេកំពុងស្ថិតក្នុងដែនដីរបស់ចចក។

នៅយប់ដំបូងកម្មករទាំងអស់បានដុតភ្នក់ភ្លើងកម្ដៅរាងកាយ ពេលនោះមានចចកមួយហ្វូងបានចូលមកដល់ក្នុងបំណងប្រមាញ់ពួកគេជាចំណី ដូច្នេះពួកគេបានដាក់វេនគ្នាយាមម្នាក់ម្ដងៗ។ ប៉ុន្តែនៅព្រឹកថ្ងៃបន្ទាប់ សមាជិកម្នាក់ត្រូវបានចចកសម្លាប់ជាចំណី។

ក្នុងការបន្តដំណើរទៅមុខទៀត កម្មករទាំងនោះបានបន្តបាត់បង់ជីវិតម្ដងមួយៗ ដោយសារការប្រមាញ់ពីហ្វូងចចក អាកាសធាតុត្រជាក់ខ្លាំង និងភាពស្រេកឃ្លាន។ នៅចុងបញ្ចប់មានតែ John Ottway ម្នាក់ប៉ុណ្ណោះដែលនៅរស់ ប៉ុន្តែរូបគេត្រូវព័ទ្ធជុំជិតដោយហ្វូងចចកដ៏សាហាវ។

នៅពេលដែលក្ដីសង្ឃឹមត្រូវបាត់បង់ស្ទើរទាំងស្រុង ព្រោះតែជួបនឹងភាពទាល់ច្រកបែបនេះ តើមានអ្វីដែលត្រូវខ្លាចទៀត? Ottway បានសម្រេចចិត្តងើបឡើងតបតដើម្បីដង្ហើមចុងក្រោយ។ តើមនុស្សម្នាក់អាចទប់ទល់នឹងហ្វូងចចកធំៗមួយហ្វូងបានទេ? បើមិនអាច តើជោគវាសនារបស់ Ottway នឹងទៅជាយ៉ាងណា?

បើចង់ជ្រាបច្បាស់ កុំភ្លេចនៅថ្ងៃទី ១៧ កុម្ភៈ ខាងមុខ ចូលរួមទស្សនាទាំងអស់គ្នានៅ រោងភាពយន្ត The Cineplex ផ្សារទំនើបសូរិយា ជាន់ទី ៥ណា! សំបុត្រអាចរកជាវបានក្នុងតម្លៃ ៣ដុល្លារប៉ុណ្ណោះ នៅរោងភាពយន្តThe cineplex។

សម្រាប់ព័ត៌មានបន្ថែម ប្រិយមិត្តអាចទាក់ទងទៅកាន់ទូរស័ព្ទលេខ ០១៧ ៦៦៦ ២១០។

អត្ថបទ៖ សីហា

យុវតីTop Modelល្បីបំផុតរបស់វៀតណាម

huychanthary — Fri, 03 Feb 2012 08:11:20 +0000

នៅថ្ងៃទី ៣ ខែ កុម្ភៈនេះ គេហទំព័រ vietnamnet បានបង្ហាញរូបភាពថ្មីចុងក្រោយរបស់តារាម៉ូដែលវ័យជំទង់ល្បីបំផុតក្នុងប្រទេសវៀតណាមនាង Bao Tran ក្នុងឈុតសំលៀកបំពាក់វៀតណាម(ao dai) នៅក្នុងឧទ្យានមួយនៃទីក្រុងហូជីមិញ។

ក្នុងវ័យត្រឹមតែ ១១ ឆ្នាំ Bao Tran បានគ្រងមកុដ Miss Teen Award 2009 ដែលប្រារព្ធនៅក្នុងរោងមហោស្រពទីក្រុង ហូជីមិញកាលពីខែកញ្ញាឆ្នាំ ២០០៩។ ហើយក្នុងវ័យ ១៤ ឆ្នាំនេះ នាងបានក្លាយជាតារាម៉ូដែលដ៏ល្បីមួយរូបនៅក្នុងប្រទេសវៀតណាម។ Bao Tran មានឈ្មោះពេញថា Le Hoang Bao Tran។ នាងកើតនៅថ្ងៃទី ៣ ខែ ធ្នូ ឆ្នាំ ១៩៩៨។

នៅក្នុងការប្រកួត Miss Teen Award បេក្ខភាពចូលរួមប្រកួតទាំងអស់មិនមែនជាប់ជាម្ចាស់ជយលាភីដោយផ្អែកតែលើការប្រកួតហ្វេសសិននោះទេ តែត្រូវផ្អែកទៅលើសមត្ថភាពនិង ទេពកោសល្យផ្សេងៗរបស់ពួកគេ។ ដោយសារតែសមត្ថភាពបូករួមនឹងសម្រស់របស់ Le Hoang Bao Tran បានធ្វើឲ្យនាងក្លាយជាយុវតីម៉ូដែលដ៏អស្ចារ្យ។ បច្ចុប្បន្ននេះ Bao Tran មានកម្ពស់ ១៧២ សង់ទីម៉ែត្រ៕

ប្រែសម្រួល៖ថារី

ប្រភព៖ vietnamnet & hollywoodcelebgossips

លទ្ធផលក្ដៅៗថ្ងៃនេះ

chornteth — Fri, 03 Feb 2012 07:50:17 +0000

លទ្ធផល បញ្ចប់ពីរគូទៀត ក្រុម អាស៊ីអឺរ៉ុប ឈ្នះ កំពត ៦-០ ហើយ បាត់ដំបង ឈ្នះ ប៉ៃលិន ១-០។

