ព្រឹទ្ធាចារ្យឯកទេសល្ខោនបាសាក់ពីសម័យសង្គមរាស្រ្ត អ៊ុំ សាមិត‌ លាចាកលោកនៅថ្ងៃនេះ

2018-11-15 07:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹទ្ធាចារ្យនាដភក្ដីនិម្មិត អ៊ុំ សាមិត‌ អតីតតួ "តេជោមាស" ឯកទេសល្ខោនបាសាក់តាំងពីសម័យសង្គមរាស្ត្រនិយម បានអនិច្ចកម្ម ក្នុងជន្មាយុ ៨៣ឆ្នាំ ដោយជំងឺបេះដូង នៅមន្ទីរកាល់ម៉ែត្រ ក្នុងថ្ងៃនេះ ដែលជាដំណឹងយ៉ាងក្រៀមក្រំបំផុត។

បើតាមលោក អ៊ុំ វិបុល កូនប្រុសទី៣ ចំណោម៤នាក់ របស់ព្រឹទ្ធាចារ្យ ឲ្យដឹងថា ឪពុកខ្លួនតែងមានជំងឺប្រចាំកាយ ដូចជា សួត បេះដូង និង ខ្សោយអស់កម្លាំង។ ជាញឹកញាប់ វីរៈសិល្បកររូបនេះ តែងទៅមន្ទីរពេទ្យ ដើម្បីព្យាបាលជំងឺ។

នៅថ្ងៃកើតហេតុ លោកមានអាការៈចុកឆ្អឹងខ្នង និងទ្រូងយ៉ាងខ្លាំង រហូតទ្រាំមិនបាន គ្រួសារក៏សម្រេចបញ្ជូនទៅមន្ទីរពេទ្យកាល់ម៉ែត្រ។ ក្រោយការពិនិត្យ គ្រូពេទ្យទាមទារឲ្យមានការវះកាត់ ដោយចំណាយអស់២ពាន់ដុល្លារ តែភ្លាមនោះក្រុមគ្រួសារ មិនទាន់សម្រេចយល់ព្រមនោះទេ។ ដោយស្ថានជំងឺខ្លាំង សុខភាពខ្សោយ និងវ័យកាន់តែជរាផងនោះ ព្រឹទ្ធាចារ្យ អ៊ំ សាមិត ក៏ដាច់ខ្យល់ លាចាកលោក យ៉ាងក្រៀមក្រំបំផុត។

ក្រុមគ្រួសារ សម្រេចតម្កល់សពនៅផ្ទះសិន លុះដល់ថ្ងៃស្អែក វេលាម៉ោង ៤ល្ងាច នឹងចាត់ចែងបូជាសពនៅវត្តទឹកថ្លា។ ក្នុងនោះដែរ ក្រមគ្រួសារសព សូមអំពាវនាវដល់សប្បុរសជនជិតឆ្ងាយ ចូលរួមជាថវិកា ក៏ដូចជាការឧបត្ថម្ភផ្សេងៗតាមសទ្ធា ព្រោះក្រុមគ្រួសារលោក កំពុងស្ថិតក្នុងការលំបាក សម្រាប់រៀបចំពិធីឲ្យបានសមរម្យ។

គួរបញ្ជាក់ថា ព្រឹទ្ធាចារ្យនាដភក្ដីនិម្មិត អ៊ុំ សាមិត‌ បានទទួលគោរមងារថ្នាក់ជាតិពីព្រះមហាក្សត្រកម្ពុជា មរតកមនុស្សមនុស្យរស់ ក្នុងចំណោម១៧រូប។ លោក ជាវីរៈសិល្បករ ផ្នែកល្ខោនបាសាក់ តាំងពីទស្សវត្សទី៦០ ដោយបានបន្សល់ស្នាដៃសិល្បៈរាប់មិនអស់ ដល់កូនចៅជំនាន់ក្រោយ៕

អត្ថបទ៖ លឹម សុនា