វីវរហើយ! សំរាមកាន់តែច្រើនឡើង ប្រមូលលែងឈ្នះ លើឆ្នេរដ៏ស្រស់ស្អាតរបស់កម្ពុជា

2018-10-12 01:53:30
ចំនួនមតិ 0 | ចំនួនចែករំលែក 0

ចន្លោះមិនឃើញ

រហូតមកទល់នឹងពេលនេះសំរាមនៅឆ្នេរសមុទ្រនានា ក្នុងខេត្តព្រះសីហនុកាន់តែច្រើនឡើង មានទាំងសំបកដូង កំប្លោក ដបទឹក ប្រអប់បាយ មកបំផ្លាញសម្រស់ឆ្នេរសមុទ្រដ៏ស្រស់ស្អាតរបស់កម្ពុជា។ បញ្ហាសំរាមរាប់តោន ដែលរដ្ឋបាលខេត្តព្រះសីហនុ អះអាងថារសាត់តាមទឹករលកមកពីប្រទេសវៀតណាមនេះ នៅមិនទាន់មានដំណោះស្រាយណាមួយ ក្រៅពីអំពាវនាវឲ្យប្រជាពលរដ្ឋ និងអង្គភាពពាក់ព័ន្ធជួយចុះបោសសំអាត និងប្រមូលឡើយ។

រូបភាព៖ រដ្ឋបាលខេត្តព្រះសីហនុ

តាមការលើកឡើរបស់ឯកឧត្ដម យន្ត មីន អភិបាលខេត្តព្រះសីហនុ មានប្រសាសន៍ពន្យល់ថា ប៉ុន្មានថ្ងៃកន្លងមកនេះ មានកំទេចកំប្លោក និងសំរាមឫសរុក្ខជាតិមួយចំនួនបានរសាត់អណ្តែតលើផ្ទៃសមុទ្រអណ្តែតមកទើលើឆ្នេរនានាក្នុងខេត្ត មានដូចជាឆ្នេរអូរឈើទាល ឆ្នេររាម និងនៅកោះរ៉ុងជាដើម។កកច្រើនជាងគេគឺនៅឆ្នេរអូរឈើទាលនិងឆ្នេរអូរត្រេះ។

រូបភាព៖ រដ្ឋបាលខេត្តព្រះសីហនុ

ឯកឧត្តម បន្តថា បញ្ហានេះបានធ្វើអោយបាត់បង់សោភណ្ឌ័ភាពតំបន់ឆ្នេរ ចំពោះរដ្ឋបាលខេត្ត-ក្រុងព្រះសីហនុ កំពុងសំអាតជាបន្ទាន់ដោយមានការចូលរួមយ៉ាងសកម្មពីមន្រ្តី និងពលរដ្ឋសិស្សានុសិស្សផងដែរ ដើម្បីសំអាតឆ្នេរខ្សាច់អោយស្អាតឡើងវិញ។

ឯកឧត្តម អភិបាលខេត្តព្រះសីហនុ បានពន្យល់ថា កាកសំណល់ដែលអណ្តែតពីក្នុងសមុទ្រមកទើលើឆ្នេរខ្សាច់នេះ មិនមែនជាកាកសំណល់តាមផ្ទះនោះទេ គឺជាប្រភេទរុក្ខជាតិកំប្លោកនិងឫសរុក្ខជាតិផ្សេងៗមួយចំនួនទៀត ដែលឯកឧត្តមអភិបាលខេត្តសង្សយ័ថា កំប្លោកទាំងអស់នេះ មានប្រភពមកពីប្រទេសជិតខាងដែលទំនងជាហូរតាមទឹកព្រែកចូលសមុទ្រហើយរសាត់អណ្តែតមកដល់ឆ្នេរសមុទ្រខ្មែរយើង។

រូបភាព៖ Rith Kakada

ចំពោះមុខនេះ ឯកឧត្តមអភិបាលខេត្តរំលេចអោយដឹងថា នឹងរកទិញគ្រឿងចក្រសំអាតសំរាមតាមឆ្នេរមួយគ្រឿងទុកសំរាប់សំអាតបរិស្ថានឆ្នេរ។

រូបភាព៖ Rith Kakada

ទន្ទឹមនឹងនេះក៏មានយុវជនរស់នៅខេត្តព្រះសីហនុជាច្រើន មិនអាចទ្រាំមើលទិដ្ឋភាពនេះ បាននាំគ្នាប្រមូលសំរាមនៅតាមបណ្ដាឆ្នេរនានា។ ជាក់ស្ដែងយុវជន រិទ្ធិ កក្កដា បាននាំគ្នាប្រមូលសំរាម ដោយអះអាងថា ការប្រមូលសំរាមនេះគឺមិនត្រូវការ ការឧបត្ថម្ភជាលុយ ជាស្បោង ជាថង់អ្វីឡើយ គឺត្រូវការតែកម្លាំងប៉ុណ្ណោះ។ សកម្មភាពនេះ បានធ្វើឲ្យមានការចាប់អារម្មណ៍ និងទទួលបានការកោតសរសើរជាច្រើនពីអ្នកប្រើបណ្ដាញសង្គមនៅក្នុងប្រទេសកម្ពុជាទៀតផង និងធ្វើឲ្យយុវជនដទៃទៀត ចាប់ផ្ដើមមានទឹកចិត្តចូលរួមសកម្មភាពសំអាតសំរាមចេញពីឆ្នេរសមុទ្រកម្ពុជា៕