រកឃើញមូលហេតុពិសេស១ ក្រសួងប្រកាសលទ្ធផលបាក់ឌុបមុនថ្ងៃកំណត់

2018-09-06 03:55:46
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការបញ្ជាក់របស់ក្រសួងអប់រំយុវជន និងកីឡា ឲ្យដឹងថា ការប្រកាសលទ្ធផលនេះ ធ្វើឡើងមុនកាលបរិច្ឆេទកំណត់ដោយសារដំណើរការកំណែ និងដំណើរការស្រង់ បូកពិន្ទុ និងផ្ទៀងផ្ទាត់ពិន្ទុតាមប្រព័ន្ធកុំព្យូទ័របានប្រព្រឹត្តទៅដោយរលូន និងតម្លាភាពប្រកបដោយស្មារតីយកទុកដាក់និងទទួលខុសត្រូវខ្ពស់ពីសំណាក់ប្រធាន អនុប្រធាន និងសមាជិកអនុគណៈកម្មការទាំងអស់ដែលពាក់ព័ន្ធ។

ក្រសួងអប់រំ នឹងធ្វើការប្រកាសផ្សព្វផ្សាយលទ្ធផលប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា សម័យប្រឡង៖ ២០ សីហា ២០១៨ នៅថ្ងៃទី០៩ ខែកញ្ញា ឆ្នាំ២០១៨ សម្រាប់រាជធានីភ្នំពេញ និងខេត្តកណ្ដាល និងថ្ងៃទី១០ ខែកញ្ញា ឆ្នាំ២០១៨ សម្រាប់ខេត្តផ្សេងៗទៀត តាមរយៈទំព័រហ្វេសប៊ុកផ្លូវការក្រសួង។ ដោយមុនការផ្លាស់ប្ដូរថ្ងៃប្រកាសនេះ ក្រសួងគ្រោងចេញលទ្ធផលនៅថ្ងៃទី១១ កញ្ញា សម្រាប់រាជធានីភ្នំពេញ និងខេត្តកណ្ដាល និងថ្ងៃទី១២ កញ្ញា សម្រាប់ខេត្តផ្សេងៗទៀត។

ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ បានមានប្រសាសន៍ ដោយមានជំនឿជឿជាក់ថាចំនួនសិស្សដែលបានចូលរួមប្រឡងមធ្យមសិក្សាឆ្នាំនេះ នឹងទទួលបាននិទ្ទេស A ច្រើនជាងមុន ដោយកាលពីឆ្នាំមុនមានត្រឹមតែ ៤២៤នាក់ប៉ុណ្ណោះ។

សម្រាប់ពិន្ទុនិទ្ទេសA ត្រូវបានក្រសួងអប់រំកំណត់៤២៧ពិន្ទុ ដែលស្មើនឹង៩០ភាគរយ និទ្ទេសB ត្រូវបានកំណត់៣៨០ពិន្ទុ ដែលស្មើ៨០ភាគរយ និទ្ទេសC ត្រូវបានកំណត់៣៣២ពិន្ទុ ដែលស្មើ៧០ភាគរយ និទ្ទេសD ត្រូវបានកំណត់ ២៨៥ពិន្ទុ ស្មើនឹង៦០ភាគរយ និងនិទ្ទេសE ត្រូវបានកំណត់២៣៧ពិន្ទុ ដែលស្មើ៥០ភាគរយ នៃពិន្ទុប្រឡងអតិបរមា៥០០ពិន្ទុ៕

អត្ថបទ៖ វឌ្ឍនៈ