មកទស្សនាគ្រូជំនាញអេហ្សីប បង្រៀនការជួយអ្នកលង់ទឹក របៀបសង្គ្រោះបឋម

2020-01-21 07:29:40
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធខ្មែរកីឡាហែលទឹក បានបង្កើតវគ្គសិក្សាខ្លីរយៈពេល២ថ្ងៃ ស្ដីពីការជួយអ្នកលង់ទឹក និងការសង្គ្រោះបឋមដើម្បីឲ្យរួចជីវិត ដោយមានគ្រូឧបទេសមកពីប្រទេសអេហ្សីប នៅឯពហុកីឡដ្ឋានមរតកតេជោ។

រូបភាពរបស់សហព័ន្ធ

លោក ហែម គីរី អគ្គលេខាធិការសហព័ន្ធខាងលើនេះ បានឲ្យដឹងថា នេះជាវគ្គថ្មីរបស់សហព័ន្ធក្នុងការជួយបណ្ដុះបណ្ដាលដល់មន្ត្រីសហព័ន្ធ និងគ្រូបង្វឹកជាឆ្នាំអាងទឹក (Pool Lifeguard)។ គោលបំណងបង្កើតកម្មវិធីនេះឡើង គឺចង់ឲ្យតាមបណ្ដាក្លឹបហែលទឹក ឬសណ្ឋាគារនានានៅកម្ពុជា ឲ្យបានដឹងថាសហព័ន្ធមានគ្រូឧបទេស និងមានវគ្គសិក្សានេះឡើង។

រូបភាពរបស់សហព័ន្ធ

អគ្គលេខាធិការខាងលើបន្តប្រាប់ទៀតថា ពីមុនក៏មានវគ្គសិក្សាបែបនេះដែរ ប៉ុន្តែជាវគ្គខ្លីៗ និងមិនបានស៊ីជម្រៅខ្លាំងនោះទេ។ ប៉ុន្តែលើកនេះគឺមានគ្រូជំនាញត្រឹមត្រូវ និងមានបទពិសោធរៀនលំអិតតែម្ដង។ ក្នុងវគ្គនេះដែរគឺបង្រៀនឲ្យចេះជួយយកអ្នកលង់ទឹកចេញពីទឹក និងជំហានបន្ទាប់ទៀតជួយសង្គ្រោះបឋមនៅលើគោកបន្តទៀត។

វគ្គសិក្សានេះគឺពិតជាមានសារសំខាន់ ព្រោះវាចាំបាច់ណាស់សម្រាប់អាងហែលទឹកនិមួយៗមិនថានៅពេលប្រកួត ឬអាងហែលទឹកមហាជននោះទេ ដាច់ខាតត្រូវតែមានអ្នកចេះដើម្បីមើល ឬត្រូវសង្គ្រោះនៅពេលមានបញ្ហាណាមួយកើតឡើង។

រូបភាពរបស់សហព័ន្ធ

បញ្ជាក់ដែរថា វគ្គសិក្សានេះគឺមានសិក្ខាកាមសរុបទាំងគ្រូ កីឡាករ និងមន្ត្រី ១៦រូប និងមានរយៈពេល២ថ្ងៃចាប់ពីថ្ងៃទី២១ ដល់ ២២ ខែមករា ឆ្នាំ២០២០ នៅឯកីឡដ្ឋានមរតកតេជោ៕

អត្ថបទ៖ នួន ស៊ីណា