កៀកថ្ងៃហើយ! CFS នឹងប៉ះ Visit Kampot នៅកីឡដ្ឋានខេត្តកំពត

2019-11-27 09:53:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់បាយបាន ដែលកំពុងទទួលបានការចាប់អារម្មណ៍ ពីអ្នកស្នេហាវិស័យកីឡាបាល់ទាត់នៅកម្ពុជា Cambodian Fan Club All Stars នឹងវិលកង់ពីរាជធានីភ្នំពេញ ទៅកាន់ពហុកីឡដ្ឋានខេត្តកំពត ដើម្បីប្រកួតមិត្តភាពទេសចរណ៍ ជាមួយក្រុម Visit Kampot នាថ្ងៃសៅរ៍ ទី៧ ធ្នូ ឆ្នាំ២០១៩ វេលាម៉ោង ៣: ៣០ នាទីរសៀល។

ពាក់ព័ន្ធនឹងជំនួបនេះ លោក អៃ សំអូន សហស្ថាបនិកក្រុមដ៏ខ្ចីវស្សា CFS បានលើកឡើងថា មិនទាន់អាចកំណត់លទ្ធផលយ៉ាងណានោះទេ ដ្បិតក្រុមទាំង២មិនធ្លាប់ប៉ះគ្នាឡើយ ខណៈក្រុមរបស់លោកទើបតែបង្កើតថ្មី ហើយកីឡាករទៀតសោត ក៏មិនមានពេលគ្រប់គ្រាន់ ដើម្បីប្រមូលផ្ដុំគ្នាដែរ។ ទោះបីជាយ៉ាងណា លោកជឿជាក់លើសមត្ថភាពក្រុមទាំងពីរ ព្រោះសំបូរដោយកីឡាករក្មេងៗ និងបច្ចេកទេសល្អដូចគ្នា ហើយថាការប្រកួតនេះ អាចជាជំនួបដ៏ជក់ចិត្ត។

លោក អៃ សំអូន ប្រធានក្រុម

បើតាមលោក អៃ សំអូន អ្នកគាំទ្រ Real Madrid និយមស្តាយអបអរគ្រាប់បាល់ របស់ Cristano Ronaldo ក្រុម Cambodian Fan Club All Stars បង្កើតឡើង ក្នុងគោលបំណងធំ៣។ ទី១ ឱ្យអ្នកគាំទ្រក្លឹបបាល់ទាត់អឺរ៉ុបនៅកម្ពុជា (មិនទាំងអស់) បានលេងជាមួយគ្នា ដោយមិនប្រកាន់ថា អ្នកគាំទ្រក្លិបណាមួយឡើយ។ ទី២ បំផុសគំនិតឱ្យយុវជនស្រលាញ់លេងកីឡា ជៀសឱ្យឆ្ងាយពីគ្រឿងញៀន និងទី៣ បង្កើតឡើងក្នុងគោលបំណង ចូលរួមការងារសង្គម តាមដែលអាចធ្វើបាន។

"ខ្ញុំឧស្សាហ៍រៀបចំកម្មវិធីឱ្យ Fan Real នៅកម្ពុជា ប្រកួតសប្បុរសធម៌ ហើយក៏មានអ្នកគាំទ្រក្លិបផ្សេងសុំចូលលេងដែរ...អ៊ីចឹងខ្ញុំពិបាក...ខ្ញុំក៏ពិភាក្សាជាមួយបងចក់ ក៏បង្កើតក្រុមនេះឡើង។ មិនតែប៉ុណ្ណឹងទេ យើងចង់បំផុសឱ្យយុវជនលេងកីឡា ជៀសឱ្យឆ្ងាយពីគ្រឿងញៀន និងជួយការងារសង្គមផងដែរ"។

ក្រុមបាល់ទាត់ Cambodian Fan Club All Stars ជាក្រុមចម្រុះដោយអ្នកគាំទ្រក្លិបបាល់ទាត់ប៉ែកអឺរ៉ុបនៅកម្ពុជា ដែលបច្ចុប្បន្នមានពីរក្រុមពោលគឺ ក្រុម A និងកុ្រម B ហើយទាំងពីរក្រុម មានសម្ថភាពប្រហាក់ប្រហែលគ្នា។

កំពតជាខេត្តគោលដៅទីមួយ ដែលក្រុមបាល់ទាត់ CFS នឹងទៅលេងមុនគេ ហើយបន្ទាប់មក ក្រុមមួយនេះ នឹងធ្វើដំណើរឆ្ពោះទៅកាន់បណ្ដាខេត្តក្រុងដទៃទៀត ដើម្បីប្រកួតមិត្តភាព៕