​បើ​នៅ​តែ​បែប​នេះ នឹង​មាន​ជើង​ឯក​ថ្មី​លើ​ទីផ្សារ​ស្មាតហ្វូន

  • 2019-02-17 02:19:29
  • ចំនួនមតិ 0 | ចំនួនចែករំលែក 0

ចន្លោះមិនឃើញ

កាល​ពី​ឆ្នាំ ២០១៦ លោក Richard Yu ​នាយក​ប្រតិបត្តិ​ក្រុមហ៊ុន Huawei បាន​បង្ហាញ​ក្ដី​ជឿជាក់​ថា​​ក្រុមហ៊ុន​ខ្លួន​នឹង​អាច​ឡើង​លើ Samsung និង Apple នៅ​ឆ្នាំ ២០២១។ ​

ចាប់​តាំង​​ពី​ពេល​នោះ​មក Huawei បាន​ប្រកាស​ជា​រឿយៗ​ពី​គោល​ដៅ​នេះ ហើយ​កាល​ពី​ឆ្នាំ​​ទៅ Huawei អាច​លក់​ស្មាតហ្វូន​បាន​ជាង ២០០ លាន​គ្រឿង​។ អ្វី​កាន់​តែ​អស្ចារ្យ​នោះ​គឺ​ Huawei ​​មិន​បាន​ធ្វើ​ជំនួញ​ជា​ក្រុមហ៊ុន​ផ្គត់ផ្គង់​សេវា​ទូរសព្ទ​នៅ​សហរដ្ឋអាមេរិក​នោះ​ទេ ដែល​នេះ​ជា​ទីផ្សារ​ដ៏​ធំ​មួយ។

ត្បិត​ថា​ខណៈ​ពេល​នេះ​ Huawei ​​កើត​មាន​​រឿងរ៉ាវ​ចម្រូងចម្រាស​ជុំវិញ​រឿង​អាស្រូវ​​ក្ដៅ​គគុក​ ប៉ុន្តែ​ក្រុមហ៊ុន​នេះ​នៅ​តែ​រំពឹង​ថា​​នឹង​អាច​យក​ឈ្នះ​ Samsung ក្លាយ​ជា​ក្រុមហ៊ុន​លក់​ស្មាតហ្វូន​បាន​ច្រើន​ជាង​គេ​ក្នុង​លោក។ តាម​ការ​ចុះ​ផ្សាយ​របស់​ Digitimes ក្រុមហ៊ុន​នេះ​​មាន​គម្រោង​នឹង​លក់​ស្មាតហ្វូន​ឲ្យ​បាន​ ២៥០ លាន​គ្រឿង​នៅ​ឆ្នាំ​នេះ និង​លក់ ៣០០ លាន​គ្រឿង​នៅ​ឆ្នាំ​ក្រោយ។

តាម​ទិន្នន័យ​របស់​ IDC បាន​ឲ្យ​ដឹង​ថា​នៅ​ឆ្នាំ ២០១៨ ក្រុមហ៊ុន Samsung អាច​លក់​ស្មាតហ្វូន​បាន​សរុប​ ២៩២,៣ លាន​គ្រឿង ចំណែក​ Apple លក់​បាន​ ២០៨,៨ លាន​គ្រឿង ឈរ​នៅ​លេខ​ពីរ។ លេខ​បី​គឺ Huawei ដែល​លក់​បាន​ ២០៦ លាន​គ្រឿង។

ត្បិត​ថា​ Huawei បាន​បង្កើត​ផែនការ​ដែល​មើល​ទៅ​មិន​អាច​ទៅ​រួច​មួយ​សម្រាប់​ឆ្នាំ ២០១៨ នេះ ប៉ុន្តែ​​បើ​មើល​តាម​ទំនោរ​ គេ​ជឿជាក់​ថា​ Huawei អាច​ធ្វើ​បាន។ កាល​ឆ្នាំ​មុន​​ចំនួន​លក់​របស់​ Samsung បាន​ធ្លាក់​ចុះ​ ៨% និង Apple ធ្លាក់​ចុះ​ ៣,២% បើ​ធៀប​នឹង​ឆ្នាំ ២០១៧។ ខណៈ​ដែល​ Huawei មាន​ការ​កើន​ឡើង​​រហូត​ដល់ ៣៣,២% ឯណោះ។ ប្រសិន​បើ​ទំនោរ​នេះ​តែ​បន្ត​ Huawei អាច​នឹង​ជា​ស្ដេចក្រាញ់​លើ​ទីផ្សារ​ស្មាតហ្វូន​មិន​ខាន៕​​​​​​​​​

ប្រភព៖ PhoneArena   ប្រែ​សម្រួល៖ សុខហេង