ទម្លាយតម្លៃសិក្សាថ្នាក់បរិញ្ញាបត្រ នៅសាកលវិទ្យាល័យល្បីៗបំផុត ក្នុងប្រទេសកម្ពុជា
- 2018-09-11 08:46:07
- ចំនួនមតិ 0 | ចំនួនចែករំលែក 0
ទម្លាយតម្លៃសិក្សាថ្នាក់បរិញ្ញាបត្រ នៅសាកលវិទ្យាល័យល្បីៗបំផុត ក្នុងប្រទេសកម្ពុជា
ចន្លោះមិនឃើញ
មានគ្រឹះស្ថានឧត្ដមសិក្សាជាច្រើន កំពុងបណ្ដុះបណ្ដាលជំនាញ ដ៏សម្បូរបែបទៅកាន់និស្សិត ដើម្បីក្លាយជាធនធានមនុស្សពោរពេញដោយសមត្ថភាព ក្នុងការចូលរួមអភិវឌ្ឍប្រទេសជាតិ។ ថ្ងៃនេះ Sabay សូមណែនាំសាកលវិទ្យាល័យល្បីៗមួយចំនួន ក្នុងរាជធានីភ្នំពេញ មានទាំងគ្រឹះស្ថានឧត្ដមសិក្សាសាធារណៈ និងឯកជន ព្រមទាំងតម្លៃសិក្សាថ្នាក់បរិញ្ញាបត្រ ក្នុងឆ្នាំសិក្សាថ្មីនេះ។
១. សាកលវិទ្យាល័យភូមិន្ទភ្នំពេញ
ចំពោះតម្លៃសិក្សាថ្នាក់បរិញ្ញាបត្រនៅសាកលវិទ្យាល័យសាធារណៈដ៏ល្បីល្បាញមួយនេះ គ្រប់មុខជំនាញទាំងអស់ ក្នុង១ឆ្នាំនិស្សិតត្រូវបង់ចន្លោះពី ៣០០ ទៅ ៥០០ដុល្លារ។ លើកឡើងតែមុខជំនាញខ្លះដល់៦០០ដុល្លារដូចជា៖ វិស្វកម្មទូរគមនាគមន៍ និងអេឡិចត្រូនិក វិស្វកម្ម ជីវសាស្ត្រ វិស្វកម្មបច្ចេកវិទ្យាព័ត៌មានជាដើម។ ក្នុងនោះជំនាញសិក្សាល្បីៗរួមមាន៖ អក្សរសាស្ត្រខ្មែរ ទេសចរណ៍ វិស្វកម្ម ប្រវត្តិវិទ្យា រូបវិទ្យា គីមីវិទ្យា គណិតវិទ្យា ចិត្តវិទ្យា ជាដើម។
២. សាកលវិទ្យាល័យជាតិគ្រប់គ្រង
សាកលវិទ្យាល័យជាតិគ្រប់គ្រង ឬហៅកាត់ថា (NUM) ក៏ជាគ្រឹះស្ថានឧត្ដមសិក្សាដ៏ចំណាស់មួយក្នុងប្រទេសកម្ពុជា។ ចំណែកឯតម្លៃសិក្សាថ្នាក់បរិញ្ញាបត្រវិញ ក្នុង១ឆ្នាំនិស្សិតត្រូវបង់ចន្លោះពី ៥០០ ទៅ៥៤០ដុល្លារ។ លើកលែងតែជំនាញអក្សរសាស្ត្រអង់គ្លេស និងគ្រប់គ្រងពាណិជ្ជកម្មអន្តរជាតិប៉ុណ្ណោះ ដែលមានតម្លៃ១ ២០០ដុល្លារ។
៣. សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច
ការសិក្សានៅគ្រឹះស្ថានឧត្ដមសិក្សាសាធារណៈដ៏ចំណាស់មួយនេះវិញ និស្សិតត្រូវបង់ ៤៨០ដុល្លារក្នុងមួយឆ្នាំលើគ្រប់ជំនាញ លើកលែងតែថ្នាក់សិក្សាអន្តរជាតិប៉ុណ្ណោះ។ ចំពោះមុខជំនាញ ផ្ដោតសំខាន់ជាងគេនៅក្នុងសាកលវិទ្យាល័យនេះ មានដូចជា ជំនាញនីតិសាស្ត្រ សេដ្ឋកិច្ច និងការអប់រំពាណិជ្ជកម្ម ជាដើម។
៤. សាកលវិទ្យាល័យអាមេរិកកាំងភ្នំពេញអន្តរជាតិ (AUPP)
សាកលវិទ្យាល័យអាមេរិកាំងភ្នំពេញ (AUPP) គឺជាគ្រឹះស្ថានឧត្ដមសិក្សាអន្តរជាតិលំដាប់ទី១ នៅកម្ពុជាចាប់ផ្ដើមទទួលនិស្សិតឱ្យចូលរៀន សម្រាប់ឆ្នាំសិក្សាថ្មី ២០១៧-២០១៨ ហើយ។ វគ្គសិក្សាថ្មីនឹងចាប់ផ្ដើមចូលរៀននៅថ្ងៃទី ១ ខែ តុលា ឆ្នាំ២០១៨ តែម្ដង។
បើតាមអ្នកនាំពាក្យសាកលវិទ្យាល័យអាមេរិកកាំងភ្នំពេញអន្តរជាតិ (AUPP) ឲ្យដឹងថា ចំពោះការបង់ថ្លៃសិក្សា គឺមានចែកចេញជា២ស្ដង់ដាររួមមាន៖
១. កម្មវិធីសិក្សាបរិញ្ញាបត្រ១៖ មានន័យថាក្រោយបញ្ចប់ការសិក្សានិស្សិតនឹងទទួលបានសញ្ញាបត្រ១ ដែលចេញដោយសាកលវិទ្យាល័យភ្នំពេញអន្តរជាតិ។ ១ឆ្នាំនិស្សិតត្រូវបង់ ៦០០០ដុល្លារក្នុង១ឆ្នាំ។
២. កម្មវិធីសិក្សាថ្នាក់បរិញ្ាបត្រ២៖ មានន័យថាក្រោយបញ្ចប់ការសិក្សានិស្សិតនឹងទទួលបានសញ្ញាបត្រ២ ដែលសញ្ញាបត្រ១ចេញដោយ (AUPP) និងសញ្ញាបត្រមួយទៀតចេញសាកលវិទ្យាល័យអាមេរិក ដែលមានស្នាក់ការនៅសហរដ្ឋអាមេរិក។ និស្សិតត្រូវបង់ថ្លៃសិក្សា១ឆ្នាំ ៩០០០ដុល្លារ។
ជាមួយគ្នានោះ AUPP ក៏បានផ្ដល់អាហារូបករណ៍ដល់សិស្សឆ្នើមនិទ្ទេស A និង B ព្រមជាមួយនឹងអាហារូបករណ៍រហូតដល់ ១០០% សម្រាប់សិស្សឆ្នេីមដែលប្រឡងជាប់បាក់ឌុប និងមិនមានលទ្ធភាពគ្រប់គ្រាន់សម្រាប់ការបង់ថ្លៃសិក្សានៅ AUPP។
៥. សាកលវិទ្យាល័យបញ្ញាសាស្ត្រកម្ពុជា
ចំពោះការសិក្សាថ្នាក់បរិញ្ញាបត្រឆ្នាំសិក្សាថ្មីនេះ នៅសាកលវិទ្យាល័យឯកជនដ៏ល្បីល្បាញនេះវិញ និស្សិតត្រូវបង់ជា Term ក្នុងនោះមួយឆ្នាំមាន៣ Term។ Termទី១ត្រូវបង់៣១៨ដុល្លារ Term ទី២ត្រូវបង់៣១៨ដុល្លារ និងTermទី៣ត្រូវបង់ ២៣៨ដុល្លារ។ និស្សិតត្រូវសិក្សារយៈពេល៤ឆ្នាំ និងបង់ថ្លៃបែបនេះរហូតដល់បញ្ចប់ថ្នាក់បរិញ្ញាបត្រ។
៦. សាកលវិទ្យាល័យកម្ពុជា
ចំពោះការបង់ថ្លៃសិក្សានៅសាកលវិទ្យាល័យដ៏ធំមួយនេះ និស្សិតត្រូវបង់តាមមុខវិជ្ជា។ ក្នុងនោះ១មុខតម្លៃ ៩០ដុល្លារ ដែលមានទាំងអស់៤៥មុខវិជ្ជាត្រូវសិក្សារយៈពេល៤ឆ្នាំ។ ដូច្នេះនិស្សិតត្រូវចំណាយ ៤០៥០ដុល្លារសម្រាប់ថ្នាក់បរិញ្ញាបត្រ។
៧.សាកលវិទ្យាល័យហ្សាម៉ាន់
ចំណែកគ្រឹះស្ថានឧត្ដមសិក្សាឯកជនដ៏ល្បីល្បាញនេះ និស្សិតត្រូវបង់ថ្លៃសិក្សាចន្លោះពី ៣ ០០០ ទៅ៤ ០០០ដុល្លារក្នុង១ឆ្នាំ អាស្រ័យទៅតាមជំនាញដែលជ្រើសរើស។
៨. សាកលវិទ្យាល័យន័រតុន
ន័រតុន ជាសាកលវិទ្យាល័យដ៏ធំ និងល្បីល្បាញមួយក្នុងរាជធានីភ្នំពេញ។ ចំពោះតម្លៃសិក្សាថ្នាក់បរិញ្ញាបត្រនិស្សិតត្រូវបង់ចន្លោះពី ៥០០ ទៅ ៧០០ដុល្លារក្នុងមួយឆ្នាំ។
៩. សាកលវិទ្យាល័យបៀលប្រាយ
បៀលប្រាយ ឬហៅកាត់ជាភាសាអង់គ្លេស (BBU) ជាសាកលវិទ្យាល័យឯកជន មួយដ៏ល្បីល្បាញក្នុងចំណោមសាកលវិទ្យាល័យធំៗ នៅប្រទេសកម្ពុជា។ ជាពិសេសគ្រឹះស្ថានឧត្ដមសិក្សាឯកជនដ៏ធំនេះ មាន ៧សាខាផ្សេងទៀត ក្រៅពីរាជធានីភ្នំពេញ ទូទាំងប្រទេសទៀតផង។ ចំណែកឯតម្លៃសិក្សាថ្នាក់បរិញ្ញាបត្រ ក្នុង១ឆ្នាំនិស្សិតត្រូវបង់ចន្លោះពី ៤០០ ទៅ ៦០០ដុល្លារប៉ុណ្ណោះ។ ចំពោះកម្មវិធីសិក្សាវិញរួមមាន៖ ថ្នាក់បរិញ្ញាបត្រ បរិញ្ញាបត្ររង បរិញ្ញាបត្រជាន់ខ្ពស់ និងរហូតដល់ថ្នាក់បណ្ឌិត៕