រុស្ស៊ីរងពិន័យមិនឲ្យចូលរួមក្នុងកម្មវិធីពិភពលោករយៈពេល ៤ឆ្នាំ
- 2019-12-09 11:28:01
- ចំនួនមតិ 0 | ចំនួនចែករំលែក 0
រុស្ស៊ីរងពិន័យមិនឲ្យចូលរួមក្នុងកម្មវិធីពិភពលោករយៈពេល ៤ឆ្នាំ
ចន្លោះមិនឃើញ
ទង់ជាតិ និងភ្លេងជាតិនៃសហព័ន្ធរុស្ស៊ី នឹងមិនមានឡើយនៅក្នុងព្រឹត្តិការណ៍កីឡាពិភពលោកធំៗទាំងអស់ ក្នុងរយៈពេល ៤ឆ្នាំខាងមុខ ដោយសារតែអង្គភាពប្រយុទ្ធប្រឆាំងនឹងសារធាតុញៀនហាមឃាត់នៅក្នុងកីឡា (WADA) បានដាក់បម្រាមប្រទេសនេះ។
គណៈកម្មការក្រោមបង្គាប់ WADA បានរកឃើញថា អង្គភាពប្រយុទ្ធប្រឆាំងនឹងសារធាតុញៀនហាមឃាត់ក្នុងកីឡារបស់រុស្ស៊ី ផ្ដល់ទិន្នន័យមិនត្រឹមត្រូវទាក់ទងនឹងលទ្ធផលនៃការប្រើប្រាស់សារធាតុញៀនរបស់អត្តពលិករបស់ខ្លួន (ដោយមានខ្លះត្រូវបានកែ ហើយខ្លះទៀតត្រូវបានលុបចេញពីឯកសារ PDF)។
ការដាក់បម្រាមនេះធ្វើឲ្យរុស្ស៊ីមិនអាចចូលរួមក្នុងកម្មវិធីកីឡាពិភពលោកមួយចំនួនដូចជា FIFA World Cup 2022 ព្រឹត្តិការណ៍អូឡាំពិកតូក្យូ ២០២០ ប៉ារ៉ាអូឡាំពិក និងកីឡាផ្សេងៗជាច្រើនទៀត។
យ៉ាងណាមិញ រុស្ស៊ីមានសិទ្ធិប្ដឹងតវ៉ាក្នុងរយៈពេល ២១ថ្ងៃ។
កន្លងមករុស្ស៊ីក៏ត្រូវបានពិន័យមិនឲ្យចូលរួមក្នុងកម្មវិធីកីឡាធំៗដែរ ក្រោយពីរកឃើញនូវភាពមិនប្រក្រតីកាលពីព្រឹត្តិការណ៍អូឡាំពិករដូវរងាទីក្រុងស៊ូជី ២០១៤។ ប៉ុន្តែនៅតែមានអត្តពលិករុស្ស៊ីមួយចំនួននៅតែចូលរួមក្នុងព្រឹត្តិការណ៍ធំៗដូចជា អូឡាំពិករដូវរងាព្យុងយ៉ាង ២០១៨ ដោយចូលរួមក្នុងនាមជាកីឡាករអព្យាក្រឹត្យ (មិនតំណាងប្រទេស)។
ចំពោះព្រឹត្តិការណ៍ Euro 2020 វិញ ទីក្រុង Saint Petersburg នៃរុស្ស៊ីនៅតែអាចធ្វើជាម្ចាស់ផ្ទះបានដដែល ដោយសារតែព្រឹត្តិការណ៍នេះ មិនត្រូវបានចាត់ទុកជាកម្មវិធីកីឡាធំៗ ដោយ WADA៕