ស្ម័គ្រចិត្តមែនៗ ក្រុមការងារធានារ៉ាប់រងអាយុជីវិតធំ១ ចុះទៅសង់ផ្ទះផ្ទាល់ដៃ ពេញមួយសប្តាហ៍នៅសៀមរាប

2018-11-13 07:00:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមការងារស្ម័គ្រចិត្តប្រហែល៨០នាក់មកពីផ្នែកទីផ្សារចំនួន ១៤ នាក់របស់ ក្រុមហ៊ុនព្រូដិនសលអាស៊ី បានចូលរួមសហការជាមួយ អង្គការលំនៅឋានមនុស្សជាតិកម្ពុជា ដើម្បីសាងសង់ផ្ទះចំនួន ៦ខ្នង និងជួសជុលអគារសិក្សា ១ខ្នង ក្នុងស្រុកបន្ទាយស្រី ខេត្តសៀមរាប។

កម្មវិធីនេះធ្វើឡើងស្របតាមការប្តេជ្ញាចិត្តរបស់ខ្លួន ក្នុងការជួយធ្វើឱ្យជីវភាពរស់នៅក្នុងសហគមន៍ងាយរងគ្រោះក្នុងអាស៊ី មូលនិធិព្រូដិនស៍ ជាមួយនឹង ក្រុមហ៊ុនព្រូដិនសលកម្ពុជា។ កម្មវិធីស្ម័គ្រចិត្តរយៈពេលពេញមួយសប្តាហ៍នេះ ចាប់ផ្តើមពីថ្ងៃទី ៤ ដល់ ថ្ងៃទី១០ ខែវិច្ឆិកា បានធ្វើឡើងក្នុងភូមិរុន ដែលជាភូមិដាច់ស្រយាលមួយ ចម្ងាយប្រហែល៤០គីឡូម៉ែត្រពីក្រុងសៀមរាប។

លោក ម៉ាក ហ្វ៊ែនស៊ី (Marc Fancy) នាយកប្រតិបត្តិ នៃមូលនិធិព្រូដិនស៍ ដែលជាមូលនិធិអភិវឌ្ឍសហគមន៍ប្រចាំតំបន់អាស៊ីរបស់ ក្រុមហ៊ុនព្រូដិនសលអាស៊ី បានឱ្យដឹងថា បេសកកម្មរបស់មូលនិធិ គឺដើម្បីវិនិយោគលើសហគមន៍នៅទូទាំងតំបន់អាស៊ី តាមវិធីដែលមានប្រសិទ្ធភាព និងមានអត្ថន័យ។ លោកបានបន្តឱ្យដឹងទតថា នេះជាលើកដំបូងបំផុតដែល ព្រូដិនសល បានរៀបចំកម្មវិធី PRUVolunteer នៅប្រទេសកម្ពុជា ហើយវាពិតជាអស្ចារ្យមែន។ ការសាងសង់ផ្ទះ គឺជាវិធីដ៏ល្អមួយដើម្បីជួយគ្រួសារដែលត្រូវការវា។

លោក ផល វិននើរ បុគ្គលិកស្ម័គ្រចិត្តម្នាក់មកពី ក្រុមហ៊ុនព្រូដិនសលកម្ពុជា បាននិយាយថា លោកមានមោទនភាពដែលបានចូលរួមក្នុងកម្មវិធីនេះ។ "ខ្ញុំមិនត្រឹមតែបានរួមចំណែកដល់សហគមន៍តាមរយៈការសាងសង់ផ្ទះជូនប្រជាពលរដ្ឋក្រីក្រប៉ុណ្ណោះទេ ថែមទាំងបានរាប់អានមិត្តភ័ក្តថ្មី ដែលជាបុគ្គលិក ក្រុមហ៊ុនព្រូដិនសល មកពីប្រទេសផ្សេងៗគ្នាក្នុងតំបន់អាស៊ី។”

លោក អ៊ុំ ភឿន តំណាងរបស់អង្គការលំនៅឋានមនុស្សជាតិកម្ពុជា បានមានប្រសាសន៍ថា៖ ”ដោយស្របតាមចក្ខុវិស័យរបស់យើង ក្នុងការជួយលើកកម្ពស់សុខុមាលភាពរបស់ប្រជាពលរដ្ឋ កម្មវិធី PRUVolunteer ធ្វើឱ្យមានការផ្លាស់ប្តូរយ៉ាងសំខាន់នៅក្នុងសហគមន៍ក្នុងខេត្តសៀមរាប ដោយក្រុមអ្នកស្ម័គ្រចិត្តជួយបង្កើនជីវភាពរស់នៅ តាមរយៈការសាងសង់ផ្ទះ គាំទ្រដោយអង្គការលំនៅឋានមនុស្សជាតិកម្ពុជា។”

តាមរយៈកម្មវិធីនេះ អ្នកស្ម័គ្រចិត្តរាប់រយនាក់មកពី ក្រុមហ៊ុនព្រូដិនសល បានជួយ សាងសង់ផ្ទះជូនប្រជាពលរដ្ឋ ដែលរងផលប៉ះពាល់ដោយគ្រោះរញ្ជួយដី និងរលកយក្សស៊ូណាមី នៅក្នុងប្រទេសជប៉ុនកាលពីឆ្នាំ ២០១១ និងចន្លោះឆ្នាំ ២០១៤ និង ២០១៧ បន្ទាប់ពីមានព្យុះកំណាច និងទឹកជំនន់នៅប្រទេសម៉ាឡេស៊ី ប្រទេសវៀតណាម ប្រទេសឥណ្ឌូនេស៊ី និងប្រទេសហ្វីលីពីន កម្មវិធីនេះបានជួយសាងសង់សាលារៀន ផ្ទះសំបែង និងទូកនេសាទឡើងវិញ សម្រាប់ជនរងគ្រោះដោយសារគ្រោះមហន្តរាយធម្មជាតិទាំងនោះ៕

អត្ថបទ៖ ថា ម៉ាលីដា

ពាក្យទាក់ទង