ក្រសួងបំភ្លឺច្បាស់ៗ រឿងគេផ្អើលថា វិទ្យាល័យព្រះស៊ីសុវត្ថិដូរជាសាលាឯកជន និងបង់ថ្លៃ
- 2018-09-19 02:10:01
- ចំនួនមតិ 0 | ចំនួនចែករំលែក 0
ក្រសួងបំភ្លឺច្បាស់ៗ រឿងគេផ្អើលថា វិទ្យាល័យព្រះស៊ីសុវត្ថិដូរជាសាលាឯកជន និងបង់ថ្លៃ
ចន្លោះមិនឃើញ
ឯកឧត្ដម រស់ សុវាចា អ្នកនាំពាក្យក្រសួងអប់រំបានឆ្លើយប្រាប់ Sabay នៅព្រឹកនេះថា នាយកវិទ្យាល័យព្រះស៊ីសុវត្ថិមិនបានដកទៅណាឡើយ គឺគ្រាន់តែផ្លាស់ប្ដូរមុខតំណែងរបស់លោក ទៅកាន់នាយកដ្ឋានមធ្យមសិក្សា ដែលស្ថិតនៅក្រោមឱវាទរបស់ក្រសួងអប់រំដដែល។
អ្នកនាំពាក្យក្រសួងអប់រំបញ្ជាក់ថា មិនមានការតែងតាំងនាយកសាលាវិទ្យាល័យព្រះស៊ីសុវត្ថិថ្មីឡើយ គឺក្រសួងអប់រំបានបង្កើតគណៈកម្មការមួយដែលមានឈ្មោះថា៖ «គណៈកម្មការគ្រប់គ្រងបណ្ដោះអាសន្ន នៃវិទ្យាល័យព្រះស៊ីសុវត្ថិ»។ គណៈកម្មការនេះ មានប្រធាន១រូប អនុប្រធាន៣រូប និងសមាជិកសមាជិកាចំនួន៥រូប។ ដូច្នេះសរុបទាំងអស់ គឺមានចំនួន៩រូប ដើម្បីទ្រទ្រង់ និងដំណើរការវិទ្យាល័យព្រះស៊ីសុវត្ថិបន្តទៀត។
ចំពោះមួលហេតុនាំឲ្យមានការផ្លាស់ប្ដូរលោក មូល ស៊ុយហេង ជានាយកវិទ្យាល័យព្រះស៊ីសុវត្ថិ ទៅកាន់មុខតំណែងថ្មី គឺធ្វើឡើងទៅតាមគោលការណ៍ច្បាប់ទាំងស្រុង។ ឯកឧត្ដម រស់ សុវាចា បន្ថែមថា ការកាន់មុខតំណែងថ្មីរបស់លោក មូល ស៊ុយហេង ដោយសារតែលោកមានសមត្ថភាព ទើបក្រសួងធ្វើការតែងតាំងលោកឲ្យបំពេញភារកិច្ចកម្រិតថ្នាក់ជាតិ នៃនាយកដ្ឋានមធ្យមសិក្សា របស់ក្រសួងអប់រំយុវជន និងកីឡា។ តាមគោលការណ៍ច្បាប់ កាលណាបុគ្គលម្នាក់បំពេញការងារបានល្អ គឺត្រូវតែមានការផ្លាស់ប្ដូរតួនាទីឲ្យកាន់តែសមនឹងសមត្ថភាព មិនមែនធ្វើជានាយកសាលា ត្រូវតែធ្វើរហូតដល់ចូលនិវត្តន៍នោះឡើយ។ នេះបើតាមការបន្ថែមទៀតពីអ្នកនាំពាក្យក្រសួងអប់រំ។
ចំណែកឯការផ្លាស់ប្ដូរវិទ្យាល័យមួយនេះ ទៅជាសាលាឯកជន ហើយត្រូវរៀនបង់ថ្លៃ គឺមិនមែនជាការពិតឡើយ។ វិទ្យាល័យព្រះស៊ីសុវត្ថិ គឺនៅតែជាសាលារបស់រដ្ឋ តែក្នុងនោះមានការផ្លាស់ប្ដូរកម្មសិក្សាឲ្យកាន់តែជឿនលឿនបន្ថែមទៀត។
