គេចផុតពីការស្លាប់! ស្វែងយល់វិធីសង្រ្គោះបឋម មុនពេលរថយន្តសង្គ្រោះបន្ទាន់មកដល់

2018-09-19 08:01:19
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃ ១៩ កញ្ញា មូលនិធិព្រូដិនស៍ បានសហការជាមួយកាកបាទក្រហមកម្ពុជារៀបចំ “ទិវាពិភពលោកសង្គ្រោះបឋម” ដើម្បីផ្តល់នូវចំណេះដឹងមូលដ្ឋានវិជ្ជាសង្គ្រោះបឋមសម្រាប់ជួយខ្លួនឯងផ្ទាល់ សមាជិកក្នុងក្រុមគ្រួសារ និងសហគមន៍ក្នុងពេលមានគ្រោះថ្នាក់កើតឡើងមុនពេលរថយន្តសង្គ្រោះបន្ទាន់មកដល់ឬមុនបញ្ជូនទៅមន្ទីរពេទ្យ។

ក្រុមការងារស្ម័គ្រចិត្តរបស់ក្រុមហ៊ុនព្រូដិនសលកម្ពុជាបានចែកផ្ទាំងរូបភាព និងខិត្តប័ណ្ណចំនួន ៦០០សន្លឹកដល់អ្នកចូលរួមដែលជាយុវជន អ្នកស្ម័គ្រចិត្តកាកបាទក្រហមកម្ពុជា សិស្សានុសិស្ស អាជ្ញាធរដែនដី ប្រជាការពារ និងប្រជាជនក្នុងសហគមន៍ ក្នុងឃុំស្រង់ ស្រុកគងពិសី ខេត្តកំពង់ស្ពឺ មានអ្នកចូលរួមសរុប ៣៥០នាក់។

លោក ទូច ថាវរិទ្ធ ប្រធានគ្រប់គ្រងជាន់ខ្ពស់ផ្នែកអភិវឌ្ឍន៍ និងយុទ្ធសាស្ត្រដៃគូចែកចាយ របស់ក្រុមហ៊ុនព្រូដិនសលកម្ពុជា បានឱ្យដឹងថា ព័ត៌មានទាក់ទងនឹងការសង្គ្រោះបឋមនឹងត្រូវបានផ្សព្វផ្សាយទូទាំងប្រទេសកម្ពុជាតាមរយៈបណ្តាញព័ត៌មានសង្គម ក្នុងព្រឹត្តិការណ៍នានា និងកម្មវិធីទូរទស្សន៍ ដើម្បីឱ្យប្រជាពលរដ្ឋខ្មែរមានជំនាញផ្នែកសង្គ្រោះបឋមនេះ។

នៅជុំវិញពិភពលោក មានមនុស្សជិត ១៦ ០០០នាក់ ស្លាប់ដោយសារការរងរបួសជារៀងរាល់ថ្ងៃ ខណៈដែលជនរងគ្រោះរាប់ពាន់នាក់ផ្សេងទៀតគេចផុតពីការស្លាប់ ប៉ុន្តែមានមនុស្សជាច្រើនបានបាត់បង់សមត្ថភាពជាអចិន្ត្រៃយ៍ ក្រោយពេលរងផលប៉ះពាល់ពីរបួសនោះរួចមក។

នៅក្នុងទិវាសង្គ្រោះបឋមពិភពលោកនោះដែរ កាកបាទក្រហមកម្ពុជាបានបានបង្ហាញពីជំនាញសង្គ្រោះបឋមចំនួន៣យ៉ាង និងវិធីសាស្ត្រសង្គ្រោះតាមជំហាននីមួយៗ។ អ្នកចូលរួមបានរៀនសូត្រពីរបៀបអនុវត្ដវិធីសាស្ត្រសង្គ្រោះបឋមចំពោះជនរងគ្រោះ ដែលរងរបួសពីការបាក់ឆ្អឹង របួសដាច់សាច់ និងការរលាក។

លោកស្រី សៅ ស៊ីវន អ្នកស្ម័គ្រចិត្តរបស់កាកបាទក្រហមកម្ពុជា ដែលបានចូលរួមក្នុងព្រឹត្តិការណ៍នោះដែរ បានមានប្រសាសន៍ថា៖ “កម្មវិធីសង្គ្រោះបឋមនេះគឺជាគំនិតផ្ដួចផ្ដើមមួយយ៉ាងល្អ ដោយសារកម្មវិធីនេះផ្ដល់គន្លឹះក្នុងការសង្គ្រោះជីវិត ដើម្បីជួយឱ្យប្រជាពលរដ្ឋចេះគ្រប់គ្រងក្នុងស្ថានភាពអាសន្ន រួមមានការជួយជនរងគ្រោះដែលរបួសមុននឹងបញ្ជូនទៅមន្ទីរពេទ្យ។”

កម្មវិធីវិធានការសុវត្ថិភាព គឺជាផ្នែកមួយនៃការខិតខំប្រឹងប្រែងរបស់ក្រុមហ៊ុនព្រូដិនសល នៅក្នុងវិស័យអប់រំនៅទូទាំងប្រទេសកម្ពុជា ដែលក្នុងនោះរួមមានកម្មវិធីអំណានដំបូង កម្មវិធីអប់រំផ្នែកហិរញ្ញវត្ថុ និងកម្មវិធីតន្ត្រី៕

អត្ថបទ៖ ថា ម៉ាលីដា

ពាក្យទាក់ទង