Bill Gates ៖ Steve Jobs ពូកែខាងប្រើសីល ធ្វើឲ្យ Apple រស់រានមានជីវិត

2019-07-08 06:31:51
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Steve Jobs គឺជំនាញខាងប្រើសីល (ចង់សំដៅលើការដឹកនាំ) ធ្វើឲ្យបុគ្គលិករបស់ Apple មានអារម្មណ៍ចង់ធ្វើការងាររបស់ខ្លួន និងធ្វើការច្រើនម៉ោង។ នេះជាការលើកឡើងរបស់លោក Bill Gates មហាសេដ្ឋីដែលបានបង្កើតក្រុមហ៊ុន Microsoft។

លោក Bill Gates បន្តនិយាយថា ៖ ”កាលនោះ ខ្ញុំដូចជាអ្នកចេះអាគមតូចតាចម្នាក់ដែរ ព្រោះតែគាត់អាចប្រើសីល ហើយខ្ញុំឃើញគ្រប់គ្នាត្រូវសីលនេះ ប៉ុន្តែដោយសារខ្ញុំជាអ្នកចេះអាគម ដូចនេះខ្ញុំមិនត្រូវសីលឡើយ”។

ត្បិតថាមានការដឹកនាំខ្លាំងមែន ប៉ុន្តែលោក Steve Jobs បានបាត់បង់ជីវិតដោយសារជំងឺមហារីកលំពែងកាលពីឆ្នាំ ២០១១ ហើយវាជាឧទាហរណ៍មួយបង្ហាញថាកុំឲ្យគ្រប់គ្នាមានការដឹកនាំដូចគាត់។ នេះជាការបន្ថែមរបស់លោក Bill Gates។

ក្នុងបទសម្ភាសន៍ជាមួយ CNN នេះ មហាសេដ្ឋីទីពីរក្នុងលោក បន្តទៀតថា ៖ "ខ្ញុំនៅមិនទាន់បានជួបមនុស្សដែលអាច ជ្រើសរើសអ្នកមានទេពកោសល្យ ហើយជំរុញអ្នកដែលមានទេពកោសល្យនោះ បានល្អដូចជាគាត់ (Steve Jobs) នៅឡើយទេ។ Jobs ជាករណីកម្រមួយ ដោយ Apple បានដើរលើគន្លងស្លាប់ទៅហើយ ប៉ុន្តែបែរជាអាចត្រឡប់ក្លាយជាក្រុមហ៊ុនមានតម្លៃជាងគេក្នុងលោកទៅវិញ។ រឿងរ៉ាវបែបនេះ មិនមានច្រើននោះទេ"។

ការស្លាប់របស់លោក Steve Jobs បានធ្វើឲ្យលោក Tim Cook ឡើងធ្វើជាអ្នកដឹកនាំរហូតទល់បច្ចុប្បន្ននេះ។ ហើយនៅថ្ងៃទី ២៧ ខែមិថុនា ក្រុមហ៊ុន Apple បានប្រកាសពីការលាឈប់របស់លោក Jony Ive ប្រធានផ្នែកឌីហ្សាញរបស់ Apple។ Ive ត្រូវបានចាត់ទុកថាជាមនុស្សសំខាន់ម្នាក់ ទទួលរ៉ាប់រងលើផ្នែកឌីហ្សាញផលិតផលសំខាន់ៗ រួមមាន iPhone និង Mac។ លោកបានធ្វើការនៅ Apple ជាង ២០ ឆ្នាំមកហើយ៕

ចុចអាន៖

ប្រភព៖ CNBC ប្រែសម្រួល៖ សុខហេង