Selena កំពុងសម្រាកព្យាបាលក្នុងមន្ទីរពេទ្យចិត្តសាស្ត្រ ក្រោយរកឃើញថាមានជំងឺផ្លូវចិត្តធ្ងន់ធ្ងរ

2018-10-11 07:07:52
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ ខាងបណ្ដាញសារព័ត៌មានអន្តរជាតិ បានចុះផ្សាយថា តារាចម្រៀង Selena Gomez បានសម្រាកក្នុងមន្ទីរពេទ្យអស់ ២លើកហើយ ក្នុងរយៈពេល ប៉ុន្មានសប្ដាហ៍មកនេះ។ ចំពោះលើកទី២នេះដែរ តារាចម្រៀងស្រីរូបនេះ ត្រូវបានឲ្យដឹងថា បានទទួលរងសម្ពាធផ្លូវចិត្តធ្ងន់ធ្ងររហូតដួលសន្លប់ ហើយបច្ចុប្បន្ននាងកំពុងស្ថិតក្នុងការតាមដានពីក្រុមគ្រូពេទ្យផ្នែកចិត្តសាស្ត្រ។

បើតាមប្រភពជាច្រើនបានប្រាប់សារព័ត៌មាន TMZ ថា លើកដំបូង Selena ត្រូវបានបញ្ជូនចូលបន្ទប់សង្គ្រោះបន្ទាន់នៅសប្ដាហ៍ចុងក្រោយនៃខែកញ្ញា នៅពេលដែលនាងស្នាក់នៅផ្ទះនៅតំបន់ Studio City ក្នុងរដ្ឋ California។ នាងមានសម្ពាធផ្លូវចិត្តធ្ងន់ធ្ងរដោយសារគ្រាប់ឈាមក្រហមរបស់នាងធ្លាក់ចុះ ក្រោយវះកាត់ក្រលៀនរួច។ តាមសារព័ត៌មានដដែលបានបញ្ជាក់ថា នាងត្រូវបានក្រុមគ្រួសារបញ្ជូនទៅមន្ទីរពេទ្យ Cedars-Sinai Medical Centre ដែលស្ថិតក្នុងក្រុង Los Angeles។

ក្រោយទទួលការព្យាបាលមិនទាន់បានប៉ុន្មានផង Selena ស្រាប់តែចង់ចេញពីពេទ្យ ប៉ុន្តែក្រុមគ្រូពេទ្យមិនអនុញ្ញាត។ បើតាមប្រភពមួយបានឲ្យដឹងថា តារាចម្រៀងស្រីរូបនេះ បានឈានដល់ដំណាក់កាលភ័យស្លន់ស្លោ រហូតដល់យកដៃទាញបំពង់សេរ៉ូមចេញពីដៃនាង។

បច្ចុប្បន្ន តារាចម្រៀង Selena Gomez កំពុងសម្រាកព្យាបាលក្នុងមន្ទីរពេទ្យចិត្តសាស្ត្រមួយនៅប៉ែកខាងកើតនៃសហរដ្ឋអាមេរិក និងកំពុងព្យាបាលតាមវិធីសាស្ត្របុរាណដែលហៅថា DBT។ DBT ជាវិធីសាស្ត្រមួយសម្រាប់ព្យាបាលអ្នកជំងឺដែលមានបញ្ហាសតិធ្ងន់ធ្ងរ៕

ប្រភព៖ Kenh14 ប្រែសម្រួល៖ អន សុភក្ត្រា