មកដឹងចំណែកទីផ្សារលក់ចេញ iPhone បួនជំនាន់ មុនចេញសេរ៊ី ២០១៨ យប់នេះ

2018-09-12 13:35:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បានណែនាំត្រកូលស្មាតហ្វូនអេក្រង់ធំ ដោយបន្ថែមឈ្មោះ Plus កាលពីឆ្នាំ ២០១៤ ហើយមានជាបន្តបន្ទាប់នៅម៉ូឌែលក្រោយៗ។ យោងតាមក្រាបបង្ហាញទិន្នន័យចំណែកទីផ្សារពី Mixpanel បង្ហាញយ៉ាងច្បាស់ថាអតិថិជនរមែងនិយមត្រកូលអេក្រង់ធុនតូច ច្រើនជាងត្រកូល Plus នារយៈពេល ៤ ឆ្នាំចុងក្រោយនេះ។

នាឆ្នាំ ២០១៥ ទូរសព្ទ iPhone 6 ក្តោបក្តាប់ចំណែកទីផ្សាររួម បាន ៣៣,៤០ ភាគរយ ធៀបនឹង iPhone 6 Plus បានត្រឹម ១០,២២ ភាគរយ ។ មិនខុសពីជំនាន់ iPhone 6s ទទួលបាន ២១,៣៩ ភាគរយ ធៀបនឹងធុនធំ iPhone 6s Plus ធ្លាក់ដល់ ៨,៦១ ភាគរយ ហើយភាគរយនេះក៏បន្តកើតមានប្រហាក់ប្រហែលនាឆ្នាំបន្ទាប់។

យ៉ាងណាមិញចុងឆ្នាំ ២០១៧ អំឡុងការដាក់បង្ហាញ iPhone 8/8 Plus និង iPhone X សង្កេតឃើញអតិថិជនចាប់អារម្មណ៍លើត្រកូល Plus ខ្ពស់ជាងមុន មានដល់ ៩,៣៧ ភាគរយ ធៀប iPhone 8 មាន ៧,៨៩ ភាគរយ ប៉ុន្តែជារួមចាញ់ iPhone X គម្រប់ខួបដប់ឆ្នាំហក់ដល់ ១២ ភាគរយ នៃតួលេខលក់ចេញ iPhone ទាំងអស់ប្រចាំឆ្នាំ ២០១៨។

ក្រាបទិន្នន័យពី Mixpanel

រំឭកថាសេរ៊ីថ្មីឆ្នាំ ២០១៨ ពីសំណាក់ក្រុមហ៊ុន Apple នឹងត្រៀមបង្ហាញខ្លួននាម៉ោង ១២ រំលងអធ្រាត្រយប់នេះ ដោយរំពឹងមាន iPhone Xs Max ទំហំអេក្រង់ ៦,៥អ៊ីញ iPhne Xs អេក្រង់ ៥,៨ អ៊ីញ និងធុនទាប iPhone Xc អេក្រង់ ៦,១ អ៊ីញប្រភេទ LCD ធម្មតា។