ធ្លាប់ជួបហានិភ័យពេលទិញលក់ដី ឬផ្ទះ មកសិក្ខានេះ ជួបសុទ្ធតែអ្នកជំនាញរៀនសូត្រឥតគិតថ្លៃ

2018-10-17 04:15:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាប់ពីម៉ោង ៨ព្រឹកដល់ ១២ថ្ងៃត្រង់នៅសណ្ឋាគារ Raffles Hotel Le Royal នឹងមានសិក្ខាសាលាស្តីពី នីតិវិធីកាត់បន្ថយហានិភ័យក្នុងការទិញលក់អចលនទ្រព្យ ដែលរៀបចំឡើងដោយគ្រឹះស្ថានមីក្រូហិរញ្ញវត្ថុ FIRST FINANCE។

សិក្ខាសាលាខាងលើ នឹងមានការចូលរួមពីវាគ្មិន ដែលមកពីក្រសួងរៀបចំដែនដីនគរូបនីយកម្ម និងសំណង់ និងវាគ្មិនដែលអញ្ជើញពីអគ្គនាយកដ្ឋានពន្ធដារផងដែរ។

លោកស្រី ជុន សុថានី អគ្គនាយិកា គ្រឹះស្ថានមីក្រូហិរញ្ញវត្ថុ FIRST FINANCE បានបង្ហើបប្រាប់ Sabayពីគោលបំណងរបស់សិក្ខាសាលាថា៖ "តាមរយៈបទពិសោធន៍ជាង ១០ឆ្នាំមកនេះ ក្នុងនាមជាគ្រឹះស្ថានមីក្រូហិរញ្ញវត្ថុដែលផ្តល់កម្ចីទាក់ទងនឹងលំនៅដ្ឋានខ្នាតតូច ដល់ប្រជាជន ដែលមានចំណូលទាប និងមធ្យម យើងខ្ញុំបាន និងនៅតែឃើញសាធារណៈជនជួបប្រទះនូវបញ្ហាជាច្រើនក្នុងការទិញលក់ដីធ្លី ឬផ្ទះសម្បែង"។

ជាមួយគ្នានេះលោកស្រី បានបន្តឱ្យដឹងទៀតថា៖ "ការទិញដី ឬផ្ទះដែលមិនមានប្រវត្តិច្បាស់លាស់ ឬទិញពីម្ចាស់ដីឡូត៍ ឬបុរីដែលមិនមានច្បាប់ត្រឹមត្រូវ ដី ឬផ្ទះដែលមានប្លង់ជាន់គ្នា ឬយល់ព្រមទទួលយកប្លង់ទន់ នៅពេលដែលប្លង់ដើមជាប្លង់រឹង ឬព្រមទទួលការផ្ទេរសិទ្ធិត្រឹមភូមិ/ឃុំ ដើម្បីបញ្ចៀសការបង់ពន្ធជាដើម។ ទង្វើទាំងនេះអាចធ្វើឲ្យពួកគេជួបហានិភ័យ ក្នុងការបាត់បង់សិទ្ធិគ្រប់គ្រងអចលនទ្រព្យបាន។ ខ្ញុំជឿជាក់យ៉ាងមុតមាំថា តាមរយៈការចូលរួមពីសំណាក់វាគ្មិនមកពីក្រសួងដែលពាក់ព័ន្ធ អ្នកចូលរួមនឹងទទួលបានចំណេះដឹងបន្ថែម ក្នុងការកាត់បន្ថយហានិភ័យក្នុងការទិញដី ឬផ្ទះ សម្រាប់បរិយាកាសទីផ្សារអចលនទ្រព្យដែលកំពុងហក់ឡើងបែបនេះ"។

លោកស្រីអគ្គនាយិកាបានបញ្ជាក់បន្ថែមថា សិក្ខាសាលាស្តីពី នីតិវិធីកាត់បន្ថយហានិភ័យក្នុងការទិញលក់អចលនទ្រព្យ ខាងមុខនេះនឹងបើកទូលាយជូនសាធារណជនចូលរួមដោយឥតគិតថ្លៃ ព្រមជាមួយការពិសារអាហារថ្ងៃត្រង់រួមគ្នាផងដែរ៕

អត្ថបទ៖ ថា ម៉ាលីដា

ពាក្យទាក់ទង