ប្រតិបត្តិករទូរគមនាគមន៍ ៨៧ ភាគរយ បានចូលរួមវិភាគទានដល់មូលនិធី ស.អ
- 2018-12-18 02:38:11
- ចំនួនមតិ 0 | ចំនួនចែករំលែក 0
ប្រតិបត្តិករទូរគមនាគមន៍ ៨៧ ភាគរយ បានចូលរួមវិភាគទានដល់មូលនិធី ស.អ
ចន្លោះមិនឃើញ
ក្រុមប្រឹក្សាមូលនិធិ ស.អ.(មូលនិធិកសាងសមត្ថភាពនិងការស្រាវជ្រាវនិងការអភិវឌ្ឍលើវិស័យទូរគមនាគមន៍ បច្ចេកវិទ្យាគមនាគមន៍និងព័ត៌មាន) បានរៀបចំសន្និសីទសារព័ត៌មាន ដើម្បីបង្ហាញពីលទ្ធផលនៃការអនុវត្តគម្រោងមូលនិធិនៃការកសាងសមត្ថភាពនិងការស្រាវជ្រាវនិងការអភិវឌ្ឍលើវិស័យទូរគមនាគមន៍ បច្ចេកវិទ្យាគមនាគមន៍និងព័ត៌មានឆ្នាំ២០១៧ នៅទីស្តីការក្រសួងប្រៃសណីយ៍និងទូរគមនាគមន៍។
ឯកឧត្តម កាន ច័ន្ទមេត្តា រដ្ឋលេខាធិការក្រសួងប្រៃសណីយ៍និងទូរគមនាគមន៍ និងជាអនុប្រធានទី១នៃក្រុមប្រឹក្សាមូលនិធិ ស.អ. បានឲ្យដឹងថា **មានប្រតិបត្តិករទូរគមនាគមន៍ចំនួន ៨៧% (ប៉ែតសិបប្រាំពីរភាគរយ)** បានបង់វិភាគទានចូលមូលនិធិស.អ. ដើម្បីប្រើប្រាស់ក្នុងការទ្រទ្រង់ និងលើកកម្ពស់ដល់ការកសាងសមត្ថភាព ការស្រាវជ្រាវ និងការអភិវឌ្ឍវិស័យទូរគមនាគមន៍ បច្ចេកវិទ្យាគមនាគមន៍ និងព័ត៌មាន។
មូលនិធិស.អ.ដែលបង្កើតឡើងក្នុងឆ្នាំ២០១៧ ដែលថវិកាបានយកទៅអនុវត្តគម្រោងជាច្រើនរួមមាន៖
១. ការផ្តល់អាហារូបករណ៍ដល់និស្សិតសិក្សាផ្នែកបច្ចេកវិទ្យាគមនាគមន៍ និងព័ត៌មាន ចំនួន ៨៤ (ប៉ែតសិបបួន) នាក់ (៣០នាក់នឹងចូលរៀនក្នុងឆ្នាំ២០១៩) ដែលក្នុងនោះ មានអាហារូបករណ៍ទៅសិក្សានៅប្រទេសបារាំងថ្នាក់អនុបណ្ឌិតចំនួន ០៣ (បី) រូប និងបរិញ្ញាបត្រសិក្សាក្នុងស្រុកចំនួន ៨១ (ប៉ែតសិបមួយ) រូប និងការផ្តល់ថវិកាទ្រទ្រង់វគ្គបណ្តុះ-បណ្តាលជំនាញ ប.គ.ព ជាក់ស្តែង ដល់និស្សិតបានចំនួន ២គម្រោងរួមមាន Soft Skill Training ក្នុងវិស័យ ទ-បគព និងកម្មវិធី Cambodia ICT Volunteer។ ២. ការស្ថាបនាបន្ទប់កុំព្យូទ័រនៅតាមវិទ្យាល័យចំនួន ២០ (ម្ភៃ)ដោយសហការជាមួយក្រសួងអប់រំ យុវជន និងកីឡា។ គួរបញ្ជាក់ផងដែរថា គម្រោងនេះត្រូវបានជជែកពិភាក្សារវាងក្រសួងទាំងពីររួចរាល់ រងចាំការអនុវត្តក្នុងពេលដ៏ខ្លីខាងមុខ។
៣. ផ្តល់ថវិកាដល់ការងារស្រាវជ្រាវចំនួនបី ដែលកិច្ចការស្រាវជ្រាវនឹងចាប់ផ្តើមក្នុងពេលខាងមុខ ដោយការស្រាវជ្រាវទាំងនោះរួមមាន IoT, Data Science និង Khmer Language Processing។ ៤. ការកសាងហេដ្ឋារចនាសម្ព័ន្ធសម្រាប់ការស្រាវជ្រាវ និងអភិវឌ្ឍន៍ក្នុងវិស័យប.គ.ព ដោយបង្កើតបន្ទប់ពិសោធន៍ និងហេដ្ឋារចនាសម្ព័ន្ធទ្រទ្រង់ដល់វិស័យអប់រំ មានដូចជា៖
-Incubation Center នៅវិទ្យាស្ថានបច្ចេកវិទ្យាកម្ពុជា
-Incubation Center នៅសកលវិទ្យាល័យជាតិគ្រប់គ្រង
-ហេដ្ឋារចនាសម្ព័ន្ធទ្រទ្រង់ដល់ការងារគ្រប់គ្រងតាមសាលារៀន
-បន្ទប់ពិសោធន៍ខាងផ្នែកបណ្តាញនៅវិទ្យាស្ថាន NIPTICT
-មជ្ឈមណ្ឌលនវានុវត្តន៍នៅវិទ្យាស្ថាន NIPTICT
៥. ការទ្រទ្រង់សកម្មភាព និងកម្មវិធីមួយចំនួនដើម្បីបង្កើនសហគ្រិនភាពខាងផ្នែកបច្ចេកវិទ្យានៅកម្ពុជា ដោយមាន ទាំងការបណ្តុះបណ្តាលជំនាញ និងមុខរបរ ព្រមទាំងការប្រកួតប្រជែងទាំងក្នុងនិងក្រៅស្រុកចំនួន ០៧ (ប្រាំពីរ) គម្រោង ព្រមទាំងផ្តល់គម្រោង SMEs Go Digital ដែលបានចាប់ផ្តើមតាំងពីឆ្នាំ២០១៧ ក្រោមការសម្របសម្រួលពីក្រសួងប្រៃសណីយ៍ និងទូរគមនាគមន៍, ដឹកនាំដោយក្រសួងឧស្សាហកម្ម និងសិប្បកម្ម និងមានការចូលរួមពីក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម ក្រសួងអប់រំ យុវជន និងកីឡា និងក្រសួងការងារ និងបណ្តុះបណ្តាលវិជ្ជាជីវៈ ហើយគម្រោងនេះនឹងបន្តអនុវត្តនៅឆ្នាំក្រោយៗទៀត។
ឯកឧត្តម កាន ច័ន្ទមេតា្ត បានស្នើឱ្យប្រតិបត្តិករទូរគមនាគមន៍មួយចំនួនតូចដែលមិនទាន់បានបំពេញកាតព្វកិច្ចបង់វិភាគទានមូលនិធិស.អ. ឆ្នាំ២០១៧ រួសរាន់បង់វិភាគទានមុននឹងក្រុមប្រឹក្សាមូលនិធិស.អ. ចាត់វិធានការបន្ទាប់។