មានគ្រឹះស្ថានហិរញ្ញវត្ថុប៉ុន្មានហើយ ប្រកាសផ្ដល់ប្រាក់កម្ចីជូននិស្សិត សម្រាប់បន្តការសិក្សានៅមហាវិទ្យាល័យ?

2018-09-18 02:49:08
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីលទ្ធផលសញ្ញាបត្រមធ្យមសិក្សាទុតិយភូមិ (បាក់ឌុប) បានប្រកាសឱ្យដឹង យ៉ាងហោចមានគ្រឹះស្ថានមីក្រូហិរញ្ញវត្ថុ និងធនាគារធំៗចំនួន ៦កន្លែង បាននិងកំពុងផ្ដល់ប្រាក់កម្ចីជូនសិស្សិនិស្សិតក្រីក្រ យកទៅបង់ថ្លៃសាលា ដើម្បីរៀនជំនាញ នៅថ្នាក់មហាវិទ្យាល័យ និងសាលាបណ្តុះបណ្តាលជំនាញ។

លោក មាស វណ្ណដេត ប្រធាននាយកដ្ឋានបណ្ដុះបណ្ដាល នៃក្រសួងទេសចរណ៍ បានឱ្យដឹងថា នៅពេលបច្ចុប្បន្នមានធនាគារ និងគ្រឹះស្ថានមីក្រូហិរញ្ញវត្ថុឯកជនចំនួន៦ បានប្រកាសសហការគ្នាផ្តល់ប្រាក់កម្ចីជូនសិស្សនិស្សិតក្រីក្រសម្រាប់បន្តការសិក្សាជំនាញ ខណៈធនាគារចំនួន២បន្ថែមទៀត ក៏បានដាក់ពាក្យសហការជាមួយក្រសួងទេសចរណ៍ ដើម្បីផ្ដល់កម្ចីលើការអភិវឌ្ឍធនធានមនុស្សនេះដែរ។

លោក មាស វណ្ណដេត ប្រធាននាយកដ្ឋានបណ្ដុះបណ្ដាល នៃក្រសួងទេសចរណ៍

លោកបានបន្ថែមថា គ្រឹះស្ថានហិរញ្ញវត្ថុឯកជនចំនួន៦នោះរួមមាន ធនាគារកាណាឌីយ៉ា អេស៊ីលីដា ហ្វូតូបាមីក្រូហិរញ្ញវត្ថុ ហត្ថាកសិករ មីក្រូហិរញ្ញវត្ថុក្រេឌីត និងមីក្រូហិរញ្ញវត្ថុ CMK។

នៅក្នុងពិព័រណ៍ការអប់រំសហភាពសហព័ន្ធយុវជនកម្ពុជាកាលពីចុងសប្តាហ៍មុនលោក សយ សេងថៃ បុគ្គលិកផ្នែកឥណទានធនាគារកាណាឌីយ៉ា បានឱ្យដឹងថា សម្រាប់កម្ចីបន្តសិក្សាជំនាញនេះ មានការផ្ដល់អត្រាការប្រាក់ទាបបំផុតក្រោម ១ភាគរយ ហើយប្រាក់កម្ចីសិស្សអាចសងត្រលប់វិញនៅពេលនិស្សិតមានការធ្វើ ហើយបើមិនមានការងារធ្វើទេ គឺអាណាព្យាបាលរបស់គាត់អាចនឹងត្រូវសងត្រលប់មកវិញនៅពេលកូនគាត់រៀនចប់។

ចំណែក លោក ឡី សុភាព នាយកសាលាទេសចរណ៍ និងបដិសណ្ឋារកិច្ច បានឱ្យដឹងដែរថា គ្រប់សិស្សនិស្សិត ដែលសិស្សជំនាញ ក្នុងវិស័យទេសចរណ៍រៀងរាល់ឆ្នាំស្ទើរគ្រប់ ១០០ភាគរយ គឺមានការងារធ្វើទាំងអស់គ្នានៅពេលបញ្ចប់ការសិក្សាជំនាញនានាក្នុងវិស័យទេសចរណ៍ ដែលសកម្មភាពវាបង្ហាញអំពីប្រសិទ្ធភាពមួយនៃការបណ្ដុះបណ្ដាលជំនាញនានានៅក្នុងសាលាទេសចរណ៍របស់លោក និងបណ្ដាគ្រឹះស្ថានហិរញ្ញវត្ថុនានា។

រាជរដ្ឋាភិបាលបើកឱកាសឲ្យសិស្ស និស្សិតអាចទទួលប្រាក់កម្ចីពីគ្រឹះស្ថានហិរញ្ញវត្ថុឯកជននានា គឺធ្វើឲ្យសាលាទេសចរណ៍ និងបដិសណ្ឋារកិច្ច ទទួលបានសិស្ស-និស្សិតជាច្រើនចូលមកសិក្សាជំនាញនានានៅក្នុងវិស័យទេសចរណ៍។ នេះបើតាមលោក លោក ឡី សុភាព៕

អត្ថបទ៖ សុផល