មិនត្រឹមជាព្រឹត្តិការណ៍វប្បធម៌កម្ពុជា-ជប៉ុន Cosplayក៏ជាកម្មវិធីសប្បុរសធម៌យុវជនជំនាន់ក្រោយមិនគួររំលង
- 2018-10-14 11:52:38
- ចំនួនមតិ 0 | ចំនួនចែករំលែក 0
មិនត្រឹមជាព្រឹត្តិការណ៍វប្បធម៌កម្ពុជា-ជប៉ុន Cosplayក៏ជាកម្មវិធីសប្បុរសធម៌យុវជនជំនាន់ក្រោយមិនគួររំលង
ចន្លោះមិនឃើញ
កម្មវិធី "តោះ! ទៅ Cosplay " នឹងលេចឡើងនៅកម្ពុជាជាលើកទី៥ នៅថ្ងៃទី ២៨ តុលា ២០១៨ខាងមុខនេះ ចាប់ពីម៉ោង ៩ព្រឹក ដល់ ៥ល្ងាច នៅមជ្ឈមណ្ឌលសហប្រតិបត្តិការកម្ពុជា កូរ៉េ CKCC ក្នុងសាកលវិទ្យាល័យភូមិន្ទភ្នំពេញ។ ព្រឹត្តិការណ៍វប្បធម៌ទំនើបនេះ ត្រូវបានគាំទ្រពីស្ថានទូតជប៉ុននៅកម្ពុជា ហើយត្រូវបានអនុញ្ញាតឲ្យចូលជាកម្មវិធីផ្លាស់ប្ដូរវប្បធម៌រវាងប្រទេសទាំងពីរដើម្បីចូលរួមអបអរខួបមិត្តភាព ៦៥ឆ្នាំរវាងកម្ពុជា និង ជប៉ុន។
ដូច្នេះ "តោះ! ទៅ Cosplay "ឆ្នាំនេះកាន់តែធំជាងឆ្នាំមុនៗ ជាមួយកម្មវិធីបង្ហាញសកម្មភាពសិល្បៈវប្បធម៌ជាច្រើនសម្បូរបែបរបស់ជប៉ុន និងកម្ពុជា ដែលមានដូចជា Cosplay Fashion Show ការសម្ដែង Role Play ការបង្ហាញពីវប្បធម៌ម្ហូបអាហារឆ្ងាញ់ៗរបស់ជប៉ុន និងខ្មែរ ពិសេសគឺ ការសម្ដែងរបាំល្ខោនខោល ល្ខោនស្បែក និងប្រដាល់គុណខ្មែរ និងការប្រកួតកីឡាអេឡិចត្រូនិកផងដែរ។ នេះបើតាមការឲ្យដឹងពីលោក វុធ សារាណាដេនកា តំណាងក្រុមការងាររៀបចំកម្មវិធីនេះ ថ្លែងក្នុងឱកាសសន្និសីទសារព័ត៌មានកាលពីថ្ងៃទី១៣ តុលាកន្លងទៅនេះនៅ ភោជនីយដ្ឋាន Samba ទួលគោក។
លោកបន្តថា៖ «អ្វីដែលពិសេសខុសប្លែកពីឆ្នាំមុនៗនោះ Cosplay 2018នេះ នឹងមានការអញ្ជើញចូលរួមពីតារា Cosplay ដ៏ល្បីឈ្មោះពីជប៉ុន គឺកញ្ញា Nana Pink និងអ្នកជំនាញថតរូបល្បីឈ្មោះពីជប៉ុន និង Net idolខ្មែរដ៏ស្រស់ស្អាត កញ្ញា ដារីណា ទៀងផង»។
«នេះមិនមែនគ្រាន់តែជាព្រឹត្តិការណ៍ដោះដូរវប្បធម៌ជប៉ុន-ខ្មែរប៉ុណ្ណោះទេ តែក៏ជាកម្មវិធីសប្បុរសធម៌មួយដោយយើងនឹងយកប្រាក់ដែលបានមកពីការលក់សំបុត្រចូលរួម ទៅជួយដល់កុមារក្រីក្រដែលកំពុងរស់នៅ ក្នុងគំនរសំរាមក្នុងតំបន់ស្ទឹងមានជ័យ និងឧបត្ថម្ភសហគមន៍សិល្បៈបុរាណខ្មែរ»។ លោកបញ្ជាក់បន្ថែម។
["Let's Cosplay"](https://www.facebook.com/Narutail-Guild-509463999172047/?eid=ARCYsvVXhlzIYwXNDx1zQYDWs1Q0xLBs4wOVCZLwkN_2zGFC-yfb6O8yJsrH-xMpOfh1mpAMgl_O8V8a) លេចឡើងដំបូងបង្អស់នៅកម្ពុជាក្នុងឆ្នាំ ២០១៣ ដោយក្រុមយុវជនស័្មគ្រចិត្ត Nuratail Guild និងទទួលបានការគាំទ្រពីស្ថានទូតជប៉ុនប្រចាំនៅកម្ពុជា ដោយបានទាក់ទាញអ្នកចូលរួមកាន់តែច្រើនជារៀងរាល់ឆ្នាំ។ ក្នុងឆ្នាំ ២០១៧ មានអ្នកចូលរួមដល់ទៅ ៨០០នាក់ ហើយសម្រាប់ឆ្នាំ ២០១៨នេះ ព្រឹត្តិការណ៍នេះត្រូវបានគេរំពឹងថានឹងមានអ្នកចូលរួមប្រមាណ ១៥០០នាក់។
សំបុត្រចូលរួមលេងកម្សាន្តក្នុងព្រឹត្តិការណ៍វប្បធម៌នេះ ១ តម្លៃ ៤ដុល្លារ។ ចាប់អារម្មណ៍ចូល អាចទាក់ទងទិញសំបុត្របានលេខ 015 47 80 96 ឬ តាមរយៈ Email : narutailguild@gmail.com ៕