ក្រុមមន្រ្តី ចុះទៅត្រួតពិនិត្យ អាងទឹកត្រពាំងថ្ម ប្រឈមនឹងការរីងគោក

2019-02-23 07:53:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ទំនប់អាងទឹកត្រពាំងថ្ម ដែលជាប្រភពទឹកដ៏សំខាន់សម្រាប់ស្រោចស្រពដំណាំ និងជាកន្លែងប្រមូលផ្ដុំសត្វក្រៀល កំពុងប្រឈមនឹងការរីងគោក ដែលពុំធ្លាប់មានពីមុនមក។ ម៉្លោះហើយ ឯកឧត្ដម លឹម គានហោ រដ្ឋមន្រ្តីក្រសួងធនធានទឹកនិងឧតុនិយម បានចុះទៅត្រួតពិនិត្យអំពីស្ថានភាពអាងទឹកត្រពាំងថ្ម ស្ថិតនៅក្នុងស្រុក ភ្នំស្រុក ខេត្តបន្ទាយមានជ័យ។

ចុចអាន៖ អ្នកលក់ដូរនៅអាងទឹកត្រពាំងថ្ម ត្អូញត្អែរពីចំណូលធ្លាក់ចុះពាក់កណ្ដាល ខណៈភ្ញៀវទៅលេងច្រើន

សកម្មភាពរដ្ឋមន្រ្តីក្រសួងធនអានទឹក និងឧតុនិយម ឯកឧត្តម លឹម គានហោ និងក្រុមមន្រ្តីចុះត្រួតពិនិត្យ អាងទឹកត្រពាំថ្ម

យោងតាមផេក ផ្លូវការ របស់ក្រសួងធនធានទឹកនិងឧតុនិយម បានឲ្យដឹងនៅថ្ងៃនេះថា ស្ថានភាពទឹកក្នុងទំនប់អាងទឹកត្រពាំងថ្ម គឺស្ថិតក្នុងស្ថានភាពរីងគោកដែលពុំធ្លាប់ជួបប្រទះនាពេលកន្លងមក។

ប្រភពដដែលបានដកស្រង់ប្រសាសន៍របស់ ប្រធានមន្ទីរធនធានទឹកបានឲ្យដឹងថា បើទោះជាមានការប្រជុំផ្សព្វផ្សាយអំពីសារាចរណែនាំស្ដីពីការចាត់វិធានការថែរក្សាទឹកទុក ដោយមានការចូលរួមពីអាជ្ញាធរឃុំ ស្រុក ខេត្ត និងប្រជាពលរដ្ឋ នាពេលកន្លងមកយ៉ាងណាក៏ដោយ ក៏បច្ចុប្បន្នប្រជាកសិករបានបន្តធ្វើស្រូវប្រាំងលើកទី២ លើផ្ទៃដីចំនួនជាង ៧ ០០០ហិតា ដែលអាចនឹងមានផលប៉ះពាល់មួយភាគធំនាពេលខាងមុខ។

ស្ថិតក្នុងស្ថានភាពបែបនេះ ឯកឧត្ដមរដ្ឋមន្ត្រីក្រសួងធនធានទឹក និងឧតុនិយម បានប្រគល់ភារកិច្ចជូនឯកឧត្តម ចាន់ យុត្ថា រដ្ឋលេខាធិការក្រសួងដឹកនាំការធ្វើប្រឡាយប្រវែង ៦គីឡូម៉ែត្រ ដែលរហូតមកដល់ពេលនេះ សម្រេចបានប្រវែង ២គីឡូម៉ែត្រ រួចហើយ ដើម្បីយកទឹកពីស្ទឹងស្រែងក្នុងខេត្តឧត្តរមានជ័យ បញ្ចូលមកទំនប់អាងទឹកត្រពាំងថ្ម សម្រាប់ដោះស្រាយបញ្ហាប្រឈមដែលបាននឹងកំពុងជួបប្រទះបច្ចុប្បន្ន។

ប្រភពរូបភាព យកពី ផេកក្រសួងធនធានទឹក និងឧតុនិយម

គួររំលឹកថា ការប្រឈមនឹងការរីងគោក នៃអាងទឹកត្រពាំងថ្ម នៅស្រុកភ្នំស្រុក ខេត្តបន្ទាយមានជ័យនេះ គឺកើតមានឡើងបន្ទាប់ពី ព្រះរាជាណាចក្រកម្ពុជា នឹងទទួលរងនូវបាតុភូត អែលនីណូ (El Nino) ដែលនឹងបង្កឲ្យអាកាសធាតុរដូវប្រាំងនេះ មានភាពក្ដៅហួតហែង សីតុណ្ហភាពអតិបរមានៅពេលខ្លះអាចហក់ឡើងដល់ ៤០-៤២ អង្សាសេ។

សូមអានសារទាំងស្រុងខាងក្រោមនេះ