ទីបំផុតលុយ ៤០០០ដុល្លារ ធ្លាក់ទៅលើ កូយ ឡាយ កម្មវិធីពានរង្វាន់ TV5

2019-12-09 07:10:51
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីប្រដាល់ដណ្ដើមពានរង្វាន់ TV5 ទម្ងន់៦០គីឡូក្រាម បានបញ្ចប់ទៅហើយកាលពីថ្ងៃសៅរ៍ ទី៧ ខែធ្នូ ២០១៩ ដោយម្ចាស់ពានរង្វាន់លេខ១បានលើកីឡាករមកឆត្រយោង ៩១១ កូយ ឡាយ ទទួលបានប្រាក់រង្វាន់ ៤០០០ដុល្លារ។

កូយ ឡាយ(ក្រហម)

វគ្គផ្ដាច់ព្រ័ត្របែបនេះ កូយ ឡាយ មិនបានស្ទាបស្ទង់អ្វីនោះទេ ពោលចូលទឹកទី១ភ្លាមបើកការសម្រុកជាខ្លាំងទៅលើកីឡាករ ព្រឿង សុជាតិ។ ចំណែក សុជាតិ ព្យាយាមថយៗ និងវ៉ៃតបតខ្លះៗទៅវិញ កុំឲ្យដៃគូបានចិត្តពេក។ ក្នុងទឹកទី១ដដែលនេះសិស្សគុនមកពីឆត្រយោង ៩១១ ព្យាយាមឆកកែងជាច្រើនដងប៉ុន្តែមិនសូវបានសម្រេចនោះឡើយ។

កីឡាករទាំង៤នាក់ជាប់ចំណាត់ថ្នាក់

ចូលដល់ទឹកទី២ កូយ ឡាយ នៅតែសម្រុកទៅលើដៃគូដដែល អ្នកទាំងពីរខាងលើនេះបញ្ចេញកណ្ដាប់ដៃប្ដូរគ្នាច្រើន ប៉ុន្តែចូលដល់ពាក់កណ្ដាលទឹកកូនសិស្សលោក ធន់ សុភា ហាក់អស់ស៊ុហ្វបន្តិច។ ការប្រកួតឈានដល់ទឹក៣ ព្រឿង សុជាតិ ដូចដឹងថាខ្លួនចាញ់ពិន្ទុដៃគូ ក៏ព្យាយាមចូលវ៉ៃយកពិន្ទុមកវិញ ប៉ុន្តែយ៉ាងណាចូលក៏សូវចុះជាមួយ កូយ ឡាយ ដែរចប់ការប្រកួតរវាងអ្នកទាំងពីរចាញ់ឈ្នះត្រឹមពិន្ទុប៉ុណ្ណោះ។

កីឡាករ កូយ ឡាយ ឈ្នះលេខ១

ម្ចាស់ពានរង្វាន់ TV5 ទម្ងន់៦០គីឡូក្រាម រដូវកាលទី៦ លេខ១ កូយ ឡាយ ទទួលបានទឹកប្រាក់ ៤០០០ដុល្លារ លេខ២ ព្រឿង សុជាតិ ទទួលបានប្រាក់ ២០០០ដុល្លារ លេខ៣ សូត្រ ខេវិន ទទួលបានប្រាក់ ៧៥០ដុល្លារ និងលេខ៤ កីឡការ ទូច ដេវីត ទទួលបាន ៥០០ដុល្លារ៕

អត្ថបទ៖ នួន ស៊ីណា