លី ភា សងសឹកជើងខ្លាំងថៃ ទួនប៉េ វិញបានអត់វគ្គពាក់កណ្ដាលផ្ដាច់ព្រ័ត្រនេះ?
- 2019-04-19 08:08:50
- ចំនួនមតិ 0 | ចំនួនចែករំលែក 0
លី ភា សងសឹកជើងខ្លាំងថៃ ទួនប៉េ វិញបានអត់វគ្គពាក់កណ្ដាលផ្ដាច់ព្រ័ត្រនេះ?
ចន្លោះមិនឃើញ
អ្នកប្រដាល់និយាយរដឺន លី ភា អាចឈ្នះខ្លាចាស់ ទួនប៉េ វិញបានទេនាវគ្គពាក់កណ្ដាលផ្ដាច់ព្រ័ត្រពានរង្វាន់របស់សង្វៀន CNC ក្នុងថ្ងៃអាទិត្យនេះ ខណៈទាំងប្រកួតមិត្តភាព និងវិលជុំសន្សំពិន្ទុធ្លាប់ឈឺចិត្តរួចមកហើយ។
លី ភា ២ប្រកួតចុងក្រោយរបស់គេមុនចូលឆ្នាំថ្មីនេះល្អមែនទែន ពោលគឺផ្ដួលថៃឲ្យសន្លប់រហូតឆក់បានឱកាសឡើងមកវគ្គពាក់កណ្ដាលផ្ដាច់ព្រ័ត្រ នាចុងសប្ដាហ៍នេះនៃពានរង្វាន់ ISI PALM ទម្ងន់ ៦០គីឡូក្រាម។ ជើងខ្លាំងមកពីខេត្តបាត់ដំបងរូបនេះ មានការរីកចម្រើនល្អគួរសម ជាពិសេសកម្លាំងមិនសូវអស់ដូចមុនឡើយ ចំណែកស្នៀតកែងក៏មានប្រសិទ្ធភាពពេលនៅកៀកទៀតផង។ ចំណែកទឹកចិត្តប្រយុទ្ធក៏មានភាពជឿជាក់ និងមោះមុតផងដែរ។
ការប៉ះជាថ្មីនេះ បើទោះជា លី ភា រីកចម្រើនយ៉ាងណាក៏មិនអាចមើលស្រាល ទួនប៉េ ឡើយ ព្រោះប្រកួតកន្លងមកចាញ់អ្នកប្រដាល់ឆ្លងដែនពីថៃខាងលើនេះរួចហើយ ខណៈកម្លាំង និងតិចនិកហាក់នៅទាបជាងដែរ។ ទួនប៉េ ជាកីឡាករជើងចាស់របស់ថៃ ធ្លាប់ឆ្លងកាត់សង្វៀនរាប់ភ្លេចទៅហើយ ឡើងប្រដាល់តាំងពី លី ភា មិនទាន់ចេះដាល់មកម្ល៉េះ។
ប្រសិនបើអ្នកលេងគុនខ្មែរខាងលើនៅតែប្រើវិធីសាស្ត្រវ៉ៃដដែលនោះអាចនឹងពិបាកយកឈ្នះ ទួនប៉េ បន្តិច ប៉ុន្តែបើ លី ភា ប្រើភាពវ័យឆ្លាតដូច២ប្រកួតមុននោះអាចនឹងមានឱកាសបានឡើងទៅវគ្គផ្ដាច់ព្រ័ត្របន្តទៀត។
បញ្ជាក់ដែរថា កម្មវិធីប្រកួតដណ្ដើមពានរង្វាន់សង្វៀន CNC ទម្ងន់៦០គីឡូក្រាម បានឈានដល់វគ្គពាក់កណ្ដាលផ្ដាច់ព្រ័ត្រហើយនាថ្ងៃអាទិត្យ ទី២១ មេសា ២០១៩ នេះ ដោយមានកីឡាករកម្ពុជា២រូបត្រូវប្រកួត លី ភា ប៉ះ ទួនប៉េ រីឯ សូត្រ ប៊ុតធី ប៉ះ Vithak Yayuth។ អ្នកឈ្នះ២រូបនឹងត្រូវឡើងទៅវគ្គផ្ដាច់ព្រ័ត្រតែម្ដង៕
ចាន់ រតនា កត់ចំណាំក្បាច់ពិសេសរបស់ Rudy Agutian មុនជួបគ្នាដើមខែក្រោយ
គ្រូស្វាយរៀង ចង់ឈ្នះក្រោន ទុកជាកាដូរអបអរ ក្រោយចូលឆ្នាំឱ្យអ្នកគាំទ្រ