ថៃជូនកាដូពលករខ្មែរជាង ១លាននាក់ទៅលេងស្រុកកំណើត ចេញ-ចូលមិនគិតលុយ
- 2019-02-22 04:40:53
- ចំនួនមតិ 0 | ចំនួនចែករំលែក 0
ថៃជូនកាដូពលករខ្មែរជាង ១លាននាក់ទៅលេងស្រុកកំណើត ចេញ-ចូលមិនគិតលុយ
ចន្លោះមិនឃើញ
ស្ថានទូតកម្ពុជាប្រចាំប្រទេសថៃនៅទីក្រុងបាងកក បានជូនដំណឹងដល់សាធារណជន ជាពិសេសបងប្អូនពលករកម្ពុជា ដែលកំពុងស្នាក់នៅ និងធ្វើការដោយស្របច្បាប់នៅក្នុងព្រះរាជាណាចក្រថៃទាំងអស់ ឲ្យដឹងថា ដើម្បីចូលរួមអបអរក្នុងឱកាសពិធីបុណ្យចូលឆ្នាំប្រពៃណីជាតិខ្មែរនាពេលខាងមុខ រាជរដ្ឋាភិបាលថៃបានឯកភាពជួយសម្រួលដល់បងប្អូនពលករកម្ពុជា ដែលត្រូវធ្វើដំណើរឆ្លងកាត់ព្រំដែន ទៅស្រុកកំណើតនៅព្រះរាជាណាចក្រកម្ពុជា ដោយអនុគ្រោះមិនគិតថ្លៃការរក្សាសិទ្ធិទិដ្ឋាការ (Re-Entry Visa) ចាប់ពីថ្ងៃទី០៥-៣០ ខែមេសា ឆ្នាំ២០១៩។
កន្លងមកពលករដែលកំពុងស្នាក់នៅ និងធ្វើការដោយស្របច្បាប់នៅក្នុងប្រទេសថៃ ដែលមានបំណងឆ្លងកាត់ព្រំដែនទៅប្រទេសកម្ពុជា និងត្រឡប់ចូលមកធ្វើការវិញនៅប្រទេសថៃ ត្រូវស្នើសុំរក្សាសិទ្ធិទិដ្ឋាការ មុននឹងធ្វើដំណើរទៅប្រទេសកម្ពុជា ដើម្បីរក្សាសិទ្ធិទិដ្ឋាការក្នុងការត្រឡប់មកធ្វើការនៅថៃវិញ។
គួរជម្រាបថា តាមច្បាប់អន្តោប្រវេសន៍របស់ព្រះរាជាណាចក្រថៃ ការស្នើសុំរក្សាសិទ្ធទិដ្ឋាការ (Re-Entry Visa) ប្រភេទចេញ-ចូលមួយលើក (Single) មានតម្លៃ១០០០បាត និងប្រភេទចេញ-ចូលច្រើនលើក (Multiple) មានតម្លៃ ៣៨០០បាត។ យោងតាមរបាយការណ៍របស់ក្រសួងការងារចេញផ្សាយកាលពីថ្ងៃទី ១៨ ខែមិថុនា ឆ្នាំ២០១៨ កម្ពុជា-ថៃ រួមគ្នាផ្តល់ភាពស្របច្បាប់ដល់ពលករខ្មែរស្នាក់នៅ និងបម្រើការងារនៅថៃមានចំនួន ១លាន ៧ ម៉ឺននាក់៕
ប្រភព៖ ផេកហ្វេសបុក ស្ថានទូតកម្ពុជាប្រចាំប្រទេសថៃ