ក្រុមហ៊ុនកោះសង្សារ ទិញដីរាប់រយហិចតានៅសៀមរាប បង្កើតរីសតទី២តម្លៃ ២៥០លានដុល្លារ

2018-10-17 03:08:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនអភិវឌ្ឍន៍កោះសង្សារ បានប្រកាសអភិវឌ្ឍគម្រោងអភិវឌ្ឍថ្មីទី២របស់ខ្លួនដែលមានឈ្មោះថា ‘Song Saa Reserve’ ស្ថិតនៅក្នុងខេត្តសៀមរាប ដោយគ្រោងនឹងចាយទុនវិនិយោគ ២៥០លានដុល្លារ តាមរយៈការស្វែងរកដៃគូអភិវឌ្ឍ។

ទីតាំងគម្រោងសង្សារទី២

លោក Rory Hunter សហស្ថាបនិក Song Saa Collectives ឲ្យដឹងថា គម្រោងនេះ "យើងមិនមែនជាអ្នកអភិវឌ្ឍន៍នោះទេ ដោយយើងប្រកាសឲ្យអ្នកវិនិយោគដទៃចាប់អារម្មណ៍រកស៊ីក្នុងវិស័យបដិសណ្ឋារកិច្ច បណ្ដាក់ទុនជាមួយយើង" ។

លោក Rory Hunter

អ្នកស្រី អាន ធីតា នាយិកានៃក្រុមហ៊ុន CBRE ដែលទទួលបានសិទ្ធិក្នុងការលក់គម្រោងនេះ ពន្យល់បន្ថែមថា កន្លងមក នៅគម្រោងទី១ កោះសង្សា នៅខេត្តព្រះសីហនុត្រូវបានអភិវឌ្ឍ និងគ្រប់គ្រងដោយក្រុមហ៊ុនផ្ទាល់ ប៉ុន្តែគម្រោងថ្មីទី២នេះ ក្រុមហ៊ុនជាម្ចាស់ដី ឯអ្នកចង់វិនិយោគ អាចបណ្ដាក់ទុនរួមយ៉ាងហោចណាស់ ១០លានដុល្លារឡើង មានសិទ្ធសាងសង់សណ្ឋាគារ វីឡា លំនៅដ្ឋាន ឧទ្យានអេកូធម្មជាតិ និងផ្សារទំនិញជាដើម។

អ្នកស្រី អាន ធីតា

អ្នកស្រី បន្ថែមថា បច្ចុប្បន្នមានក្រុមហ៊ុនបរទេសប្រមាណ ៣ ចាប់ចិត្តគម្រោងនេះ រួមមានអ្នកវិនិយោគពី សិង្ហបុរី ហុងកុង និងតៃវ៉ាន់។

គម្រោងសង្សារទី២នេះ មានចម្ងាយ ៥នាទី ពីប្រាសាទបន្ទាយស្រី មានផ្ទៃដីសរុប ១២៥ ហិកតា មានបឹងមួយទំហំ ៣៥ហិចតា ស្ថិតនៅចំកណ្ដាល ដែលតំបន់នេះ ក្រុមហ៊ុនខាងលើបានទិញទុកពីប្រជាជនរស់នៅក្នុងតំបន់នោះ ហើយបែកចែកជា ១៩ ឡូតិ៍ សម្រាប់អភិវឌ្ឍន៍។ យ៉ាងណាមិញ គម្រោងអភិវឌ្ឍបដិសណ្ឋការកិច្ចបែប អ៊ីកូ-ទេសចរណ៍ មួយនេះ នៅមិនទាន់បានកំណត់កាលបរិច្ចេទនៃការចាប់ផ្តើមអភិវឌ្ឍ តែរំពឹងថានឹងចេញរូបរាងនៅ៥ឆ្នាំក្រោយ៕

អត្ថបទ៖ ស៊ិន សាវ៉េត