កត្តាធំៗដែលរាល់ការប្រកួតរបស់ កែវ រំចង់ មានអ្នកទស្សនាពេញៗ

2018-09-21 08:53:38
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកនិយមទស្សនាប្រដាល់គុនខ្មែរ ស្គាល់ហើយកីឡាករចាស់វស្សា កែវ រំចង់ និងប្រជាប្រិយភាពរបស់ជើងខ្លាំងរូបនេះ។ ទោះជាចូលប្រឡូកក្នុងវិស័យកីឡាមួយនេះយូរយ៉ាងណាក្ដី ប៉ុន្តែកេរ្តិ៍ឈ្មោះប្រជាប្រិយភាពនៅតែមិនអន់ថយ។ កត្តាទាំងប៉ុន្មានខាងក្រោមនេះហើយដែលធ្វើឲ្យកីឡាករមកពីខេត្តបាត់ដំបងរូបនេះមានភាពល្បីរន្ទឺដល់សព្វថ្ងៃ។

កីឡាករ កែវ រំចង់(ក្រហម)

**ទី១ ប្រកួតបានយូរក្នុងវិស័យមួយនេះ** ជើងខ្លាំងរូបនេះចូលប្រឡូកក្នុងវិស័យប្រដាល់តាំងតែពីជំនាន់សង្វៀនប៉ុស្តិ៍លេខ៥តែមួយគត់ បន្តរហូតដល់សង្វៀន CTN ហើយក៏នៅតែអាចឈរជើងមកដល់បច្ចុប្បន្ន។

ទី២ ជាកីឡាករវ៉ៃប្ដូរ ចំណុចមិនចេះខ្លាចដៃគូ ហ៊ានប្ដូរ វ៉ៃមិនចេះលាក់ វ៉ៃដោយអស់ពីសមត្ថភាព គឺបានឆក់យកបេះដូងអ្នកទស្សនា ចូលចិត្តគាំទ្រ និងមើលការប្រកួតរបស់គេជារៀងរហូតដល់បច្ចុប្បន្ន។

ទី៣ ការឌឺដងជាលក្ខណៈចិត្តសាស្ត្រ របស់ រំចង់ ចំណុចនេះក៏ទាញយកប្រជាប្រិយភាពអ្នកទស្សនាផងដែរ ជាពិសេសអ្នកចូលទៅមើលផ្ទាល់នៅសង្វៀនផ្ទាល់តែម្ដង។ នៅពេលដែលកីឡាកររូបនេះធ្វើកាយវិការនេះម្ដងៗ ធ្វើឲ្យអ្នកគាំទ្រនាំគ្នាហោតាម និងបានសើចសប្បាយផងដែរនៅពេលនោះ។

កែវ រំចង់ កំពុងថតរូបជាមួយអ្នកគាំទ្រ

រំលឹកដែរថា កីឡាករ កែវ រំចង់ ជាអ្នកប្រដាល់យូរណាស់មកហើយក្នុងវិស័យប្រដាល់គុនខ្មែរ ខណៈកីឡាករជំនាន់ជើងខ្លាំងរូបនេះខ្លះបោះបង់អាជីពនេះចោល និងខ្លះទៀតក្លាយជាគ្រូបង្វឹក ឬអាជ្ញាកណ្ដាលចៅក្រមទៅហើយ។ ល្ងាចនេះ រំចង់ នឹងត្រូវឡើងប្រកួតទៀតហើយជាមួយអ្នកប្រដាល់ថៃ នៅសង្វៀនបាយ័នស្ទឹងមានជ័យ ចាំពីម៉ោង៧យប់តទៅ៕

អត្ថបទ៖ នួន ស៊ីណា