គ្រូកម្ពុជាផ្ញើសារទៅអ្នកគាំទ្រ មុនការប្រកួតទល់សិង្ហបុរីល្ងាចនេះ

2018-10-16 02:28:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមគោព្រៃកម្ពុជា នឹងបើកទ្វាផ្ទះរបស់ខ្លួនលេងទល់ក្រុមខ្លាំងសិង្ហបុរី នាវេលាម៉ោង ៦:៣០ នាទីល្ងាចនេះនៅពហុកីឡដ្ឋានជាតិ សម្រាប់ការប្រកួតមិត្តភាពអន្តរជាតិលើកចុងក្រោយមុនការប្រកួតផ្លូវការ AFF Suzuki Cup 2018 ដែលនឹងមកដល់នៅខែក្រោយ។

លោក Felix Agustin Gonzalez Dalmas

ទាក់ទងការប្រកួតល្ងាចនេះលោក Felix Agustin Gonzalez Dalmas គ្រូបង្វឹករបស់ក្រុមកម្ពុជាបានឲ្យដឹងថា សូមអ្នកគាំទ្រកុំទាន់គិតទៅលើលទ្ធផលខ្លាំងពេក ពីព្រោះបច្ចុប្បន្នលោកកំពុងតែធ្វើរៀបចំទម្រង់លេងថ្មីសម្រាប់កម្ពុជា។ ជាការពិតលទ្ធផលវាអាចប៉ះពាល់ដល់អារម្មណ៍អ្នកគ្រប់គ្នា ប៉ុន្តែលោកសូមផ្ញើសារថា អ្នកគាំទ្រគួរតែគិតពីវិស័យបាល់ទាត់កម្ពុជានាពេលអនាគតវិញ។

លោកបន្ថែមថា បើចង់ឲ្យបញ្ជាក់ពេលណាទើបកីឡាករកម្ពុជាទាំងអស់ អាចយល់ពីអ្វីដែលលោកចង់បានគឺមិនអាចឆ្លើយបាន។ លោកអាចនិយាយបានត្រឹមថា លោកមានពេលត្រឹមតែ ២ ឆ្នាំប៉ុណ្ណោះ ដើម្បីរៀបចំប្រព័ន្ធលេងថ្មីមួយជូនកម្ពុជា។

ក្រុមគោព្រៃកម្ពុជា បានធ្វើការប្រកួតចំនួន ២ លើករួចមកហើយ ក្រោមការដឹកនាំរបស់លោក Felix Agustin Gonzalez Dalmas និង Honda ហើយល្ងាចនេះជាការប្រកួតទី៣ ខណៈពីរលើកកន្លងមកកម្ពុជាមិនទាន់ឈ្នះនៅឡើយ ដោយចាញ់ក្រុមខ្លាំងម៉ាឡេស៊ី ៣-១ និងស្មើទីម័រខាងកើត ២-២៕