ហេតុអ្វីប្រទេសជាច្រើន ទៅដាក់មូលដ្ឋានទ័ព នៅប្រទេសដ៏តូចមួយនេះ?

2019-08-14 01:51:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ជីប៊ូទី (Djibouti) ជាប្រទេសមួយនៅទ្វីបអាហ្រ្វិក ដែលមានផ្ទៃដីតែជាង ២ម៉ឺនគីឡូម៉ែត្រការ៉េ (តូចជាងកម្ពុជា ជិត ៨ដង)។ ប្រទេសនេះ ត្រូវបានគេចាត់ទុកថាជាប្រទេសដែលមានមូលដ្ឋានកងទ័ពបរទេសតាំងនៅ ច្រើនជាងគេ។

តើកត្តាអ្វី ដែលធ្វើឲ្យប្រទេសធំៗក្នុងលោក ងាកទៅដាក់មូលដ្ឋានទ័ពរបស់ខ្លួននៅប្រទេសដ៏តូចមួយនេះ?

ចម្លើយយ៉ាងខ្លី គឺកត្តាភូមិសាស្រ្ដ។ ប្រទេសតូចជាងគេលំដាប់ទី៣ ប្រចាំទ្វីបអាហ្រ្វិកនេះ មានព្រំប្រទល់ភាគខាងជើងជាប់ប្រទេសអ៊ីរីទ្រា (Eritrea) ខាងលិច និងខាងត្បូងជាប់អេព្យូពី, ភាគអាគ្នេយ៍ជាប់សូម៉ាលី និងខាងកើត ជាដែនទឹក ជាប់សមុទ្រក្រហម និងឈូងសមុទ្រអេដេន។ មិនត្រឹមតែជិតសមុទ្រក្រហម និងឈូងសមុទ្រអេដេននោះទេ ប្រទេសនេះ ក៏មានច្រកសមុទ្រដ៏សំខាន់ សម្រាប់ពាណិជ្ជកម្មផងដែរ (Bab el Mandeb Strait) ដូចប្រិយមិត្តឃើញក្នុងផែនទីខាងក្រោមនេះស្រាប់។ ច្រកនេះ ភ្ជាប់ទៅកាន់ព្រែកជីក Suez Canal ដែលជាផ្លូវដឹកជញ្ជូនតាមសមុទ្រដ៏មមាញឹកបំផុតមួយ។

លើសពីនេះទៅទៀត ប្រទេសនេះ ស្ថិតក្នុងតំបន់ Horn of Africa និងឧបទ្វីបអារ៉ាប់ ដែលនៅជាប់តំបន់ក្ដៅមួយចំនួន ដូចជាប្រទេសសូម៉ាលី និងយ៉េមែន ជាដើម។

ដោយសារតែធនធានធម្មជាតិមិនអំណោយផល ដូច្នេះគ្មានហេតុផលអ្វីដែលប្រទេសនេះ ត្រូវប្រកែកមិនឲ្យប្រទេសផ្សេង ដាក់មូលដ្ឋានទ័ពនៅលើទឹកដីរបស់ខ្លួននោះទេ ព្រោះវាជាប្រភពចំណូលជាតិ ដ៏សំខាន់មួយ។

ប្រទេសណាខ្លះ តាំងមូលដ្ឋានទ័ពនៅជីប៊ូទី?

-សហរដ្ឋអាមេរិក៖ អាមេរិកមានមូលដ្ឋានទ័ពនៅប្រទេសជាច្រើន ប៉ុន្តែមានតែមួយប៉ុណ្ណោះនៅអាហ្រ្វិក គឺនៅប្រទេសជីប៊ូទីនេះឯង។ ក្នុងមូលដ្ឋានទ័ពអាមេរិកនេះ ក៏មានកងទ័ពចក្រភពអង់គ្លេសផងដែរ។

ទ័ពអាមេរិក នៅជីប៊ូទី (រូបភាព៖ Aljazeera)

