ជ្រកម្លប់ ខុសច្បាប់?

2018-08-03 04:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការមិនគោរពច្បាប់ចរាចរណ៍នៅកម្ពុជានៅតែកើតមានរាល់ថ្ងៃ ពិសេសនៅក្នុងរាជធានីភ្នំពេញដែលទីតាំងប្រជុំមនុស្សរស់នៅច្រើន។ នៅរៀងរាល់ថ្ងៃ មិនថាពេលណា ថ្ងៃណា ការល្មើសច្បាប់ និងគ្រោះថ្នាក់នៅតែកើតមានគ្រាន់តែតិច ឬច្រើនតែប៉ុណ្ណោះ។ ការល្មើសច្បាប់ចរាចរណ៍ និងគ្រោះថ្នាក់ទាំងនោះភាគច្រើនគឺកើតចេញពីកត្តាមនុស្សជាអ្នកបង្កឡើង។

ក្នុងរូប ៣សន្លឹកនេះវាបង្ហាញពីការល្មើសច្បាប់ចរាចរណ៍ដោយឈប់លើសគំនូសថ្មើរជើងមួយនៅរង្វង់មូលនាងគង្ហីញ ដោយអ្នកល្មើសភាគច្រើនគឺអ្នកជិះម៉ូតូ។ ការល្មើសច្បាប់ចរាចរណ៍នេះអាចមកពីអ្នកជិះម៉ូតូទាំងនោះយល់ថានៅទីតាំងល្មើសនោះមានម្លប់ត្រជាក់ ឯនៅទីតាំងស្របច្បាប់មានកម្ដៅថ្ងៃក្ដៅ ដែលនេះជាហេតុឲ្យពួកគាត់ជិះមិនឈប់នៅទីតាំងដែលស្របច្បាប់។

ករណីការឈប់ ឬចត លើសគំនូសក្នុងច្បាប់ចរាចរណ៍ផ្លូវគោកត្រង់មាត្រ៨៨ បានចែងថា ការឈប់ ឬចតដោយរំលោភ ឬរំខាន បទល្មើសនេះត្រូវផ្ដន្ទាទោសពិន័យជាប្រាក់ ៣ពាន់រៀលសម្រាប់ទោចក្រ ឬត្រីចក្រយានយន្ត ៥ពាន់រៀល សម្រាប់យានយន្តធុនស្រាល និង១ម៉ឺនរៀលសម្រាប់យានយន្តធុនធ្ងន់។

តើមូលហេតុអ្វីបានជាការល្មើសនេះនៅតែកើតមានសឹងរាល់ពេល និងគ្រប់ទីកន្លែង? ដោយសារតែច្បាប់ផាកពិន័យនៅមានកម្រិតទាបនៅឡើយ! ដោយសារតែមិនមានមន្ត្រីប៉ូលីសចរាចរមិនឈរជើងនៅទីនោះ! ដោយសារអ្នកល្មើសទាំងនោះមិនដឹងពីច្បាប់ចរាចរណ៍ ឬដឹងហើយនៅតែបំពាន?

សូមគោរពច្បាប់ចរាចរណ៍ឲ្យបានគ្រប់គ្នា!

អត្ថបទ៖ លន ហ្សាឌីណា