ភាពយន្តខ្មែរមួយនេះ ធ្វើស៊ីអារម្មណ៍បងប្អូននៅផ្ទះជួលហើយ!
- 2019-12-04 08:53:41
- ចំនួនមតិ 0 | ចំនួនចែករំលែក 0
ភាពយន្តខ្មែរមួយនេះ ធ្វើស៊ីអារម្មណ៍បងប្អូននៅផ្ទះជួលហើយ!
ចន្លោះមិនឃើញ
ភាពយន្តខ្មែរមួយរឿងរបស់ផលិតកម្ម "ខ្មែរមេគង្គ" បានបើកសម្ពោធនាថ្ងៃម្សិលមិញ ដោយសាច់រឿងទាំងមូលមានពាក់ព័ន្ធនឹងវិញ្ញាណមាននៅផ្ទះជួល ជាទីដែលបងប្អូនឡើងពីខេត្តស្នាក់អាស្រ័យដើម្បីបន្តការសិក្សាឬប្រកបកិច្ចការងារ។
ខ្សែភាពយន្តមួយនេះ ត្រូវបានគេដាក់ចំណងជើងថា "ផ្ទះជួល" ឬ "Move Out” ដែលចូលរួមសម្ដែងដោយសុទ្ធតែតារាជើងថ្មី ក្នុងនោះទាំងតួឯកប្រុស និងតួឯកស្រី។ បញ្ហានេះ ខុសពីរាល់ដងដែលផលិតកម្មល្បីឈ្មោះមួយនេះ និយមប្រើតារាល្បីៗក្នុងសង្គមសិល្បៈខ្មែរនៅក្នុងសាច់រឿងរបស់ខ្លួន។ ជុំវិញបញ្ហានេះ មិនមានការបញ្ជាក់ពីអ្នកដឹកនាំរឿងលោក ជីមមី ហានឌឺសុន នោះទេ។
តួប្រុសក្នុងរឿងនេះ ត្រូវគេស្គាល់ឈ្មោះថា លោក ហ្សាតាន់ និងតួស្រីមានឈ្មោះ យោធិន វីរិយ៉ា កូនស្រីរបស់លោក សាវិន ហ្វីលីព។ ដោយសារថា ជាបទពិសោធន៍លើកដំបូងដូចគ្នា តួឯកទាំងពីរ បានឲ្យដឹងថា ពួកគេមានបញ្ហាក្នុងការសម្ដែងមួយចំនួន មុនពេលចេញសមិទ្ធផលសម្រេចមកដាក់ជូនប្រិយមិត្តទស្សនិកជននាពេលនេះ។ សំខាន់ជាងនេះ លោក ហ្សាតាន់ ប្រាប់ថា លោកមានអារម្មណ៍ខ្លាចពិតប្រាកដនៅក្នុងការថតរឿងខ្មោចមួយរឿងនេះ។
“ការលំបាករបស់ខ្ញុំ គឺត្រង់ឈុតមួយធ្លាក់ពីលើជណ្ដើរ ហើយខ្ញុំខ្លាចមែន ព្រោះពេលហ្នុងមានតែខ្ញុំម្នាក់ឯងដែរថត រួមជាមួយកាមេរ៉ា!”។
ភាពយន្តខ្នាតធំរឿង "ផ្ទះជួល" និពន្ធដោយអ្នកនិពន្ធ សុធារី អាត ជាមួយផលិតករ លោក ស្វាយ លីម៉េង ដែលជាប្រភេទរឿងខ្មោច រសជាតិថ្មី បន្ទាប់ពីរឿង "ព្រឺ"។ សាច់រឿងនិយាយពីផ្ទះជួលមួយកន្លែង ដែលមានវិញ្ញាណឃុំគ្រង។ ដូច្នេះហើយ បម្រាមតឹងរឹងត្រូវដាក់សម្រាប់អ្នកដែលភ្លាត់មកជួលផ្ទះនេះ។ តារាស្រីវ័យ ១៧ កូនរបស់ សាវិន ហ្វីលីព បានទៅជួលផ្ទះនេះ ដូច្នេះហើយ រឿងរន្ធត់ព្រឺព្រួចជាច្រើនបានកើតឡើង។
សាច់រឿងយ៉ាងណា ប្រិយមិត្តនឹងដឹង បន្ទាប់ពីថ្ងៃស្អែក វេលាដែលភាពយន្តនេះ នឹងបញ្ចាំងជាផ្លូវការនៅថ្ងៃទី ៥ ខែ ធ្នូ ស្អែកនេះ នៅគ្រប់រោងភាពយន្តទាំងអស់ នៅភ្នំពេញ សៀមរាប ខេត្តព្រះសីហនុ ប៉ោយប៉ែត បន្ទាយមានជ័យ និងបាត់ដំបង៕