មន្ត្រីជាន់ខ្ពស់ថាអ្នកបើកបរត្រីចក្រយានយន្តក្នុងទីក្រុងពីរម៉ឺនគ្រឿងគ្មានបណ្ណបើកបរ

2019-04-09 05:13:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីជាន់ខ្ពស់គណៈកម្មាធិការជាតិសុវត្ថិភាពចរាចរណ៍ផ្លូវគោកឲ្យដឹងអ្នកបើកបរត្រីចក្រយានយន្តជាង៩០ភាគរយដែលកំពុងបើកបរនៅរាជធានីភ្នំពេញពុំមានបណ្ណបើកបរ។

ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងជាអនុប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក ថ្លែក្នុងកិច្ចប្រជុំត្រួតពិនិត្យលទ្ធផលការងារសុវត្ថិភាពចរាចរណ៍ផ្លូវគោក ប្រចាំត្រីមាសទី១ ឆ្នាំ២០១៩ នាព្រឹកនេះថាត្រីចក្រយានយន្តដែលកំពុងបើកបរធ្វើអាជីវកម្មដឹកអ្នកដំណើរក្នុងរាជធានីភ្នំពេញមានប្រហែលពីរម៉ឺនគ្រឿងឬ៩៨ភាគរយមិនមានបណ្ណបើកបរនោះទេ។

ឯកឧត្តមបបន្ថែមថា៖ «អ្នកបើកបរតុកៗ៩៣ភាគរយអត់ស្គាល់ច្បាប់ចរាចរណ៍ទេ អត់មានបណ្ណបើកបរទេ គាត់បត់ គាត់ចតតែពាស...ពិនិត្យមើលទៅកម្លាំង(យានយន្ត)១៥០ទៅ២០០សេសេ...ឲ្យតែអ្នកធ្វើអាជីវកម្ម ដឹកទំនិញ ដឹកអ្នកដំណើរត្រូវតែមានបណ្ណបើកបរ»។

ឯកឧត្តម ស៊ុន ចាន់ថុល បានស្នើឲ្យមន្ត្រីពាក់ពន្ធរៀបចំបើកវគ្គបណ្ដុះបណ្ដាលរយៈពេលបីខែ ដើម្បីឲ្យអ្នកបើកបរទាំងនោះបានរៀន និងប្រឡងយកបណ្ណបើកបរ។ ក្រោយរយៈពេលបីខែឯកឧត្តមថានឹងមានការពិន័យតាមច្បាប់ចំពោះអ្នកមិនមានបណ្ណបើកបរ។

ឯកឧត្តមឲ្យដឹងថាក្នុងមួយឆ្នាំៗនៅកម្ពុជាគ្រោះថ្នាក់ចរាចរណ៍បានធ្វើឲ្យខាតដល់សេដ្ឋកិច្ចប្រហែល៣៥០លានដុល្លារអាមេរិក ដែលមានការខូចខាតទ្រព្យសម្បត្តិរដ្ឋ ឯកជន និងបាត់បង់កម្លាំងពលកម្ម ជាដើម។

គួរបញ្ជាក់ថាតាមអនុក្រឹត្រពិន័យអន្តរការណ៍ចុះខែមីនា ឆ្នាំ២០១៧ ត្រង់មាត្រា៦ ចែងថាអ្នកបើកបរទោចក្រយានយន្តសណ្ដោងរ៉ឺម៉ក និងត្រីចក្រយានយន្តមិនមានបណ្ណបើកបរត្រូវពិន័យ១៥ ០០០រៀល៕

អត្ថបទ៖ ទូច សុខា