មកដឹងចំណុចពិសេសៗ iPhone ក្បាលឆកទាំងបី ប្រកាសចេញយប់ស្អែក
- 2018-09-11 02:13:35
- ចំនួនមតិ 0 | ចំនួនចែករំលែក 0
មកដឹងចំណុចពិសេសៗ iPhone ក្បាលឆកទាំងបី ប្រកាសចេញយប់ស្អែក
ចន្លោះមិនឃើញ
យប់ថ្ងៃទី ១២ ខែកញ្ញាឈានចូលថ្ងៃទី ១៣ កម្មវិធីប្រកាសចេញ iPhone ជំនាន់ថ្មីរបស់ Apple នឹងចាប់ផ្ដើមឡើងនៅសាលមហោស្រព Steve Jobs ដែលស្ថិតនៅក្នុងទីស្នាក់ការថ្មីរបស់ Apple។ ខាងក្រោមនេះជាចំណុចពិសេសៗមួយចំនួន ដែលគេរំពឹងថានឹងមានលើ iPhone ឆ្នាំ ២០១៨ ៖
១. ឈ្មោះ
គេរំពឹងថា iPhone ជំនាន់ថ្មីនឹងមានដល់ទៅបីប្រភេទ មានពីរប្រភេទប្រើប្រាស់អេក្រង់ OLED ទំហំ ៥,៨ អ៊ីញ និង ៦,៥ អ៊ីញ ដែលគេជឿជាក់ថាវាមានឈ្មោះ iPhone Xs និង iPhone Xs Max។ ចំណែកមួយប្រភេទទៀតប្រើប្រាស់អេក្រង់ LCD ទំហំ ៦,១ អ៊ីញ មានឈ្មោះមិនទាន់ច្បាស់លាស់នៅឡើយ។ កន្លងមកគេបានហៅ iPhone អេក្រង់ LCD ថាជា iPhone 9។
តាមរូបភាពផ្លូវការនៃ iPhone Xs ដែលបានលេចធ្លាយកន្លងមក គេអាចឃើញពីជម្រើសពណ៌ថ្មី គឺពណ៌មាស ខណៈដែល iPhone X មានត្រឹមជម្រើសពណ៌ស និងខ្មៅប៉ុណ្ណោះ។
២. រចនាបថ
iPhone ទាំងបីប្រភេទនឹងមានរចនាបថអេក្រង់ឆក លាតពេញផ្ទៃដូចជា iPhone X អ៊ីចឹងដែរ។ តួខ្លួនមានស្រោបដោយសារធាតុកញ្ចក់ដូចមុន ប៉ុន្តែសម្រាប់ iPhone 9 មានតួខ្លួនផលិតពីសារធាតុអាលុយមីញ៉ូម មិនមែនប្រើដែកអ៊ីណុកដូច iPhone Xs និង Xs Max នោះទេ។
៣. បន្ទះឈីប
ត្រកូល iPhone ទាំងបីនឹងជាស្មាតហ្វូនដំបូងគេក្នុងលោកដែលមានប្រើប្រាស់បន្ទះឈីបតូចបំផុតទំហំត្រឹម ៧ ណាណូម៉ែត្រ ជាបន្ទះឈីប A12។ iPhone 9 ក៏នឹងអាចទ្រាំទ្រការប្រើប្រាស់ស៊ីមបានរហូតដល់ពីរផងដែរ ហើយនឹងមានលក់ផ្ដាច់មុខតែនៅប្រទេសចិនប៉ុណ្ណោះ។
៤. កាមេរ៉ា
លក្ខណៈសម្បត្តិនៃកាមេរ៉ារបស់ iPhone ទាំងបី មិនមានលេចធ្លាយដំណឹងជាក់លាក់ច្រើនប៉ុន្មានឡើយ។ គេជឿជាក់ថា iPhone 9 នឹងមានបំពាក់កាមេរ៉ាត្រឹមមួយគ្រាប់ ចំណែក iPhone Xs និង Xs Max មានកាមេរ៉ាពីរគ្រាប់ដូច iPhone X ដែរ។ iPhone ទាំងបីក៏មានបំពាក់ប្រព័ន្ធកាមេរ៉ាដែលអាចស្កេនមុខដើម្បីដោះសោបានទៀតផង។
៥. តម្លៃ និងកាលបរិច្ឆេទចេញលក់
iPhone 9 អាចនឹងមានតម្លៃចាប់ពី ៦៩៩ ដុល្លារ និងពន្យារពេលចេញលក់ដល់ខែវិច្ឆិកាដោយសារបញ្ហានៃការផលិត។ ចំណែក iPhone Xs អាចមានតម្លៃចាប់ពី ៧៩៩ ដុល្លារ និង iPhone Xs Max អាចមានតម្លៃចាប់ពី ៩៩៩ ដុល្លារ ដែលចេញលក់នៅថ្ងៃទី ២១ ខែកញ្ញាដូចគ្នា។
បញ្ជាក់ថាខាងលើនេះ ជាការបូកសរុបនូវដំណឹងលេចធ្លាយគួរឲ្យទុកចិត្តទាក់ទងនឹង iPhone ទាំងបី ដោយមិនមែនជាដំណឹងផ្លូវការចេញពី Apple ផ្ទាល់នោះទេ។ មួយថ្ងៃទៀតចម្ងល់ទាំងឡាយពី iPhone ឆ្នាំ ២០១៨ នឹងត្រូវបង្ហាញជាផ្លូវការដោយ Apple៕