បន្ថែមលើពីនេះទៀត បើតាមការបកស្រាយពីលោក សម្យ កំសាន្ត នាយករងនៃវិទ្យាល័យព្រះស៊ីសុវត្ថិ បានពន្យល់ថា សាលារៀនជំនាន់ថ្មី គឺជាកម្មវិធីកំណែទម្រង់ប្រព័ន្ធអប់រំ របស់រាជរដ្ឋាភិបាលកម្ពុជា ដែលជាមាគ៌ាអភិវឌ្ឍន៍ថ្មីមួយនៅក្នុងប្រព័ន្ធអប់រំនាពេលបច្ចុប្បន្នដែលជួយបង្កើតសាលារៀនសាធារណៈស្វយ័ត។
គំនិតសម្រាប់ការធ្វើកំណែទម្រង់ប្រព័ន្ធអប់រំត្រូវផ្តួចផ្តើមឡើងដំបូងដោយអង្គការ KAPE ដែលជាអង្គការក្នុងស្រុកធំបំផុតដែលផ្តោតសំខាន់ទៅលើវិស័យអប់រំនៅកម្ពុជា ហើយក្រោយអង្គការនេះត្រូវបានអនុម័ត និងត្រូវបានឧបត្ថម្ភថវិកាដោយក្រសួងអប់រំ យុវជន និងកីឡា។ កម្មវិធីសាកល្បងរបស់ពួកគេដែលជាគំនិតផ្តួចផ្តើមសាលា Beacon ត្រូវបានស្ថាបនាឡើងនៅឆ្នាំ ២០១៤ នៅខេត្តកំពង់ចាមហើយនៅពេលដែលកម្មវិធីមានការពង្រីកធំទៅៗ សាលានេះក៏ក្លាយជាសាលាជំនាន់ថ្មីនេះឯង។
គោលបំណងរបស់ NGS គឺការបង្កើតសាលារដ្ឋដែលរក្សាបាននូវស្តង់ដារនៃការអប់រំបានខ្ពង់ខ្ពស់បំផុត តាមរយៈការវិនិយោគថវិកាច្រើន។ NGS ផ្តោតទៅលើការពង្រឹងតម្លាភាព និងទទួលខុសត្រូវដោយការផ្លាស់ប្តូរវិធីគ្រប់គ្រងសាលា។ នេះគឺជាការខុសប្លែកពីវិធីសាស្ត្រប្រពៃណីរបស់រដ្ឋាភិបាលដែលរមែងតែងតែបែងចែកមូលនិធិស្មើៗគ្នាទាំងអស់។
ប្រសិនបើមិនមានការទទួលខុសត្រូវក្នុងការគ្រប់គ្រងសាលារៀនទេនោះ សម្ភារបរិក្ខារដូចជាបន្ទប់ពិសោធវិទ្យាសាស្ដ្រនឹងមិនត្រូវបានប្រើប្រាស់ឲ្យអស់ពីសមត្ថភាពទេពីព្រោះគ្រូបង្រៀនរវល់តែស្វិតស្វាញក្នុងការបង្រៀនគួរយកលុយក្រៅម៉ោងវិញ និងមានភាពលម្អៀងទៅលើសិស្សរៀនគួរជាងសិស្សដែលមិនមានលុយរៀនគួរ។
សាលាជំនាន់ថ្មីព្យាយាមដោះស្រាយបញ្ហានេះដោយការលុបបំបាត់ការអនុវត្តបែបនេះទាំងស្រុង។ គ្រូបង្រៀនត្រូវបានជ្រើសរើសយ៉ាងល្អិតល្អន់ និងទទួលបានអត្ថប្រយោជន៍ជាច្រើនដូចជាការផ្តល់អាហារូបករណ៍ដើម្បីពង្រឹងគុណធម៌ក្នុងការបង្រៀន និងសុចរិតភាព។ គេបានសង្កេតឃើញថានៅក្នុងបរិយាកាសថ្មីនេះគ្រូបង្រៀនលែងមានការប្រកួតប្រជែងជាមួយគ្នាដើម្បីទាក់ទាញអតិថិជនដែលជាសិស្សនោះទេ ហើយវាធ្វើឲ្យការពង្រឹងគុណភាពនេះប្រព្រឹត្តទៅដោយរលូន។
លោកនិយាយដូច្នេះថា៖ «វាមានន័យចឹង មិនមែនគេមានបំណងលុបចោលសាលាព្រះស៊ីសុវត្ថិទេ។ មានន័យថា សាលាព្រះស៊ីសុវត្ថិ នៅតែជាសាលាព្រះស៊ីសុវត្ថិ ប៉ុន្តែគេគ្រាន់តែបញ្ចូលកម្មវិធីសិក្សាគឺមានការកែទម្រង់តាម NGS»៕