លោកវេជ្ជបណ្ឌិត Beat Richner លាចាកលោកទៅ ចុះគន្ធបុប្ផាព្យាបាលមិនយកលុយទៀតទេ?

2018-09-11 02:33:20
ចំនួនមតិ 0 | ចំនួនចែករំលែក 0

ចន្លោះមិនឃើញ

មានសំណួរជាច្រើនពីប្រជាពលរដ្ឋសួរថា តើមន្ទីរពេទ្យគន្ធបុប្ផានៅតែព្យាបាលកុមារកម្ពុជា ដោយមិនគិតថ្លៃដដែលឬយ៉ាងណា?

សូមបញ្ជាក់ថានៅដើមឆ្នាំ២០១៨ រាជរដ្ឋាភិបាលបានប្រកាសថា ការព្យាបាលកុមារកម្ពុជានៅតែមិនយកថវិកាដូចដើម។ សម្ដេចតេជោនាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍ថា នឹងបង្កើតនូវមូលនិធិមួយទៀត សម្រាប់ជួយមន្ទីរពេទ្យគន្ធបុប្ផា ដែលមានឈ្មោះថា (មូលនិធិគន្ធបុប្ផាកម្ពុជា) ដោយសម្ដេចនឹងធ្វើ ជាប្រធានកិត្តិយសតែម្ដង។

«មូលនិធិគន្ធបុប្ផាកម្ពុជា» បានចាប់ផ្ដើមបង្កើតឡើងជាផ្លូវការកាលពីខែ មេសា ឆ្នាំ ២០១៨ កន្លងទៅ។ គិតត្រឹមថ្ងៃទី ២៧ ខែ សីហា ឆ្នាំ ២០១៨ មូលនិធិគន្ធបុប្ផាកម្ពុជា ទទួលបានសមាជិកដែលបានចូលរួមបរិច្ចាគសរុបចំនួន ៥១ ២៨១ នាក់ និងគិតជាទឹកប្រាក់ បានចំនួនជិត៥លានដុល្លារ និង ប្រមាណជា ៤ពាន់ ១១៥លាន រៀល។

សម្ដេចតេជោ ហ៊ុន សែន បានឲ្យដឹងថា បច្ចុប្បន្ននេះ មូលនិធិគន្ធបុប្ផាគឺ បានដើរតួនាទីយ៉ាងសំខាន់ ក្នុងការប្រមូលមូលនិធិ ផ្ដល់ជូនពេទ្យគន្ធបុប្ផា ដើម្បីជួយព្យាបាលកុមារកម្ពុជារាប់លាននាក់នៅកម្ពុជា។ ដូច្នេះទោះបីជាអវត្តមានលោកវេជ្ជបណ្ឌិត Beat Richner ក៏មន្ទីរពេទ្យមួយនេះនៅតែបើកបម្រើជូនកុមារកម្ពុជាដោយមិនគិតថ្លៃ។

មន្ទីរពេទ្យ គន្ធបុប្ផា ដែលមានវត្តមាននៅអំឡុងទសវត្សឆ្នាំ ១៩៧០ ហើយត្រូវបានបិទទ្វារទៅវិញនៅ ពេលខ្មែរក្រហមឡើងកាន់អំណាច និង បានចាប់ដំណើរការឡើងវិញនៅឆ្នាំ ១៩៩២ ក្រោមព្រះ រាជ្យតម្រិះរបស់ព្រះបរមរតនកោដ្ឋ ព្រះបាទសម្ដេច ព្រះនរោត្ដម សីហនុ អតីតព្រះមហាក្សត្រខ្មែរ និងលោកវេជ្ជបណ្ឌិត Beat Richner ជនជាតិស្វីសជាស្ថាបនិក។

លោកវេជ្ជបណ្ឌិត Beat Richner បានទទួលមរណភាពក្នុងជន្មាយុជន្មាយុ៧១ឆ្នាំ នៅប្រទេសស្វីស ដែលជាប្រទេសកំណើតរបស់លោក បន្ទាប់ពីលោកវេជ្ជបណ្ឌិតបានធ្លាក់ខ្លួនឈឺអស់រយៈពេលជាច្រើនខែមកហើយ។ ការបាត់បង់បិតាសង្គ្រោះជីវិតកុមារកម្ពុជា បានធ្វើឲ្យពលរដ្ឋខ្មែរទូទាំងប្រទេសសោកសង្រេង និងស្រណោះជាពន់ពេក នូវការលះបង់ដ៏ធំធេងរបស់លោកវេជ្ជបណ្ឌិតមកលើកូនខ្មែរ។

ទោះបីជាលោកវេជ្ជបណ្ឌិត បានឃ្លាតឆ្ងាយលែងវិលត្រឡប់ តែកូនខ្មែរគ្រប់រូបនៅតែចងចាំមិនភ្លេច ចំពោះការលះបង់ទាំងកម្លាំងកាយ ទាំងថវិកា និងតែងរិះរកគ្រប់វិធី ដើម្បីប្រមូលមូលនិធិមន្ទីរពេទ្យមួយនេះឲ្យដំណើរការរហូតមកដល់សព្វថ្ងៃ៕

អត្ថបទ៖ វឌ្ឍនៈ