ដីឡើងថ្លៃកាន់តែខ្ពស់ ក្រសួងដែនដីគ្រោងធ្វើបច្ចុប្បន្នភាពតម្លៃដីធ្លី នៅទូទាំងប្រទេស

2018-10-09 09:06:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលតម្លៃដីធ្លីនៅតាមរាជធានី ខេត្តបានឡើងថ្លៃជាបន្តបន្ទាប់ ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងដែនដី នគររូបនីយកម្ម និងសំណង់បានលើកឡើងពីគម្រោងធ្វើបច្ចុប្បន្នភាពតម្លៃដីធ្លីនៅទូទាំងប្រទេស។ ការធ្វើបច្ចុប្បន្នភាពតម្លៃដីធ្លីនេះមានគោលបំណងកំណត់តម្លៃគិតពន្ធលើអចលនទ្រព្យឱ្យបានត្រឹមត្រូវតាមតម្លៃទីផ្សារ។

ថ្លែងនៅក្នុងពិធីសំណេះសំណាលជាមួយមន្ត្រីចូលនិវត្តន៍កាលពីចុងសប្ដាហ៍មុនឯកឧត្ដមបានបន្ថែមថា ការធ្វើបច្ចុប្បន្នភាពតម្លៃដីធ្លីនេះ គឺនឹងត្រូវធ្វើនៅគ្រប់ភូមិបាល ដីធ្លីទូទាំងប្រទេស ហើយប្រធានមន្ទីរខេត្តក្រុងនីមួយៗជាអ្នកទទួលបន្ទុកលើកិច្ចការងារនេះ។

ឯកឧត្ដមបានបន្ថែមថា ការខកខានមិនបានធ្វើបច្ចុប្បន្នភាពលើតម្លៃដីធ្លី បានធ្វើឱ្យរដ្ឋបាត់បង់ចំណូលពន្ធយ៉ាងសន្ធឹកសន្ធាប់។ “យើងធ្វើបច្ចុប្បន្នភាពផ្ទៃដី ដែលស្ថិតនៅក្នុងភូមិសាស្ត្រនៃការគ្រប់គ្រងរបស់អស់លោក ជាប្រធានភូមិបាលនៅតាមបណ្ដាខេត្តក្រុង។ ឧទាហរណ៍ថា ផ្លូវលេខ១១០ ទល់នឹងផ្លូវលេខ១១៥ ឬផ្លូវ២៨២ អញ្ចឹងបងប្អូនមើលទៅតំបន់នេះតម្លៃទីផ្សារដីវាមាន ១ ៥០០ដុល្លារ ក្នុងមួយម៉ែត្រការ៉េ ប៉ុន្តែយើងអត់បានធ្វើបច្ចុប្បន្នភាពកន្លងផុត ដីហ្នឹងនៅតែតម្លៃ ៣០០ដុល្លារ ក្នុងមួយម៉ែត្រការ៉េដល់ផ្លាស់ប្ដូរសិទ្ធិវ៉ៃពន្ធ គេអត់មានអីជាមូលដ្ឋានដែលយើងបានធ្វើ គេវ៉ៃពន្ធលើ ៤% នៃតម្លៃ៣០០ដុល្លារក្នុងមួយម៉ែត្រការ៉េ ធ្វើឱ្យរដ្ឋបាត់ចំណូលជាងមួយពាន់ដុល្លារ”។

ដោយមិនបានបញ្ជាក់ពីកាលបរិច្ឆេទនៃការចាប់ផ្ដើមនៅពេលណា ឯកឧត្ដមបានឱ្យដឹងថា នេះគឺជាគោលដៅមួយ ដែលអាចឱ្យចំណូលរដ្ឋកើនឡើងមួយគុណជាពីរ ខណៈ គម្រោងធ្វើបច្ចុប្បន្នភាពនេះ នឹងអាចធ្វើមួយឆ្នាំម្ដង ដើម្បីឱ្យស្របទៅតាមតម្លៃដីតាមទីផ្សារ ។ “អញ្ចឹងនៅពេលយើងធ្វើយកពន្ធយើងអាចទុកចន្លោះ ៣០% សម្រាប់ឱ្យពលរដ្ឋថា កុំឱ្យថា រដ្ឋយកតម្លៃ ពន់ពេកដល់ ១០០%អត់ទេ…ត្រឹម ៧០% អីបានហើយ។ បើធ្វើបានអាចឱ្យចំណូលរដ្ឋកើនឡើងមួយគុណនឹងពីរ”។

ទាក់ទងនឹងគម្រោងធ្វើបច្ចុប្បន្នភាពតម្លៃដីធ្លីនេះ លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានគាំទ្រចំពោះគម្រោងនេះ ប៉ុន្តែលោកបារម្ភថា ការទម្លាក់ការងារនេះឱ្យមន្រ្តីដែនដីតាមរាជធានីខេត្តនីមួយៗធ្វើ អាចនឹងមានភាពចន្លោះប្រហោងច្រើន និងមិនមានលក្ខណៈ ស្តង់ដារ ហើយអាចប៉ះពាល់ដល់សតិអារម្មណ៍អ្នកវិនិយោគលើវិស័យដីធ្លី។

លោកថា ក្រសួងដែនដី គួរចំណាយថវិកា និងរកអង្គភាពផ្លូវការណាមួយឯករាជ្យ មានសមត្ថភាពធ្វើលើការងារនេះ ទើបមានលក្ខណៈស្តង់ដារ និងអាចប្រកាសដាក់ឱ្យប្រើប្រាស់នៅទូទាំងប្រទេសតែម្តង ដើម្បីឱ្យមានតម្លាភាព។ "ធ្វើអ្វីមួយដែលមានចន្លោះប្រហោង គឺមិនល្អទេ និងអាចជាការទុកច្រកឱ្យបុគ្គលមិនល្អរកស៊ី។ បើពិបាកពេកជួលឯកជន ឬអង្គការណាមួយឱ្យគេធ្វើតែម្តង ហើយធ្វើម្តងទុកប្រើ ៥ឆ្នាំ ។ បើយើងធ្វើមួយឆ្នាំម្តងមានន័យថា បង់ពន្ធម្ដងប្រែប្រួលម្តង នៅពេលអត់មានតារាងផ្លូវការមួយ…អាហ្នឹង គឺទុកច្រកឱ្យមន្ត្រីរកស៊ីហើយ។ ដូចបង់ពន្ធឡានអញ្ចឹងអត់មានអាចកេងប្រវ័ញ្ចបានទេ ឡានប្រភេទណា…ទំហំស៊ីឡាំងប៉ុន្មាន?…បង់ចេញមក គឺច្បាស់តែម្តង។ ដូច្នេះការងារនេះ តើអ្នកណាអ្នកធ្វើ និងធ្វើយ៉ាងម៉េច?…ទើបជាដំណោះស្រាយ”។

បច្ចុប្បន្ននេះ ការកំណត់ពន្ធដីមានពីរប្រភេទ ទី១ គឺប្រភេទពន្ធដីមិនប្រើប្រាស់ 0.០១ % ប៉ុណ្ណោះក្នុងមួយឆ្នាំ។ ចំណែកទី ២ ពន្ធប្រថាប់ត្រា លើដីទិញលក់កាត់ឈ្មោះ ៤% នៃតម្លៃដី។ នេះបើតាមលោក គឹម ហ៊ាង៕

អត្ថបទ៖ សុផល