មិនសាកតិចថាស្ដាយ ក្បួនថតមេឃពេលរៀបយប់ ឲ្យចេញពណ៌ខៀវ

2019-01-22 06:21:50
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រាន់តែអានចំណងជើង អ្នកប្រាកដជាឆ្ងល់ ម៉េចក៏យប់ ចេញពណ៌ខៀវវិញ? សម្រាប់អ្នកធ្លាប់ថតរូប អាចនឹងទាយដឹងខ្លះៗហើយថា ចំណងជើងនេះចង់និយាយពីអ្វី។ សង្ខេបមកគឺថ្ងៃនេះ ក្រុមការងារនឹងបង្ហាញវិធីសាស្ត្រ ៥ ក្នុងការថតរូបតាមទូរសព្ទបែប landscape ចន្លោះពេលថ្ងៃរៀបលិច និងពេលព្រះអាទិត្យលិចបាត់ ដែលភាសាបច្ចេកទេសគេឲ្យឈ្មោះថា Blue hour photography។

១) តើមេឃពណ៌ខៀវនៅពេលណាខ្លះ?

មេឃពណ៌ខៀវ ជាទូទៅកើតឡើង ២ ដងក្នុងមួយថ្ងៃគឺ មុនពេលថ្ងៃរះឡើង និងក្រោយពេលថ្ងៃរៀបលិច។ ចំណុចនេះចង់សំដៅដល់របៀបកំណត់នាទី ឬរយៈពេលដែលផ្ទៃមេឃបានប្រែប្រួល បង្កើតជាពណ៌ខៀវនៅចន្លោះនាទី ទី២០ ដល់ ៤០។ ឧទាហរណ៍ងាយៗ៖ មុនពេលថ្ងៃរះឡើងម៉ោង ៥:២០ នាទី ដល់ ៥:៤០ នាទីព្រឹក ឬក្រោយពេលថ្ងៃលិចបាត់នៅចន្លោះនាទីនោះ អ្នកនឹងឃើញមេឃពណ៌ខៀវ ជាមិនខាន។

២) ត្រៀមឧបករណ៍ និងទីតាំងត្រូវថត

ក្រោយពេលអ្នកដឹងពីចន្លោះម៉ោងដែលមេឃពណ៌ខៀវហើយ អ្នកត្រូវត្រៀមឧបករណ៍ដូចជា ទូរសព្ទ និងជើង Tripod មួយ។ ជាពិសេសគឺ ត្រូវរកទីតាំងណាទូលាយល្អ ដូចជា ពីលើអគារខ្ពស់ លើឆ្នេរសមុទ្រ លើស្ពាន លើវាលខ្សាច់ ឬវាលស្រែជាដើម ហើយបើកកាមេរ៉ាចោល រួចកំណត់វានៅនឹងល្អមិនឲ្យទូរសព្ទរង្គើ។

៣) កំណត់ម៉ោងឲ្យទូរសព្ទវាថតខ្លួនឯង

បន្ទាប់មកកំណត់មុខងារខ្លះៗដូចជា ISO និង White Balance។ បើអ្នកប្រើ iPhone គ្រាន់តែបើកពន្លឹហើយចុចថតក៏បាន។ ម្យ៉ាងទៀត អ្នកក៏គួរកំណត់ម៉ោងឲ្យទូរសព្ទវាថតខ្លួនឯងចំនួន ១ ឬ២ វិនាទី ឬក៏ប្រើឧបករណ៍ remote ពីចម្ងាយក៏បាន ដើម្បីកុំឲ្យរូបខូចទ្រង់ទ្រាយ។

៤) ថតឲ្យជាប់ភ្លើងអំពូលផង

ការថតរូបបែប Blue hour នេះ បើអ្នករើសទីតាំងនៅក្បែរភ្លើងអំពូល ឬថតយកទិដ្ឋភាពទីក្រុងមានភ្លើងព្រេចៗ នោះរូបអ្នកនឹងកាន់តែស្អាតទាក់ភ្នែក ម្យ៉ាង រូបបែបនេះ ត្រូវការពន្លឺជាចាំបាច់ទាំងភ្លើងពណ៌ក្រហម និងខៀវបញ្ចូលគ្នា។

៥) កុំភ្លេចថតយក File RAW

File RAW ពន្យល់ឲ្យងាយទៅគឺ រូបឆៅ អាចយកកែបាន។ ទូរសព្ទមួយចំនួនអាចថតចឹងបានហើយ ដូចនេះអ្នកគួរតែសាកល្បង។ បើអ្នករើសយករូប png ឬអ្វីផ្សេងក៏បាន គ្រាន់តែពិបាកពេលអ្នកចង់កែថែមឲ្យរូបកាន់តែស្រស់ស្អាត។ តោះ! ចាំកាលទៀត សាកល្បងតិចមើល ថតបានអត់? បើចូលចិត្ត កុំភ្លេចចែករំលែកទៅមិត្តភក្តិបានដឹងផង៕