ជនជាតិបារាំងម្នាក់ថតវីដេអូខ្លី ចង់ប្រាប់ឲ្យគ្រប់គ្នាចេះទុកដាក់សំរាមបានត្រឹមត្រូវ (មានវីដេអូ)
- 2019-05-17 07:48:39
- ចំនួនមតិ 0 | ចំនួនចែករំលែក 0
ជនជាតិបារាំងម្នាក់ថតវីដេអូខ្លី ចង់ប្រាប់ឲ្យគ្រប់គ្នាចេះទុកដាក់សំរាមបានត្រឹមត្រូវ (មានវីដេអូ)
ចន្លោះមិនឃើញ
បុរសជនជាតិបារាំងម្នាក់បានមកហាត់ប្រាណនៅពហុកីឡដ្ឋានជាតិអូឡាំពិក ហើយឆ្លៀតរើសកំប៉ុងដើម្បីអនាម័យ និងបរិស្ថាន។
"មានគេឆ្ងល់ ហើយនិយាយត្រង់មនុស្សខ្លះថា អាបារាំងហ្នឹងឆ្កួតម៉េះអាហ៍៎! រើសសំរាមអត់ការងារធ្វើទេអី តាមពិតខ្ញុំមានការងារធ្វើតើ ខ្ញុំមកនេះហាត់ប្រាណ"។ ពាក្យសម្ដីទាំងនេះដកស្រង់ចេញពីវីដេអូខ្លីប្រមាណជា ៤នាទី ដែលបង្ហោះលើបណ្ដាញសង្គមដោយគណនី Enn Thoeun Batboy កាលពីថ្ងៃទី ១៦ ខែឧសភា ឆ្នាំ ២០១៩។
យ៉ាងណាក៏ដោយ ជនជាតិបារាំងដែលគេមិនបានស្គាល់ឈ្មោះរូបនេះ បានថ្លែងអំណរគុណចំពោះអ្នកគ្រប់គ្រងពហុកីឡដ្ឋានជាតិអូឡាំពិក រៀបចំកន្លែងស្អាត មើលម៉ូតូកង់ ហើយសំអាតរៀងរាល់ថ្ងៃ ប៉ុន្តែសោកស្ដាយឃើញថា មនុស្សមួយចំនួនមកអង្គុយលេង ផឹកទឹក ផឹកទឹកក្រូច ហើយចោលនៅកន្លែងអង្គុយ។ តាមពិតនៅពហុកីឡដ្ឋានជាតិ មានធុងសំរាមសឹងគ្រប់កន្លែង ប៉ុន្តែមិនបោះចោលក្នុងធុងសំរាម?
ជនជាតិបារាំងរូបនេះក៏បានលើកឡើងដែរថា ការរើសសំរាមនេះក៏ជាផ្នែកមួយនៃការចូលរួមធ្វើបុណ្យដែរ។ បន្ថែមលើនេះ ជនជាតិបារាំងក៏បានផ្ដល់ជាយោបល់ថា ប្រសិនបើគ្រប់គ្នាមានសំរាមខ្លួនឯង យើងគួរកាន់ទុកសិន ហើយរកកន្លែងមានធុងសំរាម រួចចោលសំរាមចូលទៅក្នុងធុងនោះ គឺជាការស្រេច។ មួយទៀតប្រសិនបើឃើញសំរាមដែលមិនគគ្រិចពេកយើងអាចរើសដាក់ថង់ឲ្យស្អាតទាំងអស់គ្នា។ "យើងធ្វើស្អាតមិនមែនស្អាតតែម្នាក់យើងទេ គឺសម្រាប់ស្អាតទាំងអស់គ្នា។ អីចឹងយើងជួយគ្នាទៅវិញទៅមក”។
នេះជាវីដេអូទាំងស្រុង ដែលជនជាតិបារាំង និយាយពីការចោលសំរាម នៅពហុកីឡដ្ឋានជាតិអូឡាំពិក