ហេតុផល ៥ យ៉ាងអ្នកមិនគួរចាយលុយទិញកាសអន់ គ្មានប្រភពច្បាស់លាស់

2018-09-22 05:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាសដាក់លក់លើទីផ្សារមានច្រើនសណ្ឋាន រចនាបែបប្លែកមានពណ៌ចម្រុះ បូកផ្សំនឹងតម្លៃធូរ ងាយស្រួលនឹងចាប់អារម្មណ៍ចង់ទិញប្រើប្រាស់។ ប៉ុន្តែបើក្រឡេកមើលមួយជ្រុងទៀត កាសមានគុណភាពល្អ តម្លៃថ្លៃបន្តិច ប្រើបានយូរ ផ្តល់សំឡេងល្អ និងភាគច្រើនបានគិតគូរពីការការពារត្រចៀក។

១) រលកសំឡេងមានលម្អៀង

បើតាមអ្នកជំនាញផ្នែកត្រចៀក សំឡេងមិនគួរលើសពី ៥៥ ទៅ ៦៥ dBHL នោះឡើយ ដើម្បីការពារការស្តាប់។ ដោយសាររលកសំឡេងមានលម្អៀង មានក្នុងកាសដាក់លក់លើទីផ្សារមួយចំនួន អ្នកប្រហែលត្រូវបង្កើនសំឡេងលើសពីការណែនាំ។ សំឡេងកាន់តែលឺ ការស្តាប់កាន់តែថយសមត្ថភាព។

២) មិនត្រូវសណ្ឋានត្រចៀក

កាសរចនាមិនត្រឹមត្រូវតាមស្តង់ដារ អាចពិបាកដាក់ត្រូវត្រចៀកស្តាប់បានស្រួល ដែលជំរុញឲ្យអ្នកត្រូវការរុញកាសចូលត្រចៀកបន្ថែម ឬបង្កើនសំឡេងអស់ៗដើម្បីឲ្យស្រួលស្តាប់ ប៉ុន្តែនេះ អាចបន្ថយសមត្ថភាពការស្តាប់ ក្នុងរយៈពេលយូរបាន។

៣) មិនមានមុខងារបន្ថយសំឡេងរំខាន

កាសមិនសូវមានគុណភាព ភាគច្រើនមិនមានមុខងារបន្ថយសំឡេងរំខានពីខាងក្រៅនោះទេ សម្រាប់ផ្តល់ផាសុកភាពក្នុងការស្តាប់។ កាសប្រភេទនេះ អាចបង្កគ្រោះថ្នាក់បាន ពេលប្រើអំឡុងពេលដើរតាមដងផ្លូវ ឬបញ្ជាម៉ាស៊ីន។

៤) បណ្តាលឲ្យវិលមុខ

សំឡេងខ្ទរនៃតន្ត្រីលឺខ្លាំងៗពីកាស អាចដាក់សំពាធដល់ត្រចៀក ធ្វើឲ្យអ្នកពេលខ្លះ វិលមុខបាន។

៥) សំឡេងមិនស្មើ

កាសលើទីផ្សារមួយចំនួន មិនបញ្ចេញសំឡេងស្មើគ្នានោះទេទៅតាមកម្រិតសំឡេងបានកំណត់ ដែលអាចប៉ះពាល់ដល់សមត្ថភាពស្តាប់បាន។

បើអាចគួរទិញកាសមានគុណភាពល្អ ត្បិតមានតម្លៃថ្លៃបន្តិច ប៉ុន្តែក៏ផ្តល់ប្រយោជន៍ច្រើនដែរ ក្នុងរយៈពេលវែង។ មួយវិញទៀត បើតាមការណែនាំពី WHO ការស្តាប់សំឡេងតាមទូរសព្ទ រយៈពេលច្រើនបំផុត ១ម៉ោង ក្នុងមួយថ្ងៃ ក្នុងកម្រិតសំឡេង ៦០ Decibels៕