មិនមែនឈុតសម្ដែង ក្រុមថតភាពយន្តមួយក្រុម ប្រយុទ្ធជាមួយចោរស៊ីសាច់ហុតឈាមយប់មិញ របួសធ្ងន់រៀងខ្លួន

2019-06-12 04:00:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ព័ត៌មានដ៏គួរឲ្យភ្ញាក់មួយបានលេចឡើងនៅថ្ងៃនេះ ថាមានក្រុមថតភាពយន្តមួយក្រុម បានជួបប្រយុទ្ធគ្នាជាមួយក្រុមជនសង្ស័យជាចោរមួយក្រុម នៅតំបន់ជ្រោយចង្វា ក្រោយពីក្រុមការងារថតកុនរបស់ផលិតកម្ម Gold Film បានទៅអង្គុយលេងយកខ្យល់អាកាស បន្ទាប់ពីបញ្ចប់ការថតភាពយន្តចប់។

លោក ម៉ាប់ ប៊ុនលី(រូបដោះអាវ) និងក្រុមការងារដែលរងរបួស

ហេតុការណ៍ប្រទូសរ៉ាយយ៉ាងកម្ររវាងក្រុមផលិតភាពយន្ត និងក្រុមជនពាលខាងលើនេះ បានកើតឡើងកាលពីម៉ោង ២ឆ្លងចូលថ្ងៃទី ១២ មិថុនា ២០១៩។ លោក ម៉ាប់ ប៊ុនឡី អ្នកដឹកនាំក្រុមថតភាពយន្តរបស់ផលិតកម្មខាងលើ ដែលនៅក្នុងហេតុការណ៍នោះដែរ បានប្រាប់ឲ្យដឹងថា នៅមុនកើតហេតុ លោកនិងក្រុមការងារថតភាពយន្តរបស់លោក បន្ទាប់ពីបញ្ចប់ការថតឈុតខ្លះនៃរឿងរបស់ខ្លួន បានទៅអង្គុយលេងតាមទម្លាប់តាមបណ្ដោយមាត់ទន្លេ។

កំពុងអង្គុយភ្លេចខ្លួន ស្រាប់តែមានក្រុមជនសង្ស័យមួយក្រុម មិនដឹងចំនួនពិតប្រាកដ បានចូលមកវាយប្រហារក្រុមពួកលោកដែលអត់ដឹងខ្លួន ទាំងមិនដឹងមូលហេតុ។ "និយាយទៅ គឺចោរ ចោរប្លន់ វាកាប់ពួកយើង...ហើយវាលេងខ្ញុំមុនគេតែម្ដង...អង្គុយសុខៗ ស្រាប់វាលេងខ្ញុំផូង ខ្ញុំដួលព្រូស ហើយក៏ប្រឹងងើបមកវាយតបពួកវាវិញ"។ លោក ប៊ុនលី អធិប្បាយ។

អ្នកដឹកនាំរឿងខាងលើ ប្រាប់បន្តថា បន្ទាប់ពីរងការវាយប្រហារយ៉ាងកម្រោល ក្រុមពួកលោក ក៏បានវាយបកទៅវិញយ៉ាងអង់អាច រហូតធ្វើឲ្យពួកជនអន្ធពាលរត់បែកខ្ញែកគ្នាអស់។ ក្នុងហេតុការណ៍គួរឲ្យតក់ស្លុតនេះ មិនមានអ្នករងគ្រោះដល់ជីវិតទេ ប៉ុន្តែក្រុមផលិតភាពយន្តបានរងរបួស៣នាក់យ៉ាងដំណំលើក្បាល ក្នុងនោះ ក៏មានលោក ម៉ាប់ ប៊ុនលី ដែរ។ ដោយឡែក ក្រុមជនសង្ស័យ ក៏ទំនងមានរបួសយ៉ាងដំណំដូចគ្នា។

រូបភាព៖ ផ្ដល់ដោយលោក ប៊ុនលី

ភ្ជាប់ជាមួយរូបភាព បែករយះក្បាលប្រមាណ១ចង្អុលដៃ លោក ប៊ុនលី ស្នើឲ្យបងប្អូនប្រជាពលរដ្ឋមានការប្រុងប្រយ័ត្នឲ្យបានខ្លាំងសម្រាប់ការចេញដើរនៅពេលយប់ ចៀសវាងគ្រោះថ្នាក់ដូចពួកលោក៕

អត្ថបទ៖ ទារិកា