កីឡាករ៥រូប មិនដែលបានកាតក្រហមក្នុងអាជីព
- 2018-09-21 04:03:50
- ចំនួនមតិ 0 | ចំនួនចែករំលែក 0
កីឡាករ៥រូប មិនដែលបានកាតក្រហមក្នុងអាជីព
ចន្លោះមិនឃើញ
កីឡាករ និងការប្រព្រឹត្តិកំហុសលើទីលានគឺជារឿងធម្មតានៅក្នុងកីឡាបាល់ទាត់។ ការប៉ះទង្គិចគ្នា និងការបង្ហាញអាកប្បកិរិយាមិនសមរម្យក្នុងនាមជាកីឡាករអាជីពអាចឲ្យពួកគេរងការពិន័យកាតលឿង ឬក្រហមតិចឬក៏ច្រើន។
យ៉ាងណាក៏មានដែរ កីឡាករដែលលេងមានក្រមសីលធម៌ និងគោរពគោលការណ៍Fair Play បានល្អបំផុតរហូតមិនធ្លាប់បានកាតក្រហមសោះតាំងពីពេលឈានជើងប្រឡូកក្នុងពិភពបាល់ទាត់ និងចូលនិវត្តន៍ទៅវិញ។ ខាងក្រោមគឺជាកីឡាករ៤រូបមិនធ្លាប់ទទួលកាតក្រហមក្នុងអាជីព៖
#៥ Joao Moutinho – Wolverhampton
Moutinho គឺជាកីឡាករសំខាន់មួយរូបនៅពីក្រោយជោគជ័យឈ្នះពានទ្វីបអឺរ៉ុបរបស់ព័រទុយហ្គាល់កាលពីឆ្នាំ២០១៦។ ខ្សែបម្រើរូបនេះ បានចំណាយពេលភាគច្រើនក្នុងអាជីពលេងឲ្យក្រុម AS Monaco, Sporting ហើយបច្ចុប្បន្នលេងឲ្យ Wolverhampton ដោយធ្លាប់ទទួលកាតលឿង៤៧ តែមិនធ្លាប់បានកាតក្រហម។
#៤ Karim Benzema - Real Madrid
Benzema គឺជាខ្សែប្រយុទ្ធដ៏ល្បីឈ្មោះមួយរូបលើពិភពលោក ធ្លាប់លេងបានជាង៤០០ប្រកួតជាមួយ Real Madrid និងឈ្នះពានជាច្រើនទាំងជាមួយក្លឹប និងពានបុគ្គល។ ក្នុងអាជីព Benzema ធ្លាប់បានកាតលឿងចំនួន៨ប៉ុណ្ណោះ ហើយមិនដែលបានកាតក្រហមទេ។ យ៉ាងណាកីឡាកររូបនេះត្រូវសហព័ន្ធបាល់ទាត់បារាំងដកឈ្មោះពីក្រុមជម្រើសជាតិដោយសាររឿងអាស្រូវផ្លូវភេទដ៏ចម្រូងចម្រាសជាមួយមិត្តរួមក្រុម។
#៣ Raul Gonzalez
Raul ជាកីឡាករទទួលការគោរពបំផុតពីអ្នកគាំទ្របាល់ទាត់ជុំវិញពិភពលោក។ ក្រៅពីជាខ្សែប្រយុទ្ធឆ្នើម, ជាប្រធានក្រុម និងជាកីឡាករមានអាកប្បកិរិយាល្អ Raul ថែមទាំងមិនដែលបានកាតក្រហមក្នុងអាជីពបាល់ទាត់រយៈពេល១៧ឆ្នាំរបស់ខ្លួន។
#២ Andres Iniesta - Vissel Kobe
មិនខុសពី Raul កីឡាករ Iniesta វិញក៏មានភាពប្រហាក់ប្រហែលគ្នាជាមួយវីរបុរស Real Madrid រូបនោះដែរ។ Iniesta បានចំណាយពេលសឹងមួយអាជីពជាមួយ Barcelona ឈ្នះពានធំៗ៣២ មុននឹងចាកចេញទៅលេងនៅក្លឹបជប៉ុន Vissel Kobe។ ជាមួយនឹងការបង្ហាញខ្លួនប្រមាណ ៧៥០លើក Iniesta ធ្លាប់បានតែកាតលឿងប៉ុណ្ណោះ ចំពោះកាតក្រហមវិញរូបគេមិនដែលស្គាល់ជាតិម្ដងណាទេ។
#១ Ryan Giggs – Manchester United
Giggs គឺជាកីឡាករលេងនៅ Premier League បានច្រើនបំផុតលំដាប់ទី២ ធ្លាប់បង្ហាញខ្លួនបាន៦២០ប្រកួតជាមួយក្រុមដ៏ជោគជ័យរបស់អង់គ្លេសគឺ Manchester United។ បុរសសញ្ជាតិវែលបានចំណាយពេល២៤ឆ្នាំលេងឲ្យបិសាចក្រហម និងក្លាយជាជំនួយការ ក៏ដូចជាអ្នកចាត់ការទូទៅរយៈពេលខ្លី។ អ្វីដែលចាប់អារម្មណ៍បំផុតនោះទោះលេងបានច្រើនប្រកួតតែ Giggs មិនធ្លាប់បានកាតក្រហមឡើយ៕