អង្គការផ្កាយសមុទ្រ បើកពានរង្វាន់ AIA Youth League មាន១០៥ក្រុមចូលរួម
- 2019-12-02 04:40:58
- ចំនួនមតិ 0 | ចំនួនចែករំលែក 0
អង្គការផ្កាយសមុទ្រ បើកពានរង្វាន់ AIA Youth League មាន១០៥ក្រុមចូលរួម
ចន្លោះមិនឃើញ
អង្គការផ្កាយសមុទ្រ បានបើកការប្រកួតពានរង្វាន់យុវជនរបស់ខ្លួន AIA Youth League 2020 ដោយមានក្រុមចូលរួមរហូតដល់១០៥ក្រុមឯណោះ លើសឆ្នាំមុនទៅទៀត។
ការប្រកួតនេះដែរ មានក្រុមនារីចូលរួមរហូតដល់៣០ក្រុម ហើយការប្រកួតនឹងចាប់ផ្ដើមពីថ្ងៃ១ខែធ្នូឆ្នាំ២០១៩នេះ រហូតដល់ចុងខែឧសភាឆ្នាំ២០២០។ ឆ្នាំនេះ មានក្រុមសរុបរហូតដល់១០៥ឯណោះ ដោយមានការកើនឡើងជាងឆ្នាំមុនទៅទៀត។ កញ្ញា ជួប វិច្ឆិកា ប្រធានអង្គការផ្កាយសមុទ្រ បានបញ្ជាក់ដែរថា ការប្រកួតនេះ មានគោលដៅចង់ផ្ដល់ឱកាសដល់ក្មេងៗ បានបញ្ចេញសមត្ថភាពរបស់ពួកគេ។
វាជាឱកាសសម្រាប់យុវជនរបស់អង្គការនានា បង្ហាញសមត្ថភាព ហើយអាចនឹងមានឱកាសចាប់អាជីពជាកីឡាករបាល់ទាត់ផងដែរ ប្រសិនបើលេងបានល្អ ព្រោះមានក្លឹបជាច្រើនតាមដានការប្រកួតរបស់ពួកគេ។ មួយវិញទៀត ពានយុវជននេះ ក៏បានផ្ដល់ឱកាសឱ្យក្មេងស្រីបានចូលលេងច្រើន ដើម្បីបង្ហាញថាពួកគេក៏ត្រូវបានយកចិត្តទុកដាក់ និងអាចលេងកីឡាដូចក្មេងប្រុសផងដែរ។
ក្នុងឱកាសបើកការប្រកួតពានរង្វាន់ AIA Youth League នេះដែរ លោក ឆាង ពិសិដ្ឋ តំណាងសហព័ន្ធកីឡាបាល់ទាត់កម្ពុជា បាននិយាយថានេះជាការប្រកួតពានកម្រិតយុវជនមួយដ៏ល្អ។ ក្មេងៗអាចបង្ហាញសមត្ថភាព ជាពិសេសក្មេងស្រីៗ ស្របតាមអ្វីដែលសហព័ន្ធបាល់ទាត់កំពុងធ្វើដើម្បីអភិវឌ្ឍបាល់ទាត់នារីកម្ពុជាឱ្យកាន់តែខ្លាំងមួយកម្រិតទៀត។ ក្រុមកីឡាការិនីដែលលេងពានរង្វាន់នេះ ប្រសិនបើមានសមត្ថភាព ពួកគេនឹងអាចបានឱកាសជាប់ជាជម្រើសជាតិនារីកម្ពុជាផងដែរ៕