ក្រុម ក្រសួងការពារជាតិ បានត្រឹមស្មើ ១-១ ជាមួយ គីរីវង់សុខសែនជ័យ ស្របពេលដែល ណាហ្គាខប ស្មើ ២-២ ជាមួយ ឆ្លាមសមុទ្រ។

គ្រាប់បាល់របស់ គីរីវង់សុខសែនជ័យ ស៊ុតដោយ ពេជ្រ ស៊ី នៅតង់ទី១ មុនការតាមស្មើ របស់កីឡាករ អៀង ពិសិដ្ឋ របស់ក្រសួងការពារជាតិ នៅចុងតង់ទី២។

រីឯ ខ្សែប្រយុទ្ធ វ័យក្មេង រស់ សំអឿន របស់ ក្រុម ឆ្លាម សមុទ្រ បានបើកការនាំមុខ ១-០ លើក្រុម ណាហ្គាខប នៅតង់ទី១ មុនការតាមស្មើ របស់ នាង ចេនឡា នៅដើមតង់ទី២។ បន្ទាប់មក ប្រាក់ ចាន់រតនា ស៊ុតឲ្យ ណហ្គាខប នាំមុខ ២-១ វិញ តែ រស់ សំអឿន បានបន្ថយពិន្ទុ ណាហ្គាខប ពីរពិន្ទុ ដោយការស៊ុតតាមស្មើ ២-២ រហូតលដ់ចប់ការប្រកួត នៅស្តាតចាស់។

ជារួមមក ក្រុម ការពារជាតិ គីរីវង់សុខសែនជ័យ ឆ្លាមសមុទ្រ និង ណាហ្គាខបទទួលបានម្នាក់មួយពិន្ទុនៅក្នុងប្រកួតទី២របស់ខ្លួនបូកនឹងជ័យជម្នះនៃការប្រកួតទី១។

ពូល A
ក្រុម	ចំ.ប្រកួត	ឈ្នះ	ចាញ់	ស្មើ	គ្រាប់ស៊ុត	គ្រាប់គេស៊ុត	ចំណេញ	ពិន្ទុ
ក្លិបណាហ្គាខប	2	1	0	1	11	2	9	4
ក្លិបឆ្លាមសមុទ្រ	2	1	0	1	7	4	3	4
ខេត្តបាត់ដំបង	2	1	1	0	3	5	-2	3
ខេត្តប៉ៃលិន	2	0	2	0	0	10	-10	0
ពូល B
ក្រុម	ចំ.ប្រកួត	ឈ្នះ	ចាញ់	ស្មើ	គ្រាប់ស៊ុត	គ្រាប់គេស៊ុត	ចំណេញ	ពិន្ទុ
ក្រសួងការពារជាតិ	2	1	0	1	6	1	5	4
គីរីវង់សុខសែនជ័យ	2	1	0	1	4	3	1	4
ព្រះវិហារ (សា. វិទ្យាល័យអាស៊ីអឺរ៉ុប)	2	1	1	0	6	5	1	3
ខេត្តកំពត	2	0	2	0	2	9	-7	0
ពូល C
ក្រុម	ចំ.ប្រកួត	ឈ្នះ	ចាញ់	ស្មើ	គ្រាប់ស៊ុត	គ្រាប់គេស៊ុត	ចំណេញ	ពិន្ទុ
ក្លិបបៀលប្រាយូណាយធីត	1	1	0	0	9	2	7	3
ព្រះខ័នរាជ	1	1	0	0	8	1	7	3
ខេត្តស្ទឹងត្រែង	1	0	1	0	2	9	-7	0
ខេត្តកោះកុង	1	0	1	0	1	8	-7	0
ពូល D
ក្រុម	ចំ.ប្រកួត	ឈ្នះ	ចាញ់	ស្មើ	គ្រាប់ស៊ុត	គ្រាប់គេស៊ុត	ចំណេញ	ពិន្ទុ
ភ្នំពេញក្រោន	1	1	0	0	16	0	16	3
អគ្គស្នងការនគរបាលជាតិ	1	1	0	0	1	0	1	3
បឹងកេត (ខេត្តកំពង់ចាម)	1	0	1	0	0	1	-1	0
ខេត្តក្រចេះ	1	0	1	0	0	16	-16	0

ការប្រកួតរវាង បាត់ដំបង(លឿង)និង ឆ្លាមសមុទ្រ(ក្រហម) កាលថ្ងៃពុធ

រាយការណ៍៖ ប៉ែន សុផាន់ណា

Sabay News Online

Ngo Luc គូស​គំនូរ​លើ​ដង​ខ្លួន​តារា​ម៉ូដែល

​ដោះដូរ​កីឡាករ​អ៊ឺរ៉ុប​បិទ​ទ្វារ កម្ពុជា​​​ដូច​គ្នា​ដែរ

​វះកាត់ដូរសរីរាង្គ ៦ មុខ​ អត់​បញ្ហា!

ចិន ការពារអ៊ីរ៉ង់

យ៉ាស…សៀរ៉ាចេះកាត់ដេរទៀត!

១៦​កុម្ភៈ តារា​ៗ​​ណាត់​ជួបគ្នា​នៅ​​​កោះពេជ្រ

អាកាស​ធាតុ​ត្រជាក់ ​​សម្លាប់​មនុស្ស​ជាង​១៦០​នាក់​​នៅ​អឺរ៉ុប​

The Grey​ មាន​អ្វី​អស្ចារ្យ?

យុវតីTop Modelល្បី​បំផុត​របស់​វៀតណាម

លទ្ធផលក្ដៅៗ​ថ្ងៃ​នេះ