Barca រៀបចំកិច្ចព្រមព្រៀងថ្មីដើម្បីចងជើង Messi ដែលនឹងអាចចាកចេញ១៨ខែទៀត

2018-10-14 07:01:40
ចំនួនមតិ 0 | ចំនួនចែករំលែក 0

ចន្លោះមិនឃើញ

Barcelona កំពុងរៀបចំកិច្ចព្រមព្រៀងថ្មីដើម្បីចងជើង Messi ដែលនឹងអាចចាកចេញពី Camp Nou នៅក្នុងរយៈពេល១៨ខែខាងមុខទៀត ដោយក្លឹបនឹងមិនទទួលបានតម្លៃខ្លួនពីការផ្ទេររបស់កំពូលកីឡាករនេះឡើយ ពោលគឺចេញទៅដោយ free។

កិច្ចព្រមព្រៀងថ្មីនេះនឹងពន្យារកុងត្រា Messi រហូតដល់ឆ្នាំ ២០២២ ឬ ២០២៣ គឺពន្យារឲ្យយូរបំផុតតាមដែលអាចធ្វើទៅបាន ដែលមានន័យថាពេលនោះម្ចាស់ពាន Ballon d'Or ៥សម័យកាលនឹងមានអាយុ៣៦ឆ្នាំ ហើយក្លឹបកាតាឡាន់មានបំណងចង់ឲ្យ Messi ព្យួរស្បែកជើង ហើយនឹងក្លាយជាកីឡាករលេងឲ្យក្លឹបតែ១ពេញមួយអាជីព។

Messi វ័យ៣១ឆ្នាំ បច្ចុប្បន្នកំពុងជាប់កុងត្រាជាមួយ Barcelona រហូតដល់ឆ្នាំ ២០២១។ ប៉ុន្តែយោងតាមសារព័ត៌មានអេស្ប៉ាញ Mundo Deportivo បានឱ្យដឹងថា បើទោះជាកិច្ចសន្យារបស់ Messi ដល់ឆ្នាំ ២០២១ ក៏ពិតមែន ប៉ុន្តែមានលក្ខខណ្ឌពិសេសមួយដែលតារាឆ្នើមអាហ្សង់ទីនអាចចាកចេញពីក្លឹបត្រឹមឆ្នាំ ២០២០។

ការដែលក្លឹបអ្នកមានបុណ្យសម្រេចបញ្ចូលលក្ខខណ្ឌ "ផ្តាច់កុងត្រាពិសេស" ទៅក្នុងកិច្ចសន្យា ព្រោះមានបំណងចង់ផ្ដល់ចំណងដៃដល់កីឡាករដែលធ្លាប់បានផ្ដល់អ្វីគ្រប់យ៉ាងដល់ក្លឹប។ ករណីកន្លងមកមានដូច Xavi និង Andres Iniesta ដែលបានចាកចេញពីអេស្ប៉ាញ ប៉ុន្តែពួកគេនៅតែអាចទៅបន្តអាជីពនៅប្រទេសកាតា និង ជប៉ុន។

បច្ចុប្បន្ន ថ្លៃផ្តាច់កុងត្រារបស់ Messi មានតម្លៃ ៧០០ លានអឺរ៉ូ (ប្រមាន ៨១០ លានដុល្លារ) ជាការដាក់ថ្លៃមិនចង់លក់ដើម្បីទប់ស្កាត់ការចាប់អារម្មណ៍ពីសំណាក់ Paris Saint-Germain ឬ Man City៕