យប់នេះ ក្រៅពី iPhone អាចមានផលិតថ្មីច្រើនទៀតបង្ហាញខ្លួន
- 2018-09-12 03:26:39
- ចំនួនមតិ 0 | ចំនួនចែករំលែក 0
យប់នេះ ក្រៅពី iPhone អាចមានផលិតថ្មីច្រើនទៀតបង្ហាញខ្លួន
ចន្លោះមិនឃើញ
កម្មវិធីប្រកាសចេញផលិតផលដ៏ធំប្រចាំឆ្នាំរបស់ Apple នឹងចាប់ផ្ដើមនៅវេលាយប់ម៉ោង ១២ ថ្ងៃទី ១២ ឈានចូលថ្ងៃទី ១៣ ខែកញ្ញានេះ។ គេរំពឹងថាក្រៅ iPhone នៅមានផលិតផលច្រើនទៀតដែល Apple នឹងប្រកាសចេញ។
១. iPhone
iPhone យប់នេះនឹងចេញថ្មីចំនួន ៣ ម៉ូដែល ដោយមានប្រភេទអេក្រង់ទំហំ ៥,៨ អ៊ីញ និង ៦,៥ អ៊ីញ ប្រើប្រាស់អេក្រង់ OLED និងមួយទៀតប្រើអេក្រង់ LCD ទំហំ ៦,១ អ៊ីញ។ រូបរាងផ្លូវការរបស់ iPhone អេក្រង់ OLED បានចេញផ្សាយដោយវិបសាយ 9to5Mac ដែលមានតួខ្លួនពណ៌មាស ហើយគេជឿថាវាមានឈ្មោះ iPhone Xs។
២. Apple Watch
Apple Watch ជំនាន់ទីបួននឹងលេចរូបរាងឡើងនៅថ្ងៃទី ១២ ខែកញ្ញានេះ។ តាមការចេញផ្សាយរបស់ 9to5Mac គេអាចដឹងបានថានាឡិកាវៃឆ្លាតជំនាន់ថ្មីនេះមានអេក្រង់ទំហំធំជាងមុន និងមានតួខ្លួនពណ៌មាសស៊ីគ្នាជាមួយ iPhone Xs។
៣. ប្រព័ន្ធប្រតិបត្តិការ
ប្រព័ន្ធប្រតិបត្តិការ iOS 12, Watch OS 5 និង tvOS 12 នឹងត្រូវបញ្ចេញឲ្យប្រើប្រាស់ជាសាធារណៈ ស្របពេលគ្នានឹងការប្រកាសចេញផលិតផលថ្មីនាយប់នេះ។
៤. AirPower
AirPower បានប្រកាសចេញតាំងពីខែកញ្ញាឆ្នាំ ២០១៧ ប៉ុន្តែមកទល់ពេលនេះនៅមិនទាន់ចេញលក់លើទីផ្សារនៅឡើយទេ។ នៅយប់នេះគេរំពឹងថា Apple នឹងប្រកាសចេញពីកាលបរិច្ឆេទចេញលក់ផ្លូវការនៃឆ្នាំងសាកឥតខ្សែមួយនេះ។
៥. កាស AirPod ជំនាន់ថ្មី
AirPod ជាផលិតថ្មីដ៏ពេញនិយមមួយរបស់ Apple ដែលបានចាប់កំណើតរយៈពេលពីរឆ្នាំមកហើយ។ ដូចនេះគេយល់ថានេះជាពេលវេលាសមស្របមួយក្នុងការប្រកាសចេញ AirPod ជំនាន់ថ្មី ដែលមានមុខងារថ្មីៗបន្ថែមទៀតជាច្រើន។
៦. iPad
សារព័ត៌មាន Bloomberg បានចេញផ្សាយកាលពីខែវិច្ឆិកាឆ្នាំ ២០១៧ ថា Apple កំពុងសម្ងំផលិត iPad ដែលមានបំពាក់មុខងារមួយចំនួនរបស់ iPhone X ដូចជា Face ID, គ្មានប៊ូតុង Home និងមានអេក្រង់លាតពេញផ្ទៃ។ Bloomberg បានលើកឡើងថា iPad នេះអាចនឹងប្រកាសចេញនៅឆ្នាំ ២០១៨ ហើយវាទំនងជាបង្ហាញមុខយប់នេះ។
រំឭកថាកម្មវិធីប្រកាសចេញផលិតផលថ្មីរបស់ Apple នឹងចាប់ផ្ដើមឡើងនៅវេលាម៉ោង ១២ រំលងអាធ្រាត្រ ដែលនឹងមានធ្វើការផ្សាយផ្ទាល់លើវិបសាយរបស់ក្រុមហ៊ុន Apple ផ្ទាល់៕