មួយជ្រុងតូចនៃការងារជួយកាត់បន្ថយសំរាមប្លាស្ទីកនៅកម្ពុជា

2018-09-14 14:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តើលោកអ្នកដឹងដែរឬទេបច្ចុប្បន្នសំរាម ៤ពាន់លានតោន កំពុងកើនឡើងលើផែនដី ក្នុងនោះសំរាមប្លាស្ទីកជិត ៨លានតោន កំពុងចាក់ចូលសមុទ្រជារៀងរាល់ឆ្នាំ។

-របាយការណ៍មួយ ស្តីពីកាកសំណល់ប្លាស្ទិកទូទាំងសកលលោករបស់អង្គការសហប្រជាជាតិបានបង្ហាញថា ពិភពលោកទាំងមូលប្រើប្រាស់ថង់ប្លាស្ទិកប្រមាណជា ៥០០ម៉ឺនលានថង់ក្នុងមួយឆ្នាំៗ។

-នៅរាជធានីភ្នំពេញ សំរាមបានកើនឡើងជាមធ្យមក្នុងមួយឆ្នាំ ៦ម៉ឺនតោន ស្មើប្រមាណ ១២%។ ក្នុងនោះ នៅដើមឆ្នាំ២០១៨នេះ សំរាមបានកើនឡើងរហូតដល់ ២៥០០តោន ក្នុង១ថ្ងៃ។

របរប្រចាំថ្ងៃរបស់អ្នកភូមិនៅសង្កាត់ជើងឯក ខណ្ឌដង្កោ រាជធានីភ្នំពេញ

-យោងតាមរបាយការណ៍ដែលក្រសួងបរិស្ថាននៅរាជធានីភ្នំពេញ ថង់ប្លាស្ទិកយ៉ាងហោចណាស់ជាង ១០ លានថង់ ត្រូវបានប្រើប្រាស់ជារៀងរាល់ថ្ងៃ។ ភាគរយនៃថង់ប្លាស្ទិកក្នុងបរិមាណសំរាមដែលប្រមូលបានតាមរយៈការបោសសម្អាតផ្លូវក្នុងទីក្រុងចំនួន៣ បើតាមការប៉ានស្មានគឺ ១៧,៣% ក្នុងទីក្រុងភ្នំពេញ ២០,៧% ក្នុងខេត្តសៀមរាប និង ៣៤% ក្នុងខេត្តព្រះសីហនុ។

ខាងក្រោមនេះជារូបភាពដែលបង្ហាញពីសកម្មភាពការប្រកបរបរប្រចាំថ្ងៃរបស់គ្រួសាររបស់ស្ត្រីវ័យចំណាស់មួយដែលកំពុងចូលរួមកាត់បន្ថយសំរាមប្លាស្ទីកនៅរាជធានីភ្នំពេញ។

"១គីឡូ ១០០រៀល ក្នុងមួយថ្ងៃអាចរកបាន២ម៉ឺនទៅ២ម៉ឺន ៥ពាន់ រៀល" នេះសំដីរបស់ស្ត្រីចំណាស់ប្រកបរបរលាងសម្អាតសំបកដបជាប្រចាំម្នាក់ នៅសង្កាត់ជើងឯក ខណ្ឌដង្កោ រាជធានីភ្នំពេញ ។

អ្នកស្រី ជុំ សុឃាង កំំពុងដេរមាត់ការ៉ុងសំបកដបដែលលាងសម្អាតរួច

ក្រុមគ្រួសារអ្នកស្រី ជុំ សុឃាង ប្រកបរបរលាងសម្អាតសំបកដបឲ្យថៅកែអេតចាយនៅសង្កាត់ជើងឯក នេះជិតមួយឆ្នាំមកហើយ។ ក្នុងមួយថ្ងៃសម្រាប់តែអ្នកស្រីអាចលាងសំបកបានពី២០០ ទៅ២៥០ គីឡូក្រាម ដោយក្នុង១គីឡូក្រាម បាន១០០រៀល ក្នុងមួយថ្ងៃអ្នកស្រីអាចទទួលបានប្រាក់ចំណូលពីរបរប្រភពមេរោគនេះពី ២ម៉ឺន ទៅ ២ម៉ឺន ៥ពាន់រៀល។

អ្នកស្រី សុឃាង លើកឡើងថា ក្នុងមួយថ្ងៃដបប្លាស្ទីកដែលថៅកែអេតចាយទិញចូលហើយយកឲ្យគ្រួសារអ្នកស្រីលាងសម្អាតមានច្រើនណាស់ លាងមិនទាន់ទេ ហើយការងារដូចអ្នកស្រីក៏មានមនុស្សតិចតួចណាស់ ភាគច្រើនគេទៅដើររើសថង់ និងដបប្លាស្ទីកនៅទីលានចាក់សំរាមយកមកលក់វិញ ព្រោះវាទទួលបានចំណូលច្រើនជាង។

សំបកដបប្លាស្ទីកនៅកម្ពុជាទាំងត្រូវបាននាំចេញទៅលក់ទីផ្សារប្រទេស វៀតណាម ថៃ និងប្រទេសចិន។