សហព័ន្ធរាំ ក្លាយជាកីឡាថ្មីមួយទៀតអាចរកមេដាយជូនកម្ពុជានៅស៊ីហ្គេម

2018-09-18 03:25:16
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីឈ្នះមេដាយ៥គ្រឿង ពីទីក្រុងហុងកុង ប្រទេសចិន រួចមក ប្រភេទកីឡារាំក្លាយជាប្រភេទកីឡាដែលសក្ដានុពលមួយទៀតហើយ ដែលមានលទ្ធភាពប្រកួតប្រជែងនៅក្នុង ស៊ីហ្គេម ដើម្បីជួយស្វែងរកមេដាយជូនកម្ពុជា។

ឯកឧត្ដម វ៉ាត់ ចំរើន អគ្គលេខាធិការ នៃគណៈកម្មាធិការជាតិអូឡាំពិកកម្ពុជា បានឲ្យដឹងថា តាមរយៈការជ័យជម្នះក្នុងកម្មវិធី ADSF Asian Dance Sport Championship អាចមើលឃើញថាកីឡាករ កីឡាការិនីរបស់សហព័ន្ធខាងលើនេះ មានឱកាសឈ្នះមេដាយបន្តទៀតនៅស៊ីហ្គេម លើកទី៣០ នៅឯប្រទេសហ្វីលីពីនផងដែរ ជាមួយសហព័ន្ធមានសក្ដានុពលផ្សេងៗទៀត។

មេដាយចំនួន ៥គ្រឿងនេះ នឹងជួយជំរុញទឹកចិត្តដល់ពួកគេបន្ថែមទៀត ដើម្បីអភិវឌ្ឍន៍សមត្ថភាពឲ្យកាន់តែខ្លាំងក្នុងការប្រកួតប្រជែងលើឆាកអន្តរជាតិ។

លោកជំទាវ ញ៉ែម មរកត ប្រធានសហព័ន្ធរាំ ក៏បានឲ្យដឹងនាយប់មិញនេះដែរថា នេះជាជោគជ័យមួយរបស់សហព័ន្ធ ព្រោះទើបតែបញ្ជូនអត្តពលិកទៅលើកទី១ ហើយអាចឈ្នះមេដាយជូនជាតិតែម្ដង។ មុនការចេញទៅ ក្នុងនាមសហព័ន្ធហ៊ានរំពឹងថានិងបានមេដាយបែបនេះទេ បានត្រឹមទទួលបទពិសោធទៅបានហើយ ព្រោះជាលើកដំបូងសម្រាប់ការចូលរួមក្នុងឆាកអន្តរជាតិ។

រំលឹកដែរថា ក្រុមអត្តពលិកកីឡារាំបានវិលមកដល់កម្ពុជាវិញហើយនាយប់មិញនេះ បន្ទាប់ពីចំណាយពេលជិត១០ថ្ងៃ ដើម្បីទៅចូលរួមក្នុងព្រឹត្តិការណ៍ ADSF Asian Dance Sport Championship ឆ្នាំ2018 និងកម្មវិធី Asian Hong Kong Open 2018។ ក្នុងនោះកម្ពុជាឈ្នះមេដាយ៥គ្រឿង មាស១ ប្រាក់១ និងសំរឺទ្ធ៣៕

អត្ថបទ៖ នួន ស៊ីណា