មិនបន្ទោសទេ តែហេតុផលពីរយ៉ាងនេះហើយ ទើបអ្នកជិះខ្លះ អត់ខ្ចីពាក់មួកសុវត្ថិភាព

2018-10-13 01:23:36
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកសិក្សាពីបញ្ហាចរាចរណ៍១រូប បានបញ្ជាក់ថា បច្ចុប្បន្នអ្នកបើកបរម៉ូតូមួយចំនួន នៅតែយល់ច្រឡំថា ការពាក់មួកសុវត្ថិភាព គឺដើម្បីកុំឲ្យសមត្ថកិច្ចចាប់ពិន័យ មិនមែនដើម្បីការពារគ្រោះថ្នាក់ក្បាលជាយថាហេតុ។ អ្នកជំនាញខាងលើ ឲ្យដឹងទៀតថា ការគិតបែបនេះ អាស្រ័យដោយមានកត្តារួមផ្សំសំខាន់ ២ ចំណុច ដូចខាងក្រោម។

លោក គង់ រតនៈ អនុប្រធានវិទ្យាស្ថានសុវត្ថិភាពចរាចរណ៍ បានប្រាប់ Sabay តាមទូរសព្ទថា មានហេតុផល និងសឹងតែក្លាយជាទម្លាប់ ដែលនាំឲ្យប្រជាពលរដ្ឋជិះម៉ូតូមួយចំនួន គិតបែបនេះ។

ទោះយ៉ាងណា ត្រង់ន័យនេះ លោកមិនបានដាក់បន្ទុក ឬបន្ទាសទាំងអស់ទេ ព្រោះក៏មានប្រជាជនខ្លះប្រើប្រាស់ គោរពច្បាប់ ហើយពាក់មួកសុវត្ថិភាពបានត្រឹមត្រូវ រហូតដល់ថ្នាក់ អត់មានមួកសុវត្ថិភាព គឺពួកគេសុខចិត្តអត់បើកបរម៉ូតូ រួចទៅរកមធ្យោបាយដទៃក៏មាន។

ងាកមករឿងមានអ្នកបើកបរម៉ូតូ តែអត់ពាក់មួកសុវត្ថិភាព ដើម្បីទុកគេចចេញពីការចាប់ពិន័យពីសមត្ថកិច្ចវិញ គឺអាចមកពីកត្តាចម្បង ២ចំណុចនេះ។

១. កត្តាខ្លួនឯង និងទម្លាប់

សំដៅដល់ឥរិយាបថនៃការបើកបរម៉ូតូផ្ទាល់ខ្លួនប្រចាំថ្ងៃ របស់ពេលប្រជាពលរដ្ឋមួយចំនួន ដែលមិនសូវបារម្ភពីសុវត្ថិភាពផ្ទាល់ខ្លួនតែម្ដង។ ម្យ៉ាងការយល់ដឹង និងចំណេះដឹងច្បាប់ចរាចរណ៍ ក៏នៅមានកម្រិត ជាហេតុធ្វើឲ្យនៅពេលយប់ អត្រាអ្នកបើកបរ អត់ពាក់មួកសុវត្ថិភាពមានច្រើនជាងពេលថ្ងៃ។ លោក គង់ រតនៈ បានបញ្ជាក់បន្តថា យោងតាមការសិក្សា វិទ្យាស្ថានសុវត្ថិភាពចរាចរណ៍បានរកឃើញថា ប្រមាណជាង៨០% នៃអ្នករងគ្រោះថ្នាក់ចរាចរណ៍បានស្លាប់ ដោយសាររងរបួស ឬបោកក្បាល ធ្ងន់ធ្ងរ ក្រោយបើកបរគ្មានមួកសុវត្ថិភាព ហើយភាគច្រើនកើតមាននៅពេលយប់។

២. ការផ្សព្វផ្សាយ និងអនុវត្តច្បាប់ចរាចរណ៍ផ្លូវគោកមិនទាន់គ្រប់គ្រាន់

លោក គង់ រតនៈ អនុប្រធានវិទ្យាស្ថានសុវត្ថិភាពចរាចរណ៍ បានពន្យល់ថា ឆ្នាំ២១០៧កន្លងទៅ សមត្ថកិច្ចធ្លាប់បានបើកយុទ្ធនាការចុះចាប់ និងរឹតបន្តឹងច្បាប់ចរាចរណ៍ផ្លូវគោក ជាហេតុធ្វើឲ្យអ្នកដំណើរមានការប្រុងប្រយ័ត្នខ្ពស់ និងប្រើប្រាស់មួកសុវត្ថិភាពបានល្អ ទាំងអ្នកបើកបរ និងអ្នកជិះពីក្រោយ។

រយៈពេលចុងក្រោយមក ក្រោយអវត្តមានសមត្ថកិច្ចច្រូងច្រាងតាមផ្លូវចាំពិន័យ ដូចមុន តាមការសង្កេត លោក គង់ រតនៈ បន្តថា ប្រជាពលរដ្ឋមួយចំនួនបានងាកទៅរកទម្លាប់ចាស់ គឺទាំងអ្នកបើកបរម៉ូតូ និងអ្នករួមដំណើរ គឺហាក់មិនសូវពាក់មួកឲ្យបានត្រឹមត្រូវច្រើនដូចមុន។ ពេលខ្លះ ពាក់មួកសុវត្ថិភាពនៅតាមផ្លូវណាដែលមានសមត្ថកិច្ចប្រចាំការតែប៉ុណ្ណោះ។

ចំពោះយុវជន១ចំនួន តែងនិយមយកមួកមកព្យួរនឹងដៃ ឬ កម៉ូតូ មិនចូលចិត្តពាក់ឲ្យជាប់លាប់ ព្រោះខ្លាចខូចសក់ ឬហេតុផលផ្សេងទៀត ដែលមិនមែនក្នុងន័យគោរពច្បាប់ ឬគិតពីសុវត្ថិភាពផ្ទាល់ខ្លួន។

សូមបញ្ជាក់ថា ករណីជិះម៉ូតូអត់ពាក់មួកសុវត្ថិភាព បើយោងតាមអនុក្រឹត្យស្ដីពីការពិន័យអន្តរការណ៍ចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក ជំពូក៣ មាត្រា៦ បានកំណត់ពីពិន័យអន្តរការណ៍ ចំពោះអ្នកបើកបរទោចក្រយានយន្ត ឬទោចក្រយានយន្តសណ្ដោងរ៉ឺម៉ក ឬត្រីចក្រយានយន្ត ចំនួនទឹកប្រាក់ ១៥០០០រៀល។

តាមអំពើល្មើស ដូចមានចែងក្នុង វាក្យខណ្ឌ ក សម្រាប់អ្នកបើកបរទោចក្រយានយន្ត និងអ្នករួមដំណើរ ព្រមទាំងកុមារដែលមានអាយុលើសពី ៣ឆ្នាំឡើងទៅ មិនពាក់មួកសុវត្ថិភាព ឬពាក់មួកសុវត្ថិភាពមិនត្រឹមត្រូវតាមស្តង់ដារជាតិ ឬពាក់មួកសុវត្ថិភាពដោយមិនដាក់គន្លឹះខ្សែសុវត្ថិភាព។

អត្ថបទ៖ ពៅ រក្សា