ជប៉ុន៖ ជប៉ុនមានមូលដ្ឋានទ័ពក្រៅប្រទេស តែមួយប៉ុណ្ណោះ គឺនៅប្រទេសជីប៊ូទី។ ប្រទេសនេះ បានបើកមូលដ្ឋានទ័ពការពារខ្លួន (Japan Self-Defence Forces) នៅប្រទេសនេះ កាលពីខែកក្កដា ឆ្នាំ២០១១ ដែលមានទាហានជើងទឹក ប្រមាណ ៦០០នាក់។
ចិន៖ ចិន បានបើកមូលដ្ឋានទ័ពរបស់ខ្លួននៅជីប៊ូទី នាឆ្នាំ២០១៧ ដោយចំណាយការសាងសង់ ៥៩០លានដុល្លារ។

កងទ័ពប្រជាជនចិន ចូលរួមបើកមូលដ្ឋានទ័ពនៅជីប៊ូទី កាលពីឆ្នាំ២០១៧ (រូបភាព៖ Voice of America)

បារាំង៖ បារាំងជាប្រទេសដែលដាក់អាណានិគមលើប្រទេសជីប៊ូទី។ ក្រោយជីប៊ូទី បានឯករាជ្យ នាឆ្នាំ ១៩៩៧ បារាំងមិនបានដកទ័ពទាំងអស់នោះទេ ពោលគឺនៅមានទាហានប្រមាណ ១៥០០នាក់ តាំងនៅក្នុងមូលដ្ឋានរបស់ខ្លួន។ ក្នុងមូលដ្ឋានទ័ពបារាំងនេះ ក៏មានទ័ពអាល្លឺម៉ង់ និងអេស្ប៉ាញផងដែរ។
អ៊ីតាលី៖ ចាប់ពីឆ្នាំ ២០១៣ មក ទាហានអ៊ីតាលី តាំងនៅក្នុងប្រទេសជីប៊ូទី គឺមានប្រមាណ ៣០០នាក់។

នាវាយោធាអេស្ប៉ាញ ចតនៅមូលដ្ឋានទ័ពបារាំង (រូបភាព៖ Getty Images

ក្រៅពីប្រទេសទាំង ៥ នេះ ប្រទេសអារាប៊ីសាអូឌីត ក៏បានព្រមព្រៀងសាងសង់មូលដ្ឋានទ័ពរបស់ខ្លួននៅជីប៊ូទីផងដែរ។ ចំណែកឥណ្ឌា ក៏នឹងមានមូលដ្ឋានទ័ពផ្ទាល់ខ្លួននៅប្រទេសនេះ នាពេលអនាគតផងដែរ (បច្ចុប្បន្នឥណ្ឌា មានកិច្ចព្រមព្រៀងដាក់ទ័ពក្នុងមូលដ្ឋានទ័ពជាមួយជប៉ុន)។

ចំណូលដែលជីប៊ូទី បានពីការដាក់មូលដ្ឋានទ័ពបរទេស

ជីប៊ូទី អាចរកចំណូលបានយ៉ាងហោចណាស់ ៣០០លានដុល្លារក្នុងមួយឆ្នាំ។ ក្នុងនោះ សហរដ្ឋអាមេរិក បានចំណាយមួយឆ្នាំ ៦៣លានដុល្លារ ដើម្បីជួលទីតាំងមូលដ្ឋានទ័ពរបស់ខ្លួន។ មិនត្រឹមតែចំណូលនោះទេ ជីប៊ូទីក៏ទទួលបានការការពារសន្តិសុខផ្លូវទឹក និងការគំរាមកំហែងពីក្នុងតំបន់ផងដែរ។ ចំណែកចិន បានចាត់ទុកប្រទេសនេះ ជាប្រទេសសំខាន់មួយដ៏សំខាន់ក្នុងគម្រោង «ខ្សែក្រវាត់ និងផ្លូវ (Belt and Road)» របស់ខ្លួនផងដែរ។

ប្រភេទកងកម្លាំងបរទេស ដែលតាំងនៅប្រទេសជីប៊ូទី