Jorginho បង្ហើបថា ភ្នាក់ងារធ្លាប់ធ្វើស៊ីលុយកាក់របស់ខ្លួន

2019-06-17 11:19:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើក្លឹប Chelsea កីឡាករ Jorginho បានប្រាប់គេហទំព័រក្លឹបរបស់ខ្លួនថា ភ្នាក់ងាររបស់ខ្លួនធ្លាប់កេងប្រវ័ញ្ចលុយកាក់របស់ខ្លួន កាលនៅជាយុវជន។

Jorginho ជាកីឡាករអ៊ីតាលី តែធំធាត់ដឹងក្ដីនៅប្រទេសប្រេស៊ីល។ កាលនៅជាយុវជនរូបគេបានបង្ហាញទម្រង់លេងបានយ៉ាងល្អ ដែលធ្វើឲ្យភ្នាក់ងារបាល់ទាត់ម្នាក់នាំរូបគេទៅលេងនៅអ៊ីតាលី កាលពីអាយុ ១៥ឆ្នាំ។

ពេលលេងនៅទឹកដីអ៊ីតាលី Jorginho បានលេងឲ្យក្លឹបយុវជន Berretti ដែលជាផ្នែកមួយនៃក្លឹប Verona។ នៅពេលរូបគេលេងនៅទីនោះ គេបានជួបកីឡាករប្រេស៊ីល ហើយក៏សួរសុខទុក្ខគ្នាទៅវិញទៅមក លុះដល់និយាយរឿងលុយកាក់ Jorginho បានប្រាប់ថា ខ្លួនរកបាន ២០អឺរ៉ូ (ជាង ២២ដុល្លារ) មួយសប្ដាហ៍ កីឡាករប្រេស៊ីលនោះក៏ប្រាប់ថា មានរឿងមិនសូវស្រួលហើយ។

កីឡាករប្រេស៊ីលនោះសួរចុះសួរឡើង បានដឹងថា ភ្នាក់ងាររបស់ Jorginho នោះ ធ្វើស៊ីសោះ ពេលនោះខ្សែបម្រើអ៊ីតាលីរូបនេះ ក៏ទូរស័ព្ទប្រាប់ម្ដាយរបស់ខ្លួនពីដំណើររឿងទាំងអស់នេះ ហើយខ្លួនចង់បោះបង់បាល់ទាត់ចោល ប៉ុន្តែម្ដាយរបស់ Jorginho បានប្រាប់ឲ្យទ្រាំបន្តិចទៀតសិន។

រហូតមកដល់ឆ្នាំ២០១៤ Jorginho បានចូលមកលេងឈុតធំ Verona រួចក្លឹប Napoli ក្រោមការដឹកនាំរបស់ Maurizio Sarri ក៏ទិញមក ហើយឆ្នាំ២០១៨ រូបគេក៏បានមកលេងនៅក្លឹប Chelsea៕

ប្រភព៖ Sky Sports ប្រែសម្រួល៖ ហ៊ីម រស្មី