ប្រាសាក់ បរិច្ចាគថវិកាចំនួន 80 លានរៀល ជូនចំពោះកាកបាទក្រហមកម្ពុជា
- 2019-05-09 04:34:25
- ចំនួនមតិ 0 | ចំនួនចែករំលែក 0
ប្រាសាក់ បរិច្ចាគថវិកាចំនួន 80 លានរៀល ជូនចំពោះកាកបាទក្រហមកម្ពុជា
ចន្លោះមិនឃើញ
ប្រាសាក់ ជាគ្រឹះស្ថានឈរលេខរៀងទី 1 ក្នុងវិស័យមីក្រូហិរញ្ញវត្ថុ និងជាគ្រឹះស្ថានធំមួយក្នុងចំណោមធនាគារធំទាំង 5 នៅកម្ពុជា បានបរិច្ចាគថវិកាចំនួន 80 លានរៀល ជូនចំពោះកាកបាទក្រហមកម្ពុជាក្នុងពិធីប្រារព្ធខួបលើកទី 156 ទិវាពិភពលោកកាកបាទក្រហម និងអឌ្ឍចន្ទក្រហម ក្រោមប្រធានបទ «ខ្ញុំស្រលាញ់កាកបាទក្រហមកម្ពុជា» ដើម្បីចូលរួមចំណែកក្នុងសកម្មភាពមនុស្សធម៌ និងអនុលោមតាមតម្លៃស្នូលរបស់ប្រាសាក់ក្នុងការគាំទ្រសុខុមាលភាពសង្គម។
ព្រឹត្តិការណ៍ទិវាអន្តរជាតិកាកបាទក្រហម អឌ្ឍចន្ទក្រហម 8 ឧសភា និងអបអរខួប 100 ឆ្នាំ នៃការបង្កើតសហព័ន្ធអន្តរជាតិ នៃសមាគមកាកបាទក្រហម អឌ្ឍចន្ទក្រហម (1919-2019) បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដោយមានការចូលរួមពីសមាជិកកាកបាទក្រហមកម្ពុជា សមាជិករដ្ឋសភា មន្ត្រីរដ្ឋាភិបាល ម្ចាស់ជំនួយជាតិ និងអន្តរជាតិ អ្នកស្ម័គ្រចិត្តកាកបាទក្រហមកម្ពុជា និងអ្នកតំណាងគណៈកម្មការអន្តរជាតិកាកបាទក្រហម។
លោក សាយ សូនី នាយកប្រតិបត្តិគ្រប់គ្រងទីផ្សារនៃគ្រឹះស្ថានមីក្រូហិរញ្ញវត្ថុប្រាសាក់ បានមានប្រសាសន៍ថា៖ «ប្រាសាក់បានផ្សារភ្ជាប់ខ្លួនយ៉ាងសកម្មទៅនឹងកិច្ចការសង្គមជាច្រើន ដើម្បីបង្កើតជាគុណតម្លៃ និងផ្ដល់ជាផលប្រយោជន៍ជូនសង្គម និងស្ថាប័នទាំងមូល។ ស្របទៅនឹងទស្សនវិស័យ និងភាពទំនួលខុសត្រូវរបស់ស្ថាប័នទៅនឹងសង្គម ប្រាសាក់ក៏បានចូលរួមក្នុងកម្មវិធីជាច្រើន ដូចជា សាងសង់អគារបណ្ណាល័យ ឧបត្ថម្ភការវះកាត់មាត់ឆែប ចូលរួមឧបត្ថម្ភដល់សិស្សពូកែ ទិវាអំណានជាតិ ការអប់រំ ខ្ញុំស្រលាញ់ប្រាក់រៀល យល់ដឹងពីហិរញ្ញវត្ថុ ចូលរួមបរិច្ចាគឈាម គាំទ្រកម្មវិធីពង្រឹងសមត្ថភាពរបស់យុវជន និងផ្ដល់ជំនួយសង្គ្រោះបន្ទាន់ដល់សហគមន៍ជាដើម»។
លោក សាយ សូនី បានបន្ថែមថា ៖ «ប្រាសាក់ ពិតជាមានសេចក្ដីរីករាយណាស់ដែលបានចូលរួមគាំទ្រដល់សកម្មភាពសង្គម និងការជួយជនរងគ្រោះដោយគ្រោះមហន្តរាយ និងវិបត្តិផ្សេងៗ ដោយការបរិច្ចាគទឹកប្រាក់តាមរយៈកាកបាទក្រហមកម្ពុជា។ ប្រាសាក់សង្ឃឹមថា ការបរិច្ចាគថវិកានាពេលនេះ នឹងចូលរួមចំណែកក្នុងការជួយឱ្យកាកបាទក្រហមកម្ពុជាកាន់តែមានលទ្ធភាពទូលំទូលាយជួយដល់ជនងាយរងគ្រោះបន្ថែមទៀត»។
សម្រាប់ព័ត៌មានផ្សេងៗទាក់ទងនឹងប្រាក់សាក់ អាចទាក់ទងតាមរយៈលេខ៖
វិបសាយ៖ www.prasac.com